Lucuotuv 21

Paul Jerusalem Luo A Tlaw

1Iema hne maa che khu taata a dangsa pata si pate Kos luo kha ma chiy; a mawluopa ta Rhodes luo kha chiy pate cakhutaata Patara#21:1 Hluo vie caa-uv lieca Patara hne Myra a ta. luo ma chiy. 2Fonisia luo a si'a nangpa tiypalaw kha hmung pate capa palaw cata ma va caluo. 3Saipras aa luo nate chiy pate ma cavyi luo kuo ta ma thuse khu taata Siria luo chiy pate Tair lie kha ma cung, tahematapakieca capa lieca ma tiypalaw kha a hmang a pachung. 4Zangtuv tie kha a taw yi pate capa lieca ning sariy ma aw. Thlaapa ta a changna haayita Paul kha Jerusalem luo si li riypata ama thlu. 5Cuorasala iema'a lie ma awnapa cuo ca chuo te, thuse yi pate maa tha pakhaa. Ama nung ama saa yalya hne khata khy le luo te malie ama vya pathlie. Capa riyliy kie lieca ma pakhuv pane pate, iema hne cata thlaa chuo pakhaw pate 6pakha hne pakha kha, nama tluo pata, maa ta. Cakhutaata tiypalaw cung luo kha kie pate iema ca ama kaa.

7Tair taacata si pate Ptolemai luo kha ma chiy; zangtuv tie#21:7 Gk Uvnu zaw kha bie a chang yi pate iema'a lieca ning kha ma aw. 8A mawluopa ca a tha pakhaa pate Sisaria ma chiy. Uvthyi pasariy hrawlie pakha a cuopa, thuophaabie a rituv Filip ing lie kha ma tlung. 9Navaa a hnyi lipa sacanung#21:9 Gk Sacanung papaliy, lesaapathepa papaliy hnyi te iema ca profet-biephu ri khuna lasaw a hmungpa ta ama cuo. 10Capa lieca ning hluvpuv ma aw khu taata, Agabas ama tapa profet pakha Judea taata a za chiy. 11Kiema'a luo kha a vaw te, Paul tesaw kha la te a phyi hne a kuv kha aa ciy khu taata, “Thlaapa Pathe na hinghaahingta naa chang, ‘Jerusalem lie a awpa Judah ming ta hingpa tesaw a hnyipapaa hing hinghaahingta ciy'a yite Jentail ming kuv luo ama pi aa,’” a ta. 12Capa bie ca ma thyi tiyta, kiema hne capa lie a awpa cawsaa zaw cata Jerusalem luo si li riypata ma thlu. 13Cakhutaa, Paul ta, “Khaapama nama tue, caa ung cate i pathiy i palung ina pa-ichi ungciy? Ina ciypakang riypa dyi yi hing cuo li pata Zingsuv Khrih cuota Jerusalem lie thiy riypata hmuo muo i ting ta,” a ta yi. 14Tuokhaatahmuo ripasa the a aw li nakawta, “Khazing khingna haa cuo thluo se,” dyi tapa te a dieta tah ma aw.

15Cakhutaacata a pachie pate Jerusalem luo ca ma si. 16Sisaria khy taata a ziytuv chekha kha kiema hneta kya si ra yite, iema cata a hluo baataata a ziytuv zaa cuopa, Saipraspa Mnason ing luo kha malie chiytha yite capa lieca ma aw.

