JUECES 4
4
Débora shuti huarmihuan, Barac shuti runahuanmi Sísara shuti runata mishashca
1Aod shuti runa huañushca jipaca, cutinmi israelcunaca Mandaj Diospaj ñaupajpi nalita ruranajurca. 2Chaimandami Mandaj Diosca, paicunata jatunshna Canaán llactata jatun mandaj Jabín shuti runapaj maquipi churarca. Paica, Hazor shuti pueblopimi, llactata mandashpa tiajurca. Paipaj soldadocunataca, Haroset-goim shuti pueblopi causaj, Sísara shuti runami mandajurca. 3Shinamandami israelcunaca, Mandaj Diosta caparishpa mañanajurca. Chai Jabín shuti jatun mandajca, jirruta rurashca iscun patsaj carretacunatami charirca. Paica, israeltacunataca ishcai chunga huatacamanmi, llaquitapash na llaquishpa ninanda mandashpa charirca.
4Chai huatacunapica israelcunataca, profeta Débora shuti huarmimi mandajurca. Paica, Lapidot shuti runapaj huarmimi carca. 5Débora shuti huarmica, paipaj palmera quiru ucupimi tiarinata yachan carca. Chai quiruca, Efraín shuti urcupi tiaj Ramá shuti pueblohuan, Bet-el shuti pueblohuan chaupipimi shayajun. Israelcunaca, ima llaquita alichijuchumbash, chai huarmipajmanmi vichai rinajun carca.
6Débora shuti huarmica, Neftalí shuti llactapi tiaj Cedes shuti pueblomanda Abinoam shuti runapaj churi Barac shuti runata cayachun cachashpami, cashna nijurca:
—Israelcunata Mandaj Taita Diosca, ¿nachu candaca cashna nishpa mandarca?: ‘Tabor shuti urcuman rishpa, Neftalí aillumandapash, Zabulón aillumandapash, chunga huaranga runacunata canhuan tandachigri. 7Jabín shuti runapaj soldadocunata mandaj Sísara shuti runataca, ñucami cangunahuan macanajuchun, Cisón shuti jatun larca yacu ladocaman paipaj carretacunandi, soldadocunandi cambajman pushamusha. Chaipimi paicunataca, cambaj maquipi churasha’ nishpami mandarca— nijurcami.
8Shina nijpimi Barac shuti runaca, cashna nishpa tigrachirca:
—Can ñucahuan rijpimi, ñucapash risha. Ashtahuangarin can na rijpica, ñucapash na rishachu— nircami.
9Shina nijpimi Débora shuti huarmica, cashna nirca:
—Shina cashpaca, canhuan rishallami. Ashtahuangarin cai macanajuita can mishajpica, na canda alicachingachu. Mandaj Diosca, Sísara shuti runataca huarmipaj maquipimi churanga— nircami.
Shina nishpami Débora shuti huarmica jatarishpa, Barac shuti runahuan Cedes shuti puebloman rirca. 10Barac shuti runaca, Zabulonbaj, Neftalipaj aillu runacunatami, Cedes shuti pueblopi tandachirca. Paica, chunga huaranga runacunatami, pai pushashpa vichai rirca. Débora shuti huarmipash, paicunahuanmi vichai rijurca.
11Moisespaj suedro Hobab shuti runapaj chutipura Heber shuti ceneo nishca runami, ceneo puramanda shicanyarishca carca. Paica, Cedes shuti pueblo ladopi tiaj Zaanaim shuti pugru pambapimi, carpacunata shayachishpa causajurca. 12Abinoam shuti runapaj churi Barac shuti runa, Tabor shuti urcuman vichai shamushcatami, Sísara shuti runaman villaj shamunajurca. 13Chaimandami Sísara runaca, tucui paipaj carretacunata tandachirca. Paica, jirruta rurashca iscun patsaj carretacunatami, paipaj tucui soldadocunandi tandachirca. Shina tandachishpami, Haroset-goim shuti pueblomandaca, Cisón shuti jatun larca yacu ladocaman shamurca. 14Chaimandami Débora shuti huarmica, Barac shuti runataca cashna nirca:
—Jatari. Cai punllami Mandaj Diosca, Sísara runataca cambaj maquipi churashca. ¿Nachu Mandaj Diosca, candaca ñaupashpa rijun?— nircami.
Shina nijpimi Barac shuti runaca, Tabor shuti urcumanda urai rirca. Paitaca, chunga huaranga runacunami catishpa rinajurca. 15Mandaj Diosca, Sísara runataca ninandapachami llaquichirca. Paipaj tucui carretacunatapash, tucui soldadocunatapashmi, Barac shuti runapaj ñaupajpi espadahuan tucuchirca. Chaimandami Sísara runaca, paipaj carretamanda uriajushpa pacajungapaj calparca. 16Ashtahuangarin Barac shuti runaca, Sísara runapaj carretacunata, soldadocunataca, Haroset-goim shuti pueblocamanmi catirca. Sísara runapaj tucui soldadocunaca, shujllapash na puchungacamanmi, espadahuan huañuchi tucushpa urmanajurca.
17Sísara runa pacajungapaj chaquilla calpashpaca, Jael shuti huarmipaj carpamanmi rirca. Chai huarmica, ceneopura Heber shuti runapaj huarmimi carca. Hazor shuti pueblopi causajuj Jabín shuti jatun mandajca, ceneopura Heber shuti runapaj huasi ucu purahuanga, casilla aligutami causanajurca. 18Jael shuti huarmica, Sísara runata tuparingapaj llujshishpami:
—Ñucata mandajlla, shamupailla. Ama manllashpa caiman shamupailla— nirca.
Shina nijpimi paica, chai huarmipaj carpaman yaicurca.
Chaiman yaicujpimi chai huarmica, jatanahuan quilpashpa pacarca.
19Chaipimi, Sísara runaca:
—Ninan yacunaihuanmi cani, asha yacuguta ufiangapaj carahuai nipanimi— nirca.
Shina mañajpimi, cara muchilata pascashpa lecheta ufiachirca. Ña ufiachishpaca, cutinllatami jatanahuan quilparca. 20Sísara runaca, Jael shuti huarmitaca cashnami nirca:
—Carpa huasi pungupi tiajupai. Maijambash shamushpa: ‘¿Pipash caipichu?’ nishpa tapujpica: ‘Na pipash caipichu’ nipangui— nircami.
21Ashtahuangarin Heber shuti runapaj huarmi Jaelca, carpata charichun pambana estacata, mazota japishpami, Sísara runapajman upalla quimirishpa chai estacataca, rinri jahua ladomanda alpaman yalijta tacarca. Sísara runaca, ninanda shaijushca ninan puñuihuanmi carca. Chashnami, Sísara runaca huañurca. 22Sísara runata catishpa Barac shuti runa shamujujpimi Jael shuti huarmica, tuparingapaj llujshishpa:
—Shamui, can mascajushca runata ricuchisha— nirca.
Shina nijpimi, chai huarmipaj huasiman yaicurca. Sísara runataca, rinri jahua ladopi estacahuan yalijta tacajpi, huañushca sirijujtami ñapash ricurca. 23Shinami Taita Diosca, chai punllapica Canaán llactata jatun mandaj Jabín shuti runataca, israelcunapaj ñaupajpi llaquichirca. 24Israelcunaca, ashtahuan ashtahuan shinlli tucushpami, Canaán llactata jatun mandaj Jabindaca, tucuillata tucuchingacaman ninanda llaquichinajurca.
Currently Selected:
JUECES 4: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
