ATÜNNAK 29

Laban Ah Im Ah Jakob Gawk Ci

1Jakob cu hteit gäk gäk ne hnilaw lam khaw hmun ah gawk lawk ci. 2Ani naw ang ghit ah tuishawk tumat cu laima ah hmuk ci. A cun ah pei ah htawme mak thum ng’baw ci gui. Htawme gui cu a cun ung tui ami tu gui ciah kyak ci. Tui shawk ah m’kawt pei ah lungnu om ci. 3Htawme gui tui ami tu law vai ung htawshäm gui naw, cun ah lungnu cu m’hlat u neta, tui ami tu yawp ung a cun ung m’shän ba ci, ci gui.

4Jakob naw htawshäm gui am, “Teihpüi gui aw, nangmi hawi ka gui ang?” cine ng’shi gui ci.

Ngami naw, “Keimi Haron ah ka nei” cik ci gui.

5Ani naw, “Nahor ah hta Laban nami hmat ne ang?” cine ng’shi gui ci.

Ngami naw, “Ä, kami hmat ci nei” cik ci gui.

6Ani naw, “Ani cu gai naw?” cine ng’shi gui ci.

Ngami naw, “Gai ci nei, a hta hnumi Rachelah cu htawme gui hoi ne lawk ci nei” cik ci gui.

7Jakob naw, “Khaw dei yah aih ci, htawme chum nak vai kä khin phak ci, htawme gui cu tui tu gui neta, chah ba gui cang vä” cik ci.

8Ngami naw, “Lungnu cu m’hlat neta htawme cu tui tu ah kyasei, htawshäm gui avan kä ami gawk law pha ung a i kä ka mi bi thei khai nei” cik ci gui.

9Jakob naw ang thu püi gui yah ung Rebekka cu htawme gui hoi ne gawk lawk ci. 10Jakob naw apu Laban ah htawme gui hoi ne lawk ciah Rachelah cu hmu neta, tuishawk ah dawng ne, lungnu m’hlat ne, htawme gui cu tui tu gui ci. 11Cun kawn ah Rachelah cu ng’ui neta yei aih ne kyap ci. 12Ani naw, “Kei cu napa ah na ng’khaw chang, Rebekka ah na hta nei” cik ci.

Cun cu Rebekka naw dawng ba ne apa am m’thein ba ci; 13Apa naw atu Jakob ah mawng ng’ya neta, ana dou khai ah dawng ne, ana kyawp ne, ng’ui neta a im ah hteh püi ci. Jakob naw Laban am a mawng avan cu m’thein tu khäta, 14Laban naw, “Nang cu akcang ah kasi, kasa ah na kyak ci nei” cik ci. Jakob cu cha ät lung ne om law tuk ci.

Jakob Cu Rachela la Leah A Gah Vai Ah Ng’Hlawh Ci

15Laban naw Jakob am, “Nang cu ka tu ah na kyak ci kyasei, a lä ah a i kä na bik khai. Na ng’cheng hlü cu na pyen vai nei” cine pyen nak ci. 16Laban ung a hta hnumi hnih om ci; ang vaipi cu Leah ah kyak ci, a hmaw ba cu Rachelah ah kyak ci.

17Leah cu a mik kyom ci, Rachela cu a gup ni ne kyom ci.

18Jakob naw Rachelah cu m’hni neta, Laban am, “Rachela na na chu nak sak vai ung nang ah bi cu khaw kum chih ung ka bik khai nei” cik ci.

19Laban naw, “A hei am pek tu ak dam ah ta, nang am ning pek cu bä khai nei, kei awn a täng ah om ä” cik ci. 20Jakob cu Rachelah a gah vai ah kum chih ung ng’hlawh ne bik ci. Cun ung phi Rachelah cu m’hni ci kya neta hnüüp api hta ah ngai ci.

21Jakob naw Laban am, “A khin gawk lawk ci, na hta hnumi cu ka ng’khap püi khai nei” cik ci. 22Cun ah kyasei Laban naw ng’pui ng’khah nak bi pe ne chang akda khü tuk ci. 23Cun ung phi cun ah mü ung Rachelah ah hnün ung Leah cu tüi sei, Jakob naw chu nak ci. 24(Laban naw Leah ah a paw vai ah changshäm hnumi hta Zilapah cu pek ci.) 25A ngawi ung khawngawi hta ah kya khäta ani cu Leah ah kyak ciah Jakob naw hmat ci. Ani cu Laban ah hteit neta, “A i hawkcha ah na bi ang? Kei cu Rachelah vah ka hlawh ci, a i ah kyasei na na m’hleei ang?” cik ci.

26Laban naw, “Ang vaipi kä ceimah pha sei, a hmaw pi a ceimah cu thungyo ah kä kyak ci nei. 27Ng’chungla nak bi kawn ah khaw hnüüp chih ngai cang ä, cun kawn ah Rachelah mä ka ning pek khai, ani ah phäh ah mä khaw kum chih bi na bi ba vai” pyen nak ci.

28Jakob naw yum sei a chumah nak hnüüp chih lung khäta Laban naw Rachelah cu pe sei chu nak ci. 29(Laban naw Rachelah ah paw vai ah a changshäm Bilahah cu pek ci.) 30Jakob naw Rachelah cun phi chu nak ci, Leah ah ta m’hni tuba ci. Cun kawn ah ani cu khaw kum chih ung Laban ah bii bi ba ci.

Jakob Ah Hta Gui

31Leah cu acei naw kä a m’hni tu cu Bawipa naw hmat neta, a hta vai pek ci, Rachelah cu kä hta ci. 32Leah cu kämah ne pami hta ah hta lawk ci. Ani naw, “Bawipa naw ka yaica cu hmat ci, tuhbäi läi ka cei naw na m’hni khai nei” ci neta a hta ah ming cu Reuben ah sui ci. 33Ani cu kämah ba ne pami hta ah hta ba mä neta, “Ka cei naw kä a na m’hni tu hmat neta Bawipa naw ana pek nei” ci neta a ming cu Simeon ah sui ci. 34Ani cu kämah ba ne hta ba mä neta, “Pami thum ah ka hta pyi ci kyasei, tuhbäi ka cei naw na om püi khai nei” ci neta a ming cu Levi ah sui ci. 35Cun kawn ah kämah ba ne hta ba mä neta, “Tuhbäi Bawipa ka m’hlüngtai ci nei” ci neta a ming cu Judah ah sui ci. Cun kawn ah kä hta ba ci.

Currently Selected:

ATÜNNAK 29: CBC

Highlight

Copy