Paul Ta Jeim A Parie

17Jerusalem luo ma chiy tiyta, uvnu zaw ta palung tluosa pata malie ama cuhluo. 18A mawluopa ta Paul hne kiema zaw bangkhuo ca Jeim a taw riypata vaa pate Khrihsaa uvthyi tie bangkhuo kha ama aw ra. 19Iema kha bie maa chang khu taayita, Paul ta ama rehrienapa taata Jentail ming hrawlie Khazing hmangtuepa bangkhuo kha suokha hnang suokha ta a chang yi. 20Ca bie ca ama thyi tiyta Khazing kha ama pathuosa. Cakhutaata ama kha, “Uvnu Paul, Judah ming hrawlie hing zangtuv thaw khazaa aw yite ma phungbie khatluv ta amaa daakhyi tapa hing na pachang. 21Jentail ming hrawlie a awpa Judah ming kha, Moses phungbie kha thuse riypa hne ama saata zaw kha vangdaw te li riypa hne Judah phung kha ziy li riypatana a pacuv yi, tapata iema ta na kaw kha ama thyi tli. 22Cacuonakawta tuokhaata tuepa tama a pha aa? Hingpa luo na vya chiypa hing ama pachang ngiethie hyi aa. 23Cacuonakawta maca changpa hing tue tie. Kiema'a lie hing biekuona a tuepa cawsaa papaliy ama aw. 24Iema hing ziy yi la a pathesana ama tuepa kha va tue ra la ama suo a nguna muo kha va liepa tie yi. Cata a cuo kieca na kaw ama thyipa hing suokha hmuo cuo vyi tapa hne nama hrahring phungbie na ziypa kha ama pachang aa. 25Cuorasala zangtuv a vya cuopa Jentail ming tuv kha ca kiema ta, kuvtuezuv lie hriykhung amaa rinapa sa ning li riypa, thiy ning li riypa, a rue cadiepa ta ama thiepa#21:25 Hluo vie caa-uv lieca a rue cadie pata ama thiepa tapa hing aw vyi. saa bangkhuo ce li riypa, hne aparuvsuena tue li riypa tapa ma bie chinapa caa kha ma paphya tli yi, ama ta. 26A mawluopa ta Paul ca cawsaa tie kha a chiy yite a pathena a tue. Iema hne cata biena-ing luo kha a ngie te, khatiy tama a pathesana a chuo aa tapa hne pakha cyicuo cuota hriykhung a rina ama tue riypa cuo zaw kha a chang yi.

Biena-ing Chung Lie Paul Ama Patuv

27A ningsariynapa a chuo'a nangpa khata, biena-ing chunglie Paul a awpa a hmungpa, Asia taata a vawpa Judah ming ta cawsaazaapuv kha ama pasu. Ama kha patuv yite, 28“Israel ming zaw, malie a bya tie ung! Hingpapaa hingna ruo ting ta sile te cawsaa bangkhuo kha ma cawsaa a duna, ma phungbie a duna hne hingpa hmang hrahring hing a du pata a pacuvle yi. Cadyi cuo li pata Grik ming kha biena-ing chung luo a ngiekhyi yite hing hmang pathepa hing a papya a palyi,” ta yite ama khi. 29Tahematapakieca Efesapa Trofimas hne khata khy chunglie za hmung yite, Paul na biena-ing luo a ngiekhyi tapata ama rue nakawtana a cuo. 30Khy chunglie ca hnaahnawna ta a bi. Cawsaa ca a vya ruo yite, Paul kha biena-ing lie patuv yite ale luo amaa dale khu taata biena ing chiypakaa kha ama hre. 31Ama kha thie amaa nang nguoluo pata Jerusalem khychung yalya tana hnaahnawna a aw tapa bie kha Rom rieka uvtuv byi'a luo a chiy. 32Sungkhabala ta riebyi chekha hne rieka tie kha a chiy yite iema'a luo ca amaa ruo. Riebyipa hne rieka tie kha ama hmung taata Paul ama tuvpa ca ama taw. 33Riebyipa ta a vaw te Paul kha a patuv khu taata thaabuoliriy suohning ta cakhiy riypata bie pi yite; ama kha a ahung ta cuote ma khaapama a za tue taw tapa kha dya a hiehriy yi. 34Cawsaazaapuv hraw taata a che ta phangkha ta ama khi, a hrangpa a che ta a phanghrang ta ama khi patlaw nakawta riebyipa ca a cuo tangepa kha pachang khu li pata Paul kha riekate luo a ngiekhyi riypata naw a pi yi. 35Hlyidaw te ama chiykhyipa kha taca cawsaazaapuv kha ama chaa tuv nakawta rieka tie ta a caba ta ama cabale. 36A vya nuosuelepa cawsaazaapuv cata, “Thie tie ung!” tapata ama khi.

Paul Ta A Sue Lina Kaw A ri

37Riekate luo ama vya sikhyi'a nangpa khata, Paul ta riebyipa kha, “Bie suokha ca chang khu the'a ang ma?” a ta. Riebyipa ta, “Grik ryi ma na the? 38Cacuokie, ma hnangluota ningta cehre a cyipa cawsaa thawpaliy ruochung luo sikhyi te rie a thupa Iziptpapaa kha taca cuo vaciy nuo? a ta. 39Paul ta, “Kama ca Silisia ruo Tarsas khy, khypuv ming pathuopa lie a puvpa Judah ming tana i cuo. Paa na ica kie, cawsaazaapuv'a lie hing bie napa ri sa thi tie,” a ta. 40Riebyipa ta bie rina naw a pi pahne, Paul ca hlyidaw cunglie kha a daa te, cawsaazaapuv'a luo kha a kuv pazuu te a padie sa yi. Ama die diy khu taata iema'a lie kha Hebru ryi ta bie a ri.

Currently Selected:

Lucuotuv 21: LNT1

Highlight

Copy