CANTARES 6

Cusandi, huarmindimi randimanda juyarinajushca

1Tucui huarmicunamanda yali juyailla huarmigulla. Cambaj juyashcaguca, ¿maimanda rishca? Cambaj juyashcaguca, ¿maimanda saquishpa rircayari? Paitaca, ¿canhuan mascagrishunllu? 2Ñuca juyashcaguca, paipaj huertamanmi urai rirca. Mishquillagu ashnajuj muyucunata trillana pambacunamanmi rirca. Huertacunapi michingapajmi rirca. Lirio sisacunata tandachingapajmi rirca. 3Ñucaca, ñuca juyashcagupajmi cani. Ñuca juyashcaguca, ñucapajmi capan. Paica, lirio sisa chaupicunapimi michin. 4Ñuca cumba huarmigulla, canga Tirsa shuti puebloshna juyaillagumi cangui, Jerusalenshna munanayaimi cangui. Macanajushpa mishaj soldadocuna llujshimunshnamari cangui. 5Ama ricujuhuaillachu. Ñucataca, chai ñavicunami ricujushpallata mishahuarca. Cambaj ajchapash, Galaad llacta lomacunapi sirinajuj ashtaca chivocunashnami. 6Cambaj quirucunaca, ashtaca llamacuna, ishcaita huachashca huahuacunandi, armachina pushtumanda vichai llujshinajunshnami ricurin. Paicuna purapica, huachanata na yachaj llamaca, shujllapash na tianllu. 7Cambaj ñavi ladocunapash, telahuan quilparishca ucupica, chaupirishca granadillagushnami ricurin. 8Sucta chunga jatun mandaj huarmicunami tian. Pusaj chunga caishuj huarmicunami tian. Jarihuan nara tacarishca cuitsacunacarin, na cuentai ushanallami tian. 9Ashtahuangarin ima pandatapash na ruraj, ñuca palomaguca, shujllami tian. Paipaj mamapaca paillamari. Paita unguj mamapaca, ashtahuan juyashcamari cashca. Jarihuan nara tacarishca shuj cuitsacuna paita ricushpaca: “Ninandami cushijushca cangui” ninajurcami. Jatun mandaj huarmicunapash, caishuj huarmicunapash, paitaca alicachinajurcami. 10Tutamanda punllayamuj ricurinshna, juyailla lunashna, indi punchapambashna, macanajushpa mishaj soldadocunashna llujshimuj cai huarmica, ¿maijandayari? 11Tucti yuracunata tarpushca huertamanmi urai rircani. Pugru pambapi imalla fucushcacunata ricungapajmi rircani. Uvascunaca, ¿ñachu viñajun imashi? Granadillacunaca, ¿ñachu sisanajun imashi? yashpa ricungapajmi rircani. 12Cungashcapimi ñucataca, Aminadab shuti runapaj carreta puracunapi ñuca yuyailla vitsiachihuarca. 13Sulamita nishca huarmilla, tigramuilla, tigramuilla. Candaca ricungapajmi munanchi. Tigramuilla, tigramuilla. Sulamita nishca huarmipica, ¿imatashi ricunguichi? Ishcaipi tandanajushca carpacunatashnami, ricungapaj munanchi.

Currently Selected:

CANTARES 6: QUII

Highlight

Copy