HECHOS 7
7
Cacharichun yashpa villajujpimi, Esteban runagutaca huañuchishca
1Curacunata mandajmi, Esteban runagutaca:
—¿Cashnachu villashpa purircangui?— nirca.
2Shina nijpimi Esteban runaguca, cashna nijurca:
—Taitacuna, huauquicuna, uyahuaichi. Mesopotamia shuti llactamanda Harán shuti pueblopi causangapaj nara rijpillatami, ñucanchipaj ñaupa taita Abrahamman, punchapamba Taita Diosca ricurishca. 3Shina ricurishpami, paitaca cashna nishca: ‘Cambaj llactata, cambaj familiacunatapash, saquishpa llujshi. Ñucami, can maipi causagrichumbash ricuchisha’ nishcami. 4Shina nijpimi Abrahamga, Caldea shuti llactamanda llujshishpa, Harán shuti pueblopi causagrishca. Chai llactamandaca, paipaj taita huañujpimi, ñucanchi causanajunchi cai llactaman Taita Diosllata pushamushca. 5Shina pushamushpapash alpataca, chaqui sarunatallapash cai llactapica na carashcachu. Ashtahuangarin paipaj miraicunamanmi, paicuna causachun carashapacha nishca carca. Abrahamga, huahuata nara charijpillatami, chashna nishca carca. Ashtahuangarin cai llactata pai charichumbash, Diosca carashapachami nijushcami. Pai huañushca jipapash, paipaj huahuacunami japinga nishcami. 6Taita Diosca, cashnatapashmi ashtahuan nishca: ‘Cambaj miraicunaca, paicunapaj llactamanda rishpami, caru llactapi causanajunga. Chai llacta runacunami, paicunataca llaquichishpa gañanda rurashpa charinga. Chaipimi, chuscu patsaj huatacaman llaquichi tucushpa causanajunga. 7Ashtahuangarin gañanda urmashpa llaquichijuj llactataca, ñucami tigrachishpa llaquichisha. Chai jipa llujshimushpami, cai llactapi ñucata servishpa causanajunga’ nishcami. 8Diosca, ari nishpami Abrahamdaca, circuncisión nishcata rurangui nishca. Chaimandami Abrahamga, paipaj churi Isaactaca, pusaj punllahuanga circuncisionda rurashca. Shinallatami Isaacpash, paipaj churi Jacobotaca, circuncisionda rurashca. Jacobopash, paipaj chunga ishcai churicunataca, shinallatami circuncisionda rurashca. Paicunaca, ñucanchipaj ñaupa taitacunami.
9Chai ñaupa taitacunaca, paicunapaj huauqui Joseta na ricunayachishpami, Egiptoman jatushpa cachashca. Ashtahuangarin Taita Diosca, Josehuanmi cashca. 10José jatun llaquihuan cajpipash, Diosca cacharichishcami. Paitaca, ninandapacha juyashpami, aligutapacha yachajushca cachumbash, ushaita carashca. Shina cajpimi, Egipto llactata jatun mandaj Faraonbash, paitaca alicachishca. Paillatami, Egipto llactata, paipaj tucui huasita mandachumbash, Josetaca churashca.
11Chai punllacunapimi, Egipto llactapi, Canaán llactapipash, ninan yarjai japijpi, jatun llaquipi cashca. Shina cajpimi, ñucanchipaj ñaupa taitacunaca, granocunata na tarishca.
12Shina cajpipash: ‘Egiptopimi trigo tian’ nijta taita Jacobo uyashpami, ñucanchi ñaupa taitacunatara punda cachashca. 13Jipaman cutin rijpica: ‘Cangunapaj huauquimi cani’ nishpami, Joseca villashca. Shina villajpimi Faraonga, Josetaca maijanmanda mirai cajtaca yachashca. 14Shina yachajpimi Joseca, paipaj taita Jacobotapash, familiacunatapash, tucuillata pushamuchun, paipaj huauquicunataca tigrachishca. Paicunaca, canchis chunga picha gentecunami cashca. 15Shinami Jacoboca, Egiptopi causangapaj urai rishca. Chaipimi paipash, ñucanchi ñaupa taitacunapash huañushca. 16Huañushca unai huatacunapimi, paicunapaj tullutaca, Siquem shuti llactaman apashpa shamushca. Hamor shuti runapaj churicuna charishca asha alpata Abraham randishcapimi, paicuna apamushca tullucunataca pambanajushca.
