ATÜNNAK 32

Jakob naw Esau Ng’Hmuh Püi Khai ah Pawng ci

1Jakob cu a hteh yah ung khanchang gui awn ng’hmuk ci gui. 2Ani naw cun ah hmu gui neta, “Shin cu Khanpughi ah khaw phung nei” cik ci. Cun ah kyasei cun ah hmun cu Mahanaim ah pyen ci gui.

3Jakob naw a phäi Esau ah om nak Edom khaw ah ng’shä tüi ma ci. 4Ani naw a tüih gui ah chang gui am cäi gui cu, “Ka bawi Esau am nami m’thein vai nei. Kei, Jakob na thu ngai ciah na changshäm cu, tuhbäi ka law ba vai güt ung, Laban ah ka om tuk ci nei. 5Kei naw seipat gui, ng’se laa gui, htawme gui, me gui la changshäm akda cu ka law püi ci nei. Saya aw, na na m’gein khai ah ngaih u ne, chang m’cäi ne ka tüi lawk ci nei” cine ng’cük lawk ci.

6A chang tüih gui cu Jakob ah law ba u neta, keimi cu na phäi Esau ah kami hteit pyi ci. Ani cu chang phia phli khah püi ne, ana a pawng vü pyi ci nei” cik ci gui. 7Jakob cu ang htei ah cäi ne ng’ä ci. A chang gui, a sei a me gui, la kalauk gui avan cu hnih ah k’pai ci. 8Ani naw, “Esau naw law ne a tuk law ung, amshah ana guh ung phi, amshah om ba khai cine ngai ci.

9Cun kawn ah Jakob ah taigü cu, “Ka pughi Abraham ah Khanpughi, kapa Isaak ah Khanpughi, ka taigü cu na ngai pe ä! Nang Bawipa naw ka khaw, ka chang gui ah ka hteh ba vai ah na pyen ci. A päng ung na näng vai ah ka ning m’htei khai nei, na cik ci. 10Na m’hni nak la na bekhüt nak cu kei changshäm awn kä khinkha ci nei. Cau kei naw Jordan tuinu cu ng’shopawng bäng awn ka kat lawk ci nei, cun ung phi tuhbäi chang bum hnih kami law lawk ci. 11Ka taigü ci nei, ka phäi Esau ah kut ung nak phyawn ä, kei cu ka kyik ci nei, ka phäi Esau cu kei la ka chu ka hta gui, avan na m’di gui khai ah law pyi ci nei. 12Nang naw shai na tak nak ung, a päng ung ka näng vai ah na m’htei ne, tuinu kem ah lai gin chü ah chang naw kä khei tai vai ah ka ng’shon khai ah na pyen pyi ci nei” ciah kyak ci.

13A cun ung mü ät ami ih kawn ah Jakob naw a phäi Esau am a pek vai ah a vuh chah avan ungka, 14me akhik phia goi, ak hla m’ku, 15htawme akhik phia goi, ak hla m’ku, a suuk tuimah kalauk thumkip la ami hta gui, seipat phlikip, vantang gha, laa akhik m’ku la ak hla gha cu la neta, 16a phäh phäh ah m’cha ne, a changshäm gui am ap gui neta, “Nangmi nami na hteh ma vai, bum ät la bum ät ng’shawng pi pi cine nami hteh vai” cine m’cäi gui ci. 17Ani naw hteit ma ci gui am cäi gui cu, “Ka phäi Esau naw ning hmu gui neta, nangmi nami bawi a u ang? A hawi nami hteit khai ang? Shin ah sei me gui mä a u ah kaa gui ang? cine a ning shi gui ah a kyak ung; 18“Shin gui cu changshäm Jakob ah kaa gui nei, a bawi Esau am a pek vai ah kami law püi nei. Jakob a mät phi hnu ah lawk ci nei” cine nami pyen vai cine m’cäi gui ci. 19Cun kawn ah a hnih nak, ak thum nak la, a hei angvai hta gui avan phi m’cäi gui ne, “Esau nami hmuh ung a cun ah nami m’thein vai nei, 20Jakob na changshäm phi kami hnu ah lawk ci nei” ciah nami pyen vai cine m’cäi gui ci. “Ka phäi cu m’cümhnah nak pe ne, yei sak neta ka hmuh law ung na m’gein hman khai nei.” 21Cun ah m’cümhnah nak pek khai gui cu tüi gui ma neta, a mät cu a cun ah phung ung ip ci.

Kä hmuh ah Chang naw Peniela ung Jakob ng’Pyei Püi ci

22A cu mü Jakob cu tho law ne, ak chu goi la a chuba gui ni, a hta gha lei ät ni gui cu khah püi gui ne, Jabbok tuinu cu heikat ci gui. 23Cun ah chang gui ni, khawh gui ni hei ng’kah püi yawp u neta, 24Jakob cu amät om shüt ci. Chang tumat law ne ani cu thaai ne ng’pyei püi ci. 25Ani naw Jakob kä a m’khüt law cu hmu neta, a phei k’tui ung leh sei, a khaw zuung sei m’neh ci. 26Cun ah chang naw, “Khaw thai lawk ci, na chah ä, ka hteit ba khai” cik ci.

Jakob naw, “Hriham kä na na pek pha ung kä ka ning chah khai nei” cik ci.

27Cun ah chang naw na ming a u ang?” cine ng’shik ci.

Jakob naw, “Kei Jakob nei” cine m’shang ci.

28Cun ah chang naw, “Nang cu Khanpughi awn ng’pyei ni ne, chang awn phi ng’pyei ni ne, na näng ci kyasei, na ming cu Jakob ah kä kya ba khai, Israel ah kyak khai nei” cine pyen nak ci. 29Jakob naw, “Na ming cu na m’thein ä” cik ci.

Ani naw, “A i ah kyasei kei ah ming na hmat hlü ang?” ci neta Jakob am hriham pek ci.

30Jakob naw, “Kei naw Khanpughi cu hmai ng’chum sei ka hmuk ci, tuh güt ka ghing ci” ci neta, cun ah hmun cu Peniela ah a ming sui ci. 31Ani cu khawhni pyü law khäta Peniela ungka tho law ne hteit ci. Ani cu a phei k’tui m’neh ne ng’dääk ci. 32A cuta güt Israel chang gui naw a phei k’tui sa cu kä ei ci gui, a i ah kyasei ci ung a phei k’tui sa ung a leh ah hmawk ah kyak ci.

Currently Selected:

ATÜNNAK 32: CBC

Highlight

Copy