CANTARES 7
7
1¡Mandajpaj ushigulla, cambaj chaquiguca, sandaliata churajushcaguca, juyaillagumi ricurin! Cambaj cinturas muyundicunaca, imatapash juyaillagucunata ruranata yachaj runa rurashcashna, juyaillagumi ricurin. 2Cambaj pupuca, yacuhuanlla tiajuj redondo tastagushnami. Cambaj vijsaca, mundunashca trigota, lirio sisacuna muyushcashnami. 3Cambaj ishcandi chuchucunaca, ishcai huacharishca tarugacunashnami. 4Cambaj cungaca, marfilta churashpa shayachishca torreshnami. Cambaj ñavicunaca, Hesbón pueblopi, Bat-rabim shuti pungu ladopi tiaj yacu tanquecunashnami ricujun. Cambaj singaca, Líbano shuti urcupi tiaj torre, Damasco pueblota ricujunshnami. 5Cambaj umapash, Carmelo shuti urcushnami. Cambaj uma ajchaca, jatun mandajpaj yana puca churajunata corredorcunapi huarcushcashnami. 6¡Ñucata cushichij, ñuca juyashcagulla! ¡Canga, juyailla amujllagumi cangui! 7Canga, palmera yuragushnami viñashcangui. Cambaj chuchucunataca, racimocunashnami ricurin. 8Ñucaca: “Palmera yuraman vitsiashpami, malquicunapi charirisha” nircanimi. Cambaj chuchucunataca, uvas racimoshna cachun saquilla. Cambaj shimica, manzanashna mishquillagu ashnajuchun saquilla. 9Cambaj shimica, ali vinoshnami, can ñuca juyashcagu amujlla ufiashcashnami. Vinoca, rucucunatapash rimachinllami. 10Ñucaca, ñuca juyashcapajmi cani, paica ñucahuanmi cushijuita charin. 11Shamui, ñuca juyashcagulla, pambacunaman llujshishunlla. Pueblo muyundi uchilla llactacunapi causangapaj jaculla. 12Tutamandata jatarishpa uvas pambaman jaculla. Uvaspash, granadillacunapash, ¿ñachu viñajun, ñachu granujun imashi? Jacu ricushun. Chaipimi ñuca juyaitaca, canman cusha. 13Mandrágora nishca yuracunami ashnajun. Ñucanchi huasi pungu ladopillami, mishqui shican shican tucui frutacunapash tian. Ñuca juyashcagulla, canmanmi cunan pallashca frutacunatapash, punda pallashca frutacunatapash alichircani.
Currently Selected:
CANTARES 7: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
