ATÜNNAK 30

1Rachelah cu kä hta tuk ci. Cun ah kya ne a pai ah khan ah m’thüi law neta, Jakob am, “Na hta tu sak ä, kä cun ung ka sik khai nei” cik ci.

2Jakob naw, “Kei naw Khanpughi ah hnün ung om ne kä ka bi hning ci, nang na hta vai cu Khanpughi bäng naw bi hning ci” cine m’lung she ci.

3Rachelah naw, “Shin ah ka changshäm Bilahah cu ih püi ä, ani a hta law ung ka hta ah kyak khai, kei cu ana nu ah ka kyak khai” cik ci. 4Cun ah kyasei Rachelah naw Bilahah cu pe khäta, Jakob naw chu nak ci. 5Bilahah cu kämah ne Jakob awn pami hta ah hta ci goi. 6Rachelah naw, “Khanpughi naw kei lam ah om ne m’khoichak ci nei, ka taigü ngai ne htapa na pek ci” ci neta a ming cu Dan ah sui ci. 7Bilahah cu kämah ba ne Jakob awn pami hta ah hta ba mä ci goi. 8Rachelah naw, “Kei cu ka pai awn hnungtuk ni ne, kei ka näng ci” ci nak ah a ming cu Naphtali ah sui ci.

9Leah naw amät kä hta ba khai ah hmat neta, Zilapah cu Jakob am chu na sak ci. 10Zilapah cu Jakob awn pami hta ah hta ba ci goi. 11Leah naw, “Kei cu ka mang gei ci nei” ci neta, aming cu Kad ah sui ci. 12Zilapah cu pami ah hta ba mä sei, 13Leah naw, “Kei ka yeikyai ci nei, hnumi gui naw kei cu zeikai ciah na khü khai gui nei” ci neta, Asherah ah a ming sui ci.

14Geit ami khäm sang ung Reuben cu bung ah hteit neta, k’phyu sei sing theih cu hmu neta anu Leah am thak law ci. Rebekka naw Leah am, “Na bä ni na hta ah sing theih cu na pe tuä” cine ng’yoi tuk ci.

15Leah naw, “Ka cei na na guh pek ah kä na ng’büh ne ma? Ka hta ah sing theih mä na na gut ba khai ma?” ci nak ci.

Rabekka naw, “Na hta ah sing theih cu na na pek tu ah a kyak ung, tuh mü Jakob awn na ni ip khai” pyen nak ci.

16Mühun ah lo ah ka Jakob law ba khäta, Leah naw hteh shi ne, “Ka hta ah sing thei awn ka ning hleih ah kyasei, tuh mü kei awn ni ip khai” ci sei acu mü ani awn ip ci goi.

17Khanpughi naw Leah ah taigü cu ngaih pe sei, ani cu kämah ne a hma nak pami ah Jakob awn hta ba ci goi. 18Leah naw, “Ka cei am ka changshäm ka pek ah phäh ah Khanpughi naw ana m’cümhnah nei” ci neta Issakha ah a ming sui ci. 19Leah cu kämah ba ne ak chuk nak pami ah Jakob awn hta ba ci goi. 20Ani naw, “Khanpughi naw akni pi ana pek nei, chang chuk ah ka hta ci kyasei, tuhbäi ka cei naw na khäm khai nei” ci neta a ming cu Zebulun ah sui ci. 21Cun kawn ah hnumi hta ah hta ba ne, Dinah ah a ming sui ci.

22Cun kawn ah Khanpughi naw, Rachelah cu shüm ba ne, a taigü cu ngaih pe neta, a hta vai cu pek ci. 23Ani cu kämah ne pami hta ah hta ci. Ani naw, “Khanpughi naw htapa na pe ne, ka lü ng’aa nak cu na näng pek ci nei. 24Bawipa naw htapa na pe ba mä sä” ci neta a ming cu Joseph ah sui ci.