17Taita Diosmi, Abrahamman cai llactataca carashapachami nishpa juramentushca. Chai punllacuna pactangacamanmi, israelcunaca Egipto llactapi ninanda miranajushca. 18Chai jipami, Egipto llactata mandangapaca, Joseta na rijsij shuj jatun mandaj tiarishca. 19Chai mandajmi, umachinata ali yachaj cashcashnallata, ñucanchi ñaupa taitacunataca ninanda llaquichishca. Ama ashtahuan mirachunmi, jari llullu huahuacunataca huañuchinajuchun mandashca. 20Chai huatacunapimi, Moisespash huacharishca. Paica, Taita Dios munashca huahuagumi cashca. Paitaca, quimsa quillacamanmi paipaj taita mamaca, huasipilla charishca. 21Huahuata huañuchina punlla chayajpimi, na ashtahuan pacaita ushashpa jichugrishca. Chai huahuataca, Faraonbaj ushi tarishpami, paipaj huahuatashna viñachishca. 22Shina viñachishpami, Egipto llactapi causajcunapaj yachajunatapash, tucuita aligutapacha Moisesman yachachishca. Shina yachajushpami rimanatapash, imata ruranatapash jatun ushaihuan rurajushca.
23Moisesca, ña chuscu chunga huatata charishpami, paipaj shungupica paipaj aillu israelcuna imashna causanajujta ricungapaj munashca. 24Pai rishpaca Egipto runa, shuj Israel runata macajujtami ricushca. Chai Israel runata mitsashpami Moisesca, Egipto runatapash chashnallata llaquichishpa macashpa huañuchishca. 25Ashtahuangarin paipaj maquihuan Taita Dios quishpichinataca, paipaj huauquicunapash yachangami yajurcami. Ashtahuangarin paicunaca, chashna cajtaca na yachai usharcachu. 26Cayandi punlla Moisés rishpaca, israelpura ishcai runacuna, ninandapacha fiñanajujtami ricushca. Paicunata alichingapaj munashpami: ‘Huauquicuna, cangunaca ¿imashpata ninandapacha cashna fiñanajunguichi?’ nishca. 27Shina nijpimi, cumbahuan fiñanajuj runaca, Moisesta na cazushpa cashna nishca: ‘¿Pita ñucanchita mandaj cachun, juez cachun candaca churarca? 28¿Egipto runata caina huañuchishcashnachu, ñucatapash huañuchingapaj munangui?’ nishcami. 29Chashna nijpimi Moisesca, Egiptomanda llujshishpa, Madián shuti llactaman pacajushpa rishca. Chaipi causashpami, ishcai churita charishca.
30Chuscu chunga huatata, chai llactapi causajushpami, Sinaí shuti urcu ladopi tiajuj jichushca pambapi michijushca. Chaipimi, shuj zarza yura rupajuj chaupipi, shuj ángel ricurishca. 31Muscuipishna ricushpami Moisesca, ninanda manllarishpa, ashtahuan aliguta ricungapaj chayagrijushca. Shinamandami Jatun Diosca, cashna nishpa paita rimaj uyarishca: 32‘Ñucami, cambaj ñaupa taitacunapaj Taita Dios cani. Abrahambaj, Isaacpaj, Jacobopaj Taita Diosmi cani’ nishcami. Shina nijpimi Moisesca, manllaihuan chujchurishpa, ashtahuan ricungapaj quimiritaca, na ushashca. 33Jatun Diosca, cashnatapashmi nishca ‘Cambaj chaquipi churajushcata llujchishpa anchuchi. Can shayajuj alpaca, ñucapajlla shicanyachishca alpami. 34Egiptopi causanajuj ñuca agllashcacunaca, ninanda llaquichi tucunajujta ricushcanipachami. Paicuna huacashpa causajtapashmi uyani. Paicunata, Egiptomanda llujchingapajmi uriajumuni. Shamui, candami cunanga Egiptoman cachagrini’ nishcami.
35‘¿Pita candaca, ñucanchita mandaj cachun, juez cachunga churarca?’ nishpami, israelcunaca Moisesta na cazushca. Ashtahuangarin Moisestami, Taita Diosca zarza yurapi ricurij angelpaj ushaihuan, israelcunata mandashpa llujchijuchun cachashca. 36Shina cachajpimi Moisesca, Egipto llactamanda ñucanchipaj ñaupa taitacunata llujchishca. Paica, chai llactapipash, Puca Cuchapipash, jichushca pambacunapipash, chuscu chunga huatacamanmi, pipash na rurai ushanallata, juyaillacunata rurashpa ricuchijushca. 37Chai Moisesllatami, israelcunataca cashna nishca: ‘Cangunata Mandaj Jatun Diosca, cangunapaj miraimandallatami, Dios ima nishcata villajta, ñucatashnalla cachamunga. Pai imata nishcatami cazuna canguichi’ nishcami. 38Moisesca, ashtaca israelcunahuanmi, jichushca pambapi causashca. Paica, Sinaí urcupi ángel villashcataca, ñucanchipaj ñaupa taitacunamanmi yalichishca. Causaita caraj shimicunata Dios carajpi japishpami Moisesca, ñucanchimambash yalichimushca.
