JUECES 5
5
Débora shuti huarmihuan, Barac shuti runahuan candashcami
1Chai punllami, Débora shuti huarmihuan, Abinoam shuti runapaj churi Barac shuti runahuanga, cashna nishpa candanajurca:
2“Israelcunata mandajcuna macanajuiman ñaupashpa rishcamanda gentecunapash, paicunapaj munai macanajuiman llujshishcamandaca, Mandaj Diostami alicachina canguichi.
3Jatun mandajcuna, uyaichi.
Cati mandajcunapash, uyaichi.
Ñucami, Mandaj Diosman candagrini.
Israelcunata Mandaj Taita Diosmanmi, Salmocunata candagrini.
4Mandaj Dioslla, Seir shuti urcumanda can llujshimujpi, Edom pambacunamanda shamujpica, alpapash chujchurcami.
Jahua pachamandapash, yacu shutumurcami.
Fuyumandapash yacu urmamurcami.
5Mandaj Diospaj ñaupajpica, urcucunapash chujchurcami.
Israelcunata Mandaj Taita Diospaj ñaupajpica, chai Sinaí shuti urcupash chujchurcami.
6Anat shuti runapaj churi Samgar shuti runa causajui punllacunapi, Jael shuti huarmi causajui punllacunapimi, ñangunaca jichushca quedarca.
Chaqui ñangunata purinajushcata saquishpami, vishtu ñangunata rinajurca.
7Israel llacta muyundi uchilla llactacunapash jichushca, urmashcami quedarca.
Débora ñuca shayaringacamanmi, chashna quedarca.
Ñucaca, israelcunapaj mamashnami shayarircani.
8Shuj mushuj dioscunata catingapaj agllanajujpimi, jatun macanajuica pueblo pungucunapi shuyajurca.
Chuscu chunga huaranga Israel purapica, ¿shuj escudollapash, shuj lanzallapash tiarcachu?
9Israelcunata mandajcuna, ñuca tucui shunguhuanmi, cangunataca alicachini.
Gente puracunamanda paicunapaj munai macanajungapaj llujshishcacunatami alicachini.
Mandaj Diostami alicachina canguichi.
10Yuraj burrocunapi tiarishpa purijcuna, ima llaquitapash alichijcuna, shuj llactacunaman rijcuna, cangunapash villaichi.
11Arcohuan macanajunamanda caruman rishpa, animalcunaman yacuta ufiachina pugyu ladocunapimi, Mandaj Dios mishashcacunataca, cutin cutin chaipi villanajunga.
Israel llactapi tiaj muyundi uchilla llactacunapi causajcuna mishashcacunatapashmi, chaipi villanajunga.
Chashna villajpimi, Mandaj Dios agllashcacunaca, pueblo pungucunaman rinajunga.
12Rijchari, rijchari, Débora.
Rijchari, rijchari, shuj juyailla candanaguta candai.
Abinoam shuti runapaj churi Barac shuti runa, jatari.
Can prezu japimushcacunataca apairi.
13Paicuna rijpimi, caishuj alicachi tucushcacunapash catirca.
Mandaj Dios agllashcacunaca, ushaita charij runacunahuanmi, Diosmanda macanajugrirca.
14Amalecitacunahuan causajcunaca, Efraín aillumandami shamurca.
Benjamín aillu, cambaj runacunata catishpami shamurca.
Maquir shuti llactamandaca, mandajcunami urai shamunajurca.
Zabulón aillumandaca, mandana varata charijcunami urai shamunajurca.
15Isacar ailluta mandajcunapashmi, Débora shuti huarmihuan rirca.
Isacar aillupash, Barac shuti runashnallatami pugru pambataca, chaquilla ucha rijurca.
Rubén aillupaj familia purapica, imatalla ruranatami ninanda yarinajurca.
16¿Imashpata llama corralcunapi, llamacuna huacajta uyangapaj quedarcanguichi?
Rubén aillupaj familia purapica, tucuita rurana yuyaicunatami charirca.
17Galaad llactapi causajcunaca, Jordán yacu chimba ladomanmi quedarca.
