Lucuotuv 20
20
Masidonia Hne Grik Ruo Luo Paul A Tlaw
1Hnaahnawna a chuo khu taata Paul ta zangtuv tie kha ku yite thaazuo pi yite bie aa chang siy khu taayita Masidonia luo a si. 2Capa ruo chung ca cahraw te zangtuv tie kha thaazuo a hluvsa a pi khu taayita Grik ruo luo kha pha te, 3capa lieca thla thung chung a aw. Siria luo kha tiypalaw ta a si'a nang tli pata Judah ming ta ama raw nakawta Masidonia luo kaa riypata bie aa chi pakhaa. 4Berea khy ming Pirhas saacapaapa Sopater, Thesalonika ming Aristarkas hne Sekanda, Derbe khy ming Gaius, hne Asia ruo taata Timote, Tikhikas hne Trofimas zaw ta ama hne khata ama tlaw ra. 5Iema kha silu yite Troas khy taata malie ama za huo. 6Cuorasala kiema ca Thiynung Phuv lipa Viechuo pyi khu taata Filipi taakhata tiypalaw ta ma si. Ning pangaa khu taata Troas khy lie kha va pha yi pate capa lieca ning sariy ma aw.
Paul Ta Troas Luo A Hnangcawce Ta A Tlawnapa
7Zaakha chunglie ningtaapa ning, Abyipa zuosa a hraw riypata maa taw pata, Paul ta iema kha bie a rue yite, a mawluopa ca sile aa ting nakawkhata zuocang te ta a bieri kha ama pazue. 8Maa pungnapa a cung duo lieca myi-ing a hluvpuv ama vuo. 9Zutikhas ama tapa satlie pakha ca thlaluo-aw lie kha a tu te Paul ta a syipuv ta bie a ripazue nguoluo ning kha thuvhunglung khata a hmung nakawta duothungna taakhata alyi luo tla te a thiy pata amaa haa. 10Cuorasala Paul ca cung te, a bungchiy te a paw khu taata, “Nama thlaa zang kha se, a hring thluo,” a ta yi. 11Cakhutaata Paul ca a cung duo luo kha kya kie te, viechuo kha chechi te ama ning khu taata, iema hne khata, khydyina te bie a rue yite aa thale. 12Satliepapaa ca a hring pata ing luo cakuo khyi yite ama hnaa a nguosa.
Troas Taata Miletas Te
13Kiema ca tiypalaw ta Assos luo kha silu pate Paul kha kupaa riypata maa ting, tahematapakieca ama ca tluo luota si te kupaa riypata malie a chang ciepa ta a cuo. 14Assos lie kha maa taw taata tiypalaw luo ca kie ra te Mitilene luo kha ma si. 15Ama taacata si pate a mawluopa ta Khios a riechuo luo kha ma chiy. A hezuoningpa ta Samos luo kha chiy pate, a khetuningpa ta Miletas luo kha ma chiy. 16Paul ta Asia ruo chunglie cuo pachuo sa li riypata Efesa kha law pata si aa ting. Tahematapakieca, a cuo khu kieca, Pentekos ning kha Jerusalem lie awpa a khing.
Paul Ta Efesa Khrihsaa Uvthyi Tie'a Lie Bie A Ri
17Paul ta Melitas taakhata Efesa Khrihsaa uvthyi tie kha amaa vya taw riypata bie a taalu yi. 18Amaa vya taw tiyta, iema kha, “Asia lie i phyi i pathla baataata ata tepa hingta nama hrawlie tuokhaatama i tu i daa tapa kha ina pachang ungciy. 19Rawcanawna'a nata mingthliy hneta Abyipa re kha hrie ang te, Judah ming ina rawna taayita a vawpa ruvnaana kha i ang law. 20Ingkha hnang ingkha ta cuose, zaapuv ta cuose ica pacuv ning yi hne thuophaabie i ukhyina lie kha nama cuota phana a cuopa ca suokha hmuo i nguo siypa aw vyi. 21Judah ming nama cuozaw, Grik ming nama cuozaw Khazing'a luo kha a ngiepachiy pata Abyipa Zingsuv nama zang riypa kha ica chang yi. 22Ata hing ca Thlaapa luochiyna haata khaapama i taw aa tapa kha pachang li pata Jerusalem luo i sile ningta a cuo. 23I pachangpa ca, Thlaapa Pathe ta na chang te, khy ting taata thawtlana hne hrisaathieruena ta ina huo tapa khata a cuo. 24Cuorasala Abyipa Zingsuv'a taata i hmungpa, Khazing vihnyina kaw thuophaabie phu riypa re hing i patlung pata a cuo kieca i hringna hing ca i cuota khaapatahmuo ri va ang.
25Ata hing ca nama hrawlie ta sibungsithaw ang te Khazing pena thuophaa ica changpa yi niema ahungtahmuo i hmie na hmung pakhaa'a va tli ungciy tapa kha i pachang. 26Cacuonakawta ata ning ta niema'a lie a siesa pata ica changpa yi ca, ahung thiyse kawlie tahmuo cuo sala kama ca i pathe, 27tahematapakieca Khazing ta a tingpa kha nguo siy li pata niema'a lie ica chang diy karuv yi. 28Niema hne niema kha a mangchiy ungla Thlaapa Pathe ta mangchiy riypata aca pipa yi tuvrung zaw kha mangchiy tie ung. Khazing ta#20:28 Hluo vie caa-uv lieca Abyipa ta a ta. saacapaa thiyse ta a calyipa a khrihsaabuv zaw kha mangchiy tie ung. 29I si khu taahingta a hruosapa cahnie zaw kha niema hraw luo a vaw'a yite, tuvrung kha ca pangaa'a vayi tapa i pachang. 30Niema phuv chung lalaapa taata cawsaa chekha ca zangtuv tie ta iema hnang ama ziy the riypata biehmisipa ri li pata ama hang aa. 31Cacuonakawta a raaring ungla, kung thung chung bangkhuo, chung hne zuo hne a pahy li pata mingthliy hneta ica za changpa yi kha maw kha ung.
32Ata hing ca niema kha Khazing'a luo na ica pi yi. Cakhutaata niema kha ca pakiesathaw'a yite a pathe sapa tie hraw lieta ru caa pipa yi a vihnyina thuophaabie luo kha ica pi tli yi. 33Ahung siyy, ahung ngu hne ahung cawsie hmuota hietlie buo vayi ang. 34Kama hne kama cuose, i viesaa zaw cuose i kuvta tah i ringpa yi kha niema hrahring na a pachang ungciy. 35Hinghaahingta temaa pata rehriena taahingta na a ruvnaapa tie maa bya aa tapa kha i tuepa bangkhuo taata ica pahmung sa tli yi. Abyi Zingsuv hrahring ta, “Hmungna luo laata pina luo na thluechiy a aw vie,” a tapa kha maw kha ung.
36Capa bie ca a patlung taata ama pakhuv pane yite thlaa ama chuo. 37Ama caapuopa khata ama kha cakuv yite ama pahnuo. 38Na hmung pakhaa va tli'a ungciy, a ta nakaw yi khata ama ngie a chi vie pacuo pata a cuo. Cakhutaa cata tiypalaw te kha ama va pathlie.
Currently Selected:
Lucuotuv 20: LNT1
Highlight
Share
Copy

Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.