39Chaitami ñucanchipaj ñaupa taitacunaca na cazunajushca. Ashtahuangarin paicunapaj shungupica, Egiptomanllata tigrangapaj munashpami Moisestaca, nalicachishpa na cazunajushca. 40Chaimandami Aarón shuti runagutaca, cashna ninajushca: ‘Ñucanchita pushachun shuj dioscunata rurapairi. Egipto llactamanda ñucanchita llujchimuj Moisesca, imachari tucurca, na ricurinllu’ ninajushcami. 41Shinamandami shuj shicutashnalla ruranajushca. Paicunapaj maquihuan rurashca yanga diosman animalta cushpa huañuchishpami, ninanda cushijunajushca. 42Chashna rurajpimi, Taita Diosca paicunamanda anchurishpa, luzerocunata mañachumbash saquishcalla. Dios ima nishcata villajcuna escribishca libropimi cashna nijun:
‘Israelcuna, cangunaca jichushca pambapica,
¿chuscu chunga huatacamanllu animalcunata
ñucaman carashpa huañuchircanguichi?
43Ashtahuangarin Moloc shuti diospaj carpatarami apashpa purircanguichi.
Shinallata, Renfán nishca luzerotashna
rurashca diostapash apashpami purircanguichi.
Chaicunatami, cangunaca ninanda alicachircanguichi.
Shinamandami cangunataca, Babilonia llactata
ashtahuan yalishpa causachun cachasha’ nijunmi.
44Ñucanchi ñaupa taitacunaca, jichushca pambapi cashpami, imashna causanata yachachishca Shimicunata alichishca jatun carpata apashpa purinajushca. Moisesman Taita Dios imashna rurachun ricuchishcashnami, chai carpataca rurashca. 45Chai carpataca, ñucanchi ñaupa taitacunami, paicunapaj taitacunapajta japinajushca. Chai carpatami Josueca, paicunandi apashpa shamushca. Cai llactata ñucanchipaj ñaupa taitacunaman carangapajmi, Taita Diosca caipi causaj na israelcunataca, llujchishpa cachashca. Chaitaca, David causajui punllacamanmi chashna rurajushca. 46Davidta Taita Dios ninanda juyajpimi, paica ñucanchi ñaupa taita Jacobopaj Taita Diospaj jatun carpata rurangapaj mañashca. 47Ashtahuangarin chashna mañajpipash Salomonmi, Diospaj huasitaca huasichishca. 48Shina rurajpipash, jahua pachapi causaj Diosca, maquihuan rurashca huasicunapica na causanllu. Dios ima nishcata villajpash, cashnami nishca:
49‘Jatun Diosca, cashnami nijun:
Ñucaca, jahua pachapimi mandashpa tiajuni.
Cai pachaca, ñuca sarujunami.
¿Imashna huasitata ñucaman ruragringuichi?
Na cashpaca, ¿maipita ñuca samana pushtu?
50Ima tiachumbash, ¿nachu ñucallata rurarcani?’ nishcami.
51¡Cangunaca shinlli shungu cashpami, Dios imata nijujtapash na uyangapaj munanguichi. Cangunapaj ñaupa taitacunashna, Diospaj jucha illaj Espiritutapash, na cazujcunami canguichi! 52Cangunapaj ñaupa taitacunaca, Dios ima nishcata villajcunataca, catiriashpami llaquichishca. Chai villajcunami: ‘Imatapash cashcatapacha Ruraj shamungami’ nishpa, ñaupa punllacunapillata villanajushca. Shina villajpipash paicunataca, cangunapaj ñaupa taitacunami huañuchishca. Cunanga, imatapash cashcatapacha Ruraj ña shamujpipash, cangunami japichishpa huañuchijcuna tucurcanguichi. 53Dios mandashca shimicunataca, angelcunami cangunaman cushca. Chai shimicunatapash, na cazujcunamari canguichi— nijurcami.
54Esteban runagu chashna villajujpimi, chai mandajcunaca shungupi ninandapacha fiñarishpa, quirutapash canirishpa ricunajurca. 55Ashtahuangarin Esteban runaguca, Diospaj jucha illaj Espíritu junda cashpami, jahua pachata vichai ricushpaca, Taita Diospaj punchapambagutapash, Taita Diospaj ali ladoman Jesús tiajujtapash ricujurca. 56Shina ricushpami Estebanga, cashna nirca:
—Ricuichi, jahua pacha pascariajtami ricuni. Chaipica, Taita Diospaj ali ladomanmi, Runa Aichayu tucushcapash tiajun— nircami.
57Shina nijta uyashpaca, ama uyangapaj rinrita llapirishpami, ninanda caparinajurca. Estebandaca, huaicashpami ñapash japirca. 58Chashna japishpami Estebandaca, pueblomanda llujchishpa huañuchingapaj rumicunahuan pegai callarirca. Llullashpa villajcunaca, paicunapaj churajunataca Saulo shuti chairalla huambraman mingashpami, shina ruranajurca. 59Chashna ruranajujpimi, Esteban runaguca:
—Apunchi Jesús, ñuca espirituta chasquipai— nishpa mañajurca.
60Esteban runagu cungurishpaca:
—Apunchi Jesús, paicunapaj cai juchataca, ama yaripanguichu— nishpami, ninanda caparirca.
Shina nishpaca huañurcallami.
Currently Selected:
HECHOS 7: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