Jakob Naw Laban Nii Püi Ci

25Joseph ang tüi kawn ah Jakob naw Laban am, “Ka im ah ka hteh ba vai ah na tüi ba ä. 26Nang ah bii bi ne ka hlawh gui ah ka chu gui la ka hta gui, ka hteh püi gui vai ah na pe ä, nang ah bii a i hlawk ah ka bi cu na mät naw na hmat ci nei” cik ci.

27Laban naw, “Ka pyen hlü cu, Bawipa naw nang ung hriham ana pek cu ka hmat pyi ci nei. 28Na gah gui vai ah a phu cu khei ä, ka ning pek khai nei” cik ci.

29Jakob naw, “A i hlawk ah kei naw bii ka bi la kei ah m’htei ah htawme gui a i hlawk ah ada law cu na mät naw na hmat ci. 30Azan na khawh apihta te, tuhbäi da lawk ci. Bawipa naw kei ah bi nak ung hriham ning pek ci nei. Tuhbäi ka mät naw ka kyong khui pyang ne ka om vai a khin gawk lawk ci nei” cik ci.

31Laban naw, “A i ang ka ning pek kaw?” cine ng’shik ci.

Jakob naw, “A i ng’cheng phi kä ka m’hni ci. Na yum ah a kyak ung na htawme gui cu ka shäm ba hlük ci. 32Atuh ngawi hteit ne htawme gui cu ka teng khai. Htawme ale gui la me ang khan gui cu ka m’khoi m’chak khai. Cun gui cu kei ah ka ng’cheng ah kya sä. 33Ngawi ah kei ah ka ng’düng nak ah mawng cu a cun gui naw m’dang khai gui nei. Me gui ung kä ng’khan ciah me, htawme gui ung kä le ciah htawme a om law ah a kyak ung, cun cu kei ah m’guuk ah na hmat khai nei” cine pyen ci.

34Laban naw, “Bä khai, na pyen ah mäih ah mi bik khai nei” cik ci. 35A cu hnüüp Laban naw, ng’khan ci la bawk ciah me akhik akhla gui la htawme ale gui cu avan ghü neta a hta gui am ap gui ci. 36Ami om nak la Jakob ah om nak cu hnüüp thum lam ah sho khai ah om sak ci. Jakob naw k’pawih ba ciah Laban ah htawme la me gui cu shäm ci.

37A hnawk ng’kying ciah m’vaang, kegäk, la keih sing gui ah ang ban gui cu shui ne a bawk la ang kying ah ng’thaai khai ah m’gün ne a hnawk gui cu khawk neta, 38Htawme gui cu tui ami awk law ung ng’shui ci gui ah kyasei, tui ami awk nak ah ma ah tän ne ng’ling ci. 39Htawme gui cu sing ang lin nak ah pei ah ng’ghui u neta, angkhan, amvaw gui ah hta lawk ci gui.

40Jakob naw htaw la me gui cu m’khoi cha gui neta, a pyawk ni, ale ni ah kyak ciah Laban ah htawme gui täng ah man sak gui ci gui. Shicha ah Ani naw amät ah me gui tha tu hnga ne, Laban ah kaa gui phi ng’thumcha ne tha ci.

41Gaigawng ciah htawme gui ami ng’shui yah ung, tui ami awk nak ung ami ma ah sing ng’ban gui cu m’shän ci. Cun ah kya ne sing ng’ban gui ah ng’lung ah ngami cu ng’ghui ci gui. 42Cun ung phi kä gai veih ciah htawme gui ah ma ah sing ng’ban gui cu kä m’shän ci. Cun ah kyasei kä gai veih ci gui cu Laban ah kaa ah kya ne, gai ci avan cu Jakob ah kaa ah kyak ci. 43Jakob cu ang htei ah ng’büh mang lawk ci. Ani ung htawme gui, kalauk gui, ng’se laa gui la changshäm gui akda om ci.

Currently Selected:

ATÜNNAK 30: CBC

Highlight

Copy