RUT 4
4
1Booz runaguca, puebloman yaicuna punguman rishpami, chaipi tiarirca. Chaipimi, Booz runa parlajushca paipaj familia runaca, chaita yalijushca carca. Paita ricushpami, Booz runaca: —Uyai caiman shamui, caipi tiaripai— nirca. Shina nijpimi chai runaca shamushpa, chaipi tiarirca. 2Shina tiarijpimi Booz runaguca, pueblopi mandaj chunga rucucunatapash cayashpa: —Caiman tiaripaichi— nirca. Paicuna ña tiarijpimi, 3Booz runaca paipaj familia runataca, cashna nirca: —Noemica, Moab llacta pambamanda tigramushcami. Paica, ñucanchi huauqui Elimelec charishca alpatami ashaguta jatujun. 4Shinamandami ñucaca, can yachachun villangapaj munarcani. Chaimandami, caipi tianajujcunapaj ñaupajpi, ñuca pueblopi mandaj rucucunapaj ñaupajpi, can randichun villajuni. Can randingapaj munashpaca, randilla. Imashpapash na randingapaj munashpaca, villahuilla. Ñucaca, yachangapajmi munapani. Can randinataca, pipash na randinachu. Canllami tiangui. Cambaj catica, ñucallami randi ushani— nijpimi paica: —Ñuca randipashallami— nishpa tigrachirca. 5Shina nijpimi Booz runaca, cashna nirca: —Noemipaj maquimanda alpata randijui punllallatami, moabitapura sapalla Rut huarmiguhuambash cazarana cangui. Chai alpapash, huañushca cusapaj shutipillata quedachunmi, paihuan cazarana cangui— nircami. 6Chaita uyashpami chai familia runaca, cashna nishpa tigrachirca: —Shina cajpica, na randi ushapanichu, ñuca charishcacunaca chingangami. Ñuca randinata, can randinayajpica randilla. Ñucaca, na randi ushapanichu— nircami. 7Israelcunaca, punda huatacunamandapachami ayudanamandapash, randinamandapash cashna ruranajun cashca: Imashpapash familia na randi ushashpa, caishuj familiaman cushcatapacha ricuchingapajmi, paipaj chaquipi churajushcataca llujchishpa, paipaj cumbaman cuna carca. Pai na japijushcata ricuchingapajmi, Israel llactapica chashna ruran cashca. 8Shinamandami, Booz runapaj familia runaguca: —Can randipailla— nishpa, paipaj chaquipi churajushcataca llujchishpa curca. 9Chaimandami Booz runaca, mandaj rucucunatapash, chaipi tianajuj tucui gentecunatapash cashna nijurca: —Cunanga, cangunallata ricunajunguichimi. Elimelec, Quelión, Mahlón shuti runacuna tucui imatalla charishcacunatami, Noemipaj maquimanda japipani. 10Mahlón shuti runapaj huarmi cashca, moabitapura Rut huarmigutaca, ñuca huarmi cachunmi japini. Shinallata huañushca cusapaj alpacunapash, paipaj shutipillatami quedanga. Shina rurajpimi, caipi tandanajushcacunapash, paipaj familiacunapash, huañushcapaj shutitaca na cunganajunga. Cunanga, chaitaca cangunallata uyanajupanguichimi— nijurcami. 11Shina nijpimi, mandaj rucucunahuan chai pungupi tandanajushca tucui gentecunaca, cashna ninajurca: —Chaitaca uyapanchimi. Chai huarmigu, cambaj huasiman cazarashpa yaicujpipash Mandaj Diosca, Raquel shuti, Lea shuti huarmicunatashna ayudapachun. Paicunamandami, ñucanchi israelcunaca mirai callarircanchi. Quiquimbash, Efrata nishca Belén pueblopica, alicachi tucushca, tucuipash rijsishca causachunmi munanchi. 12Cambaj huasi ucu purapash, Fares shuti runapaj huasi ucu purashna mirapachun. Imashnami Tamar huarmi, Judá shuti huahuaguta ungurca, chashnallata cai chairalla viñai huarmigumandapash huahuacunata mirachipachun— ninajurcami. 13Booz shuti runaguca, Rut shuti huarmigutami, paipaj huarmi cachun japishpa, paipi chayarca. Shinamandami Mandaj Diosca, chai huarmigu vijsayu tucushpa, shuj jari huahuaguta charichun cararca. 14Shinamandami huarmicunaca, Noemitaca cashna ninajurca: —Mandaj Diosca, alicachi tucushca cachun. Paimi, cambaj familia tiachun, cai huahuaguta carashca. Israelcunapash, paipaj shutitaca ninandami alicachinajunga. 15Paimi, cambaj shungupi cutin cushichishpa, can payayajpipash cuidashpa charinga. Canda juyaj jachungumari, cai huahuagutaca ungushca. Chai huarmiguca, cambaca canchis churicunatapash yali valishcamari— ninajurcami. 16Noemica, chai huahuaguta japishpaca, paipaj migllapimi churarca. Paimi, viñachij mama tucurca. 17Chaita ricushpami, chai ladolla causaj huarmicunaca: —Noemí mamagumanmi, shuj huahuaguta ungushca— ninajushpa, Obed shutita shutichirca. Paimi, Isaí shuti runapaj taita. Isaí runaca, Davidpaj taitami. 18Fares shuti runapaj miraicunaca, caicunami: Fares runaca, Hezrón shuti churitami charirca. 19Hezrón runaca, Ram shuti churitami charirca. Ram shuti runaca, Aminadab shuti churitami charirca. 20Aminadab runaca, Naasón shuti churitami charirca. Naasón shuti runaca, Salmón shuti churitami charirca. 21Salmón shuti runaca, Booz shuti churitami charirca. Booz runaca, Obed shuti churitami charirca. 22Obed runaca, Isaí shuti churitami charirca. Isaica, David shuti churitami charirca.
Currently Selected:
RUT 4: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.