Dan ailluca, ¿imashpata jatun barco ladocunapi quedarca?
Aser aillupash, mama cucha manñapimi barcocuna shayana pueblomanda na llujshishpa quedarca.
18Zabulón aillu gentecunaca, huañunatapash na manllashpami llujshirca.
Neftalí aillupash, urcu pambacunamanmi llujshirca.
19Jatun mandajcuna shamushpami macanajurca.
Shinamandami, Canaán llactata jatun mandajcunapash macanajurca.
Meguido shuti pueblo ladopi tiaj yacucunaman shamushpami, Taanac shuti pueblo ladopi macanajurca.
Ashtahuangarin paicunaca, ima culquitapash na apanajurcachu.
20Luzerocunapash, jahua pachamandami macanajurca.
Paicuna tianajuj pushtumandapachami, Sísara runahuan macanajurca.
21Ninanda jatarijuj Cisón shuti huaicu yacumi, fichanshna aparca.
Punda huatacunamandapacha tiaj chai Cisón shuti yacumi, tucuillata aparca.
Ñuca almalla, ninan ushaihuan riyari.
22Shinamandami caballocunapaj sillucunapash, carucaman uyarijta calpanajurca.
Ninan shinlli soldadocuna caballopi tiarishpa calpanajujpimi, chashna uyarijurca.
23Mandaj Diospaj angelca, cashnami nirca:
‘Meroz shuti pueblotaca: Ima llaquipash japishpaca, alichari canman nichi.
Chai pueblopi causajcunatapash, ima llaquipash japishpaca alichari canman nishpa, shinllitapacha rimaichi.
Paicunaca, Mandaj Diosta ayudangapaca na shamurcachu.
Ninan ushaita charijcunahuan, Mandaj Dios macanajujpi ayudangapaca na shamurcachu’ nircami.
24Ceneopura Heber shuti runapaj Jael shuti huarmica, huarmi purapica alicachi tucushca cachun.
Carpacunapi causanajuj huarmi purapica, alicachi tucushca cachun.
25Sísara runa yacuta mañajpica, Jael shuti huarmica lechetami cararca.
Alicachi tucushcacunaman carana jatun tastapimi, sangu lecheta cararca.
26Paica, estacata japishpami, trabajaj runacunapaj mazota ali lado maquihuan japishpa, Sísara runapaj umapi tacashpa utujurca.
Chai estacataca, caishuj rinri ladoman llujshitami tacarca.
27Sísara runaca, paipaj ñaupajpimi nanaihuan curparishpa urmarca.
Paipaj ñaupajpi curparishpa urmashpami, chai urmashca pushtupillata huañurca.
28Sísara runapaj mamaca, ventanaman llujshishpa, ventanapi caspicunata churashca huashamanda chapashpami, cashna nishpa caparijurca:
‘¿Imashpashi paipaj carretaca, na ucha shamun?
¿Imamandashi paipaj carretacunapaj ruedacunapash shayarishpa, na ucha chayamun?’ nijurcami.
29Shina nijpimi, Sísara runapaj huarmi puramanda ashtahuan ali yachaj huarmicunapash, paillatapash cashna nishpa tigrachijurca:
30‘¿Nacha macanajuipi quichushcacunata tarishpa chaupirinajun?
Jarihuan nara tacarishca cuitsacunataca shuj shuj, na cashpaca ishcai ishcaimi chaupirinajunga.
Sísara runamangarin, juyailla color churajunata, juyailla colorhuan bordashca churajunacunatami cunajunga.
Macanajuipi quichumuj mandajcunamanmi, juyailla color puchacunahuan ishcai ladoman bordashca churajunata cunajunga’ ninajurcami.
31Mandaj Dioslla, canda fiñajcunaca tucuicuna chashna tucurichun.
Ashtahuangarin canda juyajcunaca, indi llujshishpa ninanda punchalla shitajunshna cachun” nishpami candanajurca.
Chai llactaca, chuscu chunga huatatami, casilla aliguta samajurca.
Currently Selected:
JUECES 5: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
