SOFONÍAS 2
2
Ladolla llactacunataca llaquichingami
1Llactapi causaj na pingaj gentecunalla, tandanajushpa aliguta yarichiyari. 2Llaquichishami nishcapash nara pactajpillata, punllapash jupashna nara yalijpillata, ninanda fiñarishcapash cangunapaj jahuapi nara shamujpillata, Mandaj Dios ninanda fiñarina punllapash cangunapaj jahuapi nara shamujpillata, aliguta yarichiyari. 3Cai pachapi causanajuj ali shungu tucui runacuna, pai mandashcata pactachijcuna Mandaj Diosta mascaichiyari. Imatapash cashcatapacha ruranatapash, na jariyashpa causanatapash mascaichiyari. Shina mascajpica, Mandaj Dios fiñarishpa llaquichijui punllapica huacaichi tucunguichipashchari.
4Gaza shuti puebloca, jichui tucushcami canga. Ascalón shuti pueblopashmi llaquinayaita tucuchi tucunga. Asdod shuti pueblomandaca, punllami shuhuashpa apanajunga. Ecrón shuti pueblopash, sapimanda llujchinshnami llujchi tucunga. 5Mama cucha manñapi causanajuj cereteocunaca, ¡aij imachari tucunga! Filisteocuna causanajuj Canaán llactalla, Mandaj Diosca cangunata fiñashpami, cai shimicunata cashna nirca: “Chaipi causachunga, shujllatapash na saquishpami tucuchisha. 6Chaimandami, mama cucha manñapica, michina pambacuna tucunga. Llamacunapaj corralcunatami, chaipica shayachinga. 7Chai alpaca, Judá shuti runapaj miraimanda huaquin puchushcacunapajmi canga. Paicunami chaipica michinajunga. Ascalón shuti pueblopi tiaj huasicunapimi, tutaca puñunajunga. Paicunata Mandaj Taita Dios ricugrishpami, prezu apai tucushcacunataca cacharichinga.
8Moabitacuna, amonitacuna rimashpa pingaichinajujtaca uyarcanimi. Chashna rimashpami, ñuca agllashcacuna alicachi tucushcataca huaglichinajurca. Paicunaca, israelcunapaj llactata quichushpami, jariyashpa causanajurca. 9Shinamandami tucuita Mandaj, israelcunapaj Taita Dios ñucaca causajunipachami nini. Moabitacunaca, Sodoma shuti puebloshnami tucuringa. Amonitacunaca, Gomorra shuti puebloshnami tucuringa. Chaipica, tsinicunalla jundashca pamba, shinallata cachita llujchina pushtucunallami tucunga. Chashnami causaita causaicaman, llaquinayaita tucuchi tucunajunga. Ñuca agllashca puramanda huaquin puchushcacunami, paicuna ima charishcacunataca apanajunga. Paicunallatami alpacunatapash japinajunga” ninmi.
10Paicunallata jariyashpa jatun tucushcamanda, tucuita Mandaj Diospaj agllashcacunata rimashpa pingaichishpa jariyashcamandami, chai llaquicunaca japinga. 11Mandaj Diosca, paicunahuanga manllanayaitami fiñaringa. Chaimandami, cai pachapi tiaj dioscunataca, tucuillata tucuchinga. Paitaca, tucui llactacunapi causajcunami, paicuna maipi causashcapillata cungurinajunga. 12“Etiopía shuti llactapi causajcuna, cangunapash ñuca espadahuanmi huañuchi tucunguichi” ninmi. 13Diosca, paipaj maquita jahua ladoman chutashpami, Asiria llactataca tucuchinga. Nínive shuti pueblotapash llaquinayaita tucuchishpami, jichushca pambatashna chaquichishpa saquinga. 14Chaipica, huasipi charina animalcunapaj corraltami ruranga. Chaipica, tucui sacha animalcunapashmi causanga. Pelícano nishca, erizo nishca animalcunapash, huasi pilar jahuacunapimi puñunajunga, huasi ventanacunapimi huacanajunga. Cedro caspicunahuan quilpashpa rurashcacunapash ricurijujpimi, pungucunapash llaquinayaita urmashpa tucuringa. 15Ricui, chai pueblopi causajcunami imatapash na manllashpa, cushijushpa causanajurca. Paicunapaj shungupica: “Ñucanchillami, cashna jatunguna canchi” yashpami causanajurca. ¡Chashnamari llaquinayaita tucuchi tucushca, sacha animalcuna causanallami tucushca! Shina tucushcamandami, maijambash chai ladota yalijcunaca, asishpa maquita chafsirinajunga.
Currently Selected:
SOFONÍAS 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.