ZACARÍAS 6
6
Chuscu carretacunatami villajun
1Cutinllata vichai ricushpaca, ishcai urcu chaupimanda chuscu carretacuna ñapash llujshimujtami ricurcani. Chai urcucunaca, bronce urcucunami carca. 2Punda carretataca, puca caballocunami aisanajurca. Jipa carretataca, yana caballocunami aisanajurca. 3Ishcaipaj jipa carretataca, yuraj caballocunami aisanajurca. Quimsapaj jipa carretataca, ninan shinlli, pintado caballocunami aisanajurca.
4Chaita ricushpami, ñucahuan parlajuj angeltaca: “Ñucata mandajlla, ¿caica imata capan?” nishpa tapurcani. 5Shina tapujpimi chai angelca, cashna nishpa tigrachihuarca: “Cai pachata mandaj Jatun Diospaj ñaupajpi ricurishca jipa llujshimuj, jahua pacha chuscundi ladomanda huairami” nircami. 6Yana caballocunaca, jahua lado llactamanmi carretata aisashpa llujshinajurca. Yuraj caballocunaca, chai carretata catishpami llujshinajurca. Pintado caballocunaca, urai lado llactamanmi llujshinajurca.
7Puca caballocuna llujshishpaca, cai pachata muyugringapajmi ninanda munanajurca. Chaimandami paicunataca: “Cai pachata muyugrichi” nijpi paicunaca, cai pachata muyugrirca.
8Chai jipami, ñucata cayashpa cashna nihuarca: “Ricui, jahua lado llactaman rijcunaca, ñuca Espirituta chaipi samachishpami shamunajurca” nihuarcami.
Jatun mandaj shamunata ricuchij coronatami, Josueman churachishca
9Mandaj Diosca, cai shimicunatami cashna nishpa villahuarca: 10“Prezu apai tucushca puramanda Heldai, Tobías, Jedaías shuti runacunata pushashpa ringui. Paicunami, Babilonia llactamanda tigramurca. Shina rishpaca, Sofonías shuti runapaj churi Josías shuti runapaj huasiman chai punllallata ringui. 11Chaiman chayashpaca culquita, orota japishpa, coronacunata rurangui. Chaitaca, Josadac shuti runapaj churi, curacunata mandaj Josueman churachingui. 12Chai jipaca, cashna ningui: Tucuita Mandaj Diosca, cashnami nin: ‘Ricui, Retoño shuti runaca, ñallami shamunga. Paica, paipaj sapimandallata viñashpami, Mandaj Diospaj huasitapash shayachinga. 13Paimi, Mandaj Diospaj huasitaca shayachinga. Paica, ninanda alicachi tucushcami canga. Paica, pai mandangapaj tiarinapi tiarishpami, tucuicunata mandajunga. Paipaj ladopica, shuj curami shayajunga. Paicunaca, aliguta casilla causangapajmi ishcandillata aliguta yarishpa parlanajunga. 14Chaishuj coronacunataca Helem, Tobías, Jedaías shuti runacunapash, shinallata Sofoniaspaj churi Hen shuti runapash yarinajuchunmi, Mandaj Diospaj huasipi churarcangui’ ninmi ningui” nishpami villahuarca.
15Shinallata carucunapi causajcunapash shamushpami, Mandaj Diospaj huasita shayachishpa ayudanajunga. Chaita ricushpami, Mandaj Diosllata cangunapajman ñucata cachamushcata yachanguichi. Cangunata Mandaj Taita Dios rimashca shimita uyashpa cazujpimi, chashna tucunga.
Currently Selected:
ZACARÍAS 6: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
