ECLESIASTÉS 6

1Cai pachapica, runa puracunapi alipacha rijsishca shuj llaquipash tiajtami ricurcani: 2Taita Diosca, runapaj shungupi imata munashcata carashpami, imatalla charijtapash alicachi tucushca causanatapash ruran. Ashtahuangarin Taita Diosca, chai tucuita charishcacunamanda cushijuchunga, na saquinllu. Shina cajpipash na rijsishcacuna cushijuchunmi caran. Chaipash yangami, nali jatun llaquimi. 3Shuj runaca, patsaj churicunata charishca cashpapash, tauca huatacunata, ashtaca punllacunata causashca cashpapash, ima alicunahuambash na cushijushcangachu. Shinallata pai huañujpi pambangapajpash, na tiashcangachu. Shinamandami ñucaca, shullushca huahuarami chai runataca yali ali cashca nini. 4Chai shullushca huahuaca, yangami cai pachaman shamun. Yana yana tutamanmi rin. Paipaj shutipash, yana yana tutahuanmi quilpashca. 5Ashtahuangarin chai jahuaca, inditaca na ricushcachu, rijsitapash na rijsishcachu. Shina cashpapash chai huahuarami, chai runatapash yali samanata charin. 6Shuj runaca, ishcai huaranga huatata causajushca cashpapash, pai imatalla charishcacunahuanga, na cushijushca cangachu. ¿Nachu tucuicuna chai pushtumanllata rinajun?

7Tucui imatalla runa rurashcapash micungapajllami. Shina cashpapash paicuna munashcataca, na pactachinllu. 8Ashtahuangarin alipacha yachajushca runaca, shinlli shungu runataca, ¿imapipash yalinllu? Imagutapash na charij runaca, causaj puracunapi causajushpaca, ¿imatata ashtahuan charin?

9Ñapash chinganallacuna munangapaj randica, imata ricushpa charishcahuan cushijunami ashtahuan ali. Chaipash yangallami, yuyaita shaijuchingapajllami. 10Imapash cunambi tiashcapash, ña pundallatami quiquin shutihuan tiarca. Runa imashna cajtapash yachanchimi. Runaca, paitapash yali ushaita charij Dioshuanga, na chimbapura shayari ushanllu.

11Yapatapacha rimarijushpaca, imapash yangalla shimicunatami ashtahuan riman. Runaca, ¿imatata ashtahuanga charin? 12Runapaj causaipi ali canataca, ¿pita yachan? Tucui cai yangalla causai punllacunapica, imapash llandushnami ñapash yalinajun. Ashtahuangarin indi punllayachijuj cai pachapi runa huañushca jipa, pai ima tucunataca, ¿maijanshi villai ushanga?

Currently Selected:

ECLESIASTÉS 6: QUII

Highlight

Copy