SOFONÍAS 1
1
Mandaj Dios ninanda fiñarishpa llaquichina punllami chayamunga
1Mandaj Diosca, cai shimicunatami, Cusi shuti runapaj churi Sofonías shuti runaguman villarca. Cusi shuti runaca, Gedalías shuti runapaj churimi carca. Gedalías runaca, Amarías shuti runapaj churimi carca. Amarías shuti runaca, Ezequías runapaj churimi carca. Amón shuti runapaj churi Josías runa, Judá llactata mandajui huatacunapimi villarca.
2Mandaj Diosca, cashnami nin: “Cai pachapi tucui imalla tiajcunataca, tucuillatami tucuchisha. 3Gentecunata, animalcunatapashmi tucuchisha. Jahuata rij alasyu animalcunatapash, mama cuchapi causaj pijicunatapashmi tucuchisha. Diosta na manllajcunatapash chingachishami. Cai pachapi causaj gentecunatapash, tucuillatami tucuchisha” ninmi Mandaj Diosca.
4“Judá llactapi causajcunata, Jerusalenbi tucui causajcunataca, ñuca maquita chutashpami llaquichisha. Baal shuti diosmanda imalla puchushcacunatapash, yanga dioscunata servijcunandi, curacunandimi, caimandaca tucuillata anchuchisha. 5Huasi jahuacunapi cungurishpa, jahua pachapi tiajcunata mañajcunatapash, Mandaj Diospaj shutipi, Milcom shuti diospaj shutipi juramentushpa cungurijcunatapashmi tucuchisha. 6Mandaj Diosta catijushcata saquishpa anchurijcunatapash, Mandaj Diosta na mascashpa, imata cashpapash paita na tapujcunatapashmi tucuchisha” ninmi.
7Mandaj Jatun Diospaj ñaupajpica upallaichi. Mandaj Dios shamuna punllami, ña pactamujun. Mandaj Diosca, pai huañuchishcata alichishpallami micungapaj shamuchunga, ña cayashca.
8“Mandaj Dios ñuca huañuchijui punllacunapica, mandajcunata, jatun mandajpaj churicunata, shuj llactamanda churajunata churajui tucui gentecunatapashmi llaquichisha. 9Shinallata chai punllapillatami, pungu jahuata fahuajcunata, shuhuashpa, umachishpa, amocunapaj huasicunapi jundachijcunatapash llaquichisha.
10Mandaj Dios ñucami, cashnatapash nini: Chai punllapica, Pijihuan yaicuna pungumandaca, caparinajujmi uyaringa. Caishuj cati pungumandaca, huacashpa caparinajujmi uyaringa. Lomacunamandaca, ninanda manllarishpa caparinajujmi uyaringa. 11Mactes shuti pambapi causajcunalla, caparishpa huacaichiyari. Chaipi randishpa jatushpa causaj tucui gentecunapash tucuchi tucushcami. Culquita apamujcunapash, tucuchi tucushcami.
12Chai punllacunapica, cashnami tucunga: Jerusalenbi causajcuna imatalla rurashcataca, michata japichishpami aligutapacha ricusha. Shina rurashpami, sangu asentarishca vinoshna imatapash na manllashpa causanajuj runacunataca llaquichisha. Paicunapaj shungupica, cashnami ninajunga: ‘Mandaj Diosca ima alitapash, ima nalitapash na rurangachu’ ninajungami. 13Chaimandami, paicuna ima charishcacunataca shuhuashpa apanajunga. Paicunapaj huasicunapash, llaquinayaitami tucuchi tucunga. Huasicunata shayachishpapash, chaipica na causanajungachu. Uvasta tarpushpapash, chai uvas chagracunamanda vinotaca na ufianajungachu” ninmi.
14Mandaj Dios shamuna jatun punllami ña chayamujun, ñallapachami chayamunga. Mandaj Dios llaquichijui punllapica, jatun llaqui, huacai punllami canga. Chai punllapica, ninan shinlli runapash llaquinayaitami caparinga. 15Chai punllapica, ninanda fiñarishpa llaquichina punllami canga. Ninan llaqui, imata ruraitapash na ushana punllami canga. Ninanda caparina, llaquinayaita tucuchi tucuna punllami canga. Yana yana tuta, amsa punllami canga. Fuyupash quilpashca, manllanayai amsa punllami canga. 16Chai punllapica, trompetata huacachishpami, pueblo muyundi jatun pirca jahuacunamandapash, jatun torre jahuacunamandapash caparinajunga.
17“Mandaj Dios ñucata fiñashpa, juchata rurashcamandami runacunataca ninandapacha llaquichisha. Chaimandami paicunaca, ñausashna maitapash purinajunga. Paicunapaj yahuarpash, ñutu alpashnami taliringa. Paicunapaj cuerpopash, huanushnami shitai tucunga” ninmi.
18Mandaj Dios ninanda fiñarishpa llaquichijui punllapica, paicunapaj culquipash, oropash, na quishpichi ushangachu. Paipajlla cachun munashpa nina japirinshna fiñarishcahuanmi, tucui cai pachaca tucuringa. Cai pachapi tucui causajcunaca, ñapash tucuchi tucungapachami.
Currently Selected:
SOFONÍAS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.