RUT 3
3
1Shuj punllami, Rutpaj suedra Noemica, cashna nijurca: —Ñuca huahualla, can aliguta causachunga, ¿nachu canman cusaguta mascana cani? 2Booz runaca, ¿nachu ñucanchi familiapura? Canga, paita servij huarmigucunahuanmi carcangui. Ricui, paica cunan tutami, tandachishpa mundunashca paipaj cebadata huairachingapaj ringa. 3Armashpa, mishquilla ashnajuj jambiguta javirishpa, ali churajunagutapash churajushpa, trillana pambaman ringui. Ashtahuangarin pai micushpa, ufiashpa tucuchingacaman chai runagupaj ñaupajpica, amara ricuringuichu. 4Pai puñungapaj siririjpica, maipi siririjtapash aliguta ricungui. Shina ricushpaca, chaqui pundapi jatanata alsachishpa siriringapaj ringui. Can imata rurana cajpipash, paillata ningallami— nijurcami. 5Shina nijpimi, Rutca: —Imata can mandajpipash, tucuita rurapashallami— nishpa tigrachirca. 6Trillana pambaman Rut urai rishpaca, paipaj suedra imashna mandashcatami, tucuita rurarca. 7Micushpa, ufiashpa, paipaj shungupash cushilla cashpami Booz runaca, cebada mundun ladoman puñungapaj rirca. Chaipi puñujujpimi Rutca, alilla shamushpa, chaqui punda jatanata alsachishpa siririrca. 8Chaipica cashnami tucurca: Ña chaupi tuta tucujpi cuyurishpami, chaqui pundapi shuj huarmi sirijujta ñapash ricushpa manllarirca. 9Shinamandami Booz runaguca: —¿Pita cangui?— nishpa tapurca. Shina tapujpimi Rutca, cashna nishpa tigrachirca: —Canda servij Rutmi capani. Canga, ladolla familiapura cashcamanda, canda servij ñucataca, jahualla cambaj churajuna pundahuanllapash jatachihuayari— nircami. 10Shina nijpimi paica, cashna nijurca: —Ñuca huahualla, candaca Mandaj Dios bendiciapachun. Canga, chairalla viñaicunataca, imagupash illajtapash, charijtapash na mascangapaj rishpami, cambaj suedrahuanga ali rurashcangui. Shinallata chaitapash ashtahuan yali ali cajtami ricuchihuashcangui. 11Cunanga, ñuca huahualla, ama manllaichu. Cambaj ima ali canata mañajpipash, ñucaca rurashallami. Ñuca llactapi causajcunapash, candaca ali huarmigu cajtami tucuicuna yachan. 12Cunanga, na llullashpami nini. Ñucaca, cambaj familia purami cani. Shina cajpipash, ñucatapash yali ashtahuan ladolla familiami tian. 13Cunan tutaca, caipi quedailla. Caya punllayajpimi yachashun. Pai ayudasha nijpica, paihuan quedanguilla. Mandaj Diosca causajumbachami. Imashpapash pai na ayudashachu nijpica, ñucami candaca ayudasha. Cunanga, pacaringacaman samajuilla— nijurcami. 14Pacaringacaman chaqui pundapi puñushca jipaca, caishujmanda chaishujmanda pitapash nara rijsinalla amsalla cajpillatami, Rutca jatarirca. Booz runaguca: “Trillana pambaman shuj huarmi shamushcataca, pipash na yachanachu” nircami. 15Shina nishpallami, Booz runaca: —Jahualla can pillurishca baitata ricuchi— nirca. Baitata mandashpa Rut ricuchijpica, suctacaman medishpami cebadata cararca. Shina carashpa apachijpimi, paica puebloman rirca. 16Ña paipaj suedrapajman chayajpica: —¿Ñuca huahualla, ima nircata?— nishpami tapurca. Rutca, chai runagu imatalla paimanda rurashcatapash, tucuitami villarca. 17Shina villajushpallatami, cashna nirca: —‘Ama chushaj maqui cambaj suedrapajman tigrapaichu’ nishpami, suctacaman medishpa, cai cebadata carahuarca— nircami. 18Shina nijpimi Noemica, cashna nirca: —Ñuca huahualla, cunanga chai parlashcacuna aliguta alichirijta yachangacaman shuyailla. Chai runaguca, chai parlashcacuna aliguta alichiringacaman, cunanga na samangachu— nircami. Booz runaguca, Ruthuanmi cazarashca
Currently Selected:
RUT 3: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.