HECHOS 6

Crijcunata ayudashpa causachunmi, canchis runacunata agllashca

1Chai punllacunapica, yachajujcunaca ashtahuan ninanda miranajushpami, griego nishca shimita rimajcunaca, hebreo shimita rimajcunata nalicachishpa parlanajurca. Punllandi ricuriashpa caranacunataca, paicunapura sapalla mamagucunaman na ricuriashpa carajpimi, chashna parlanajurca.

2Shinamandami, villachun cachashca chunga ishcaicunaca, ashtaca crijcunata tandachishpa, cashna ninajurca: “Diospaj Shimita ñucanchi villanata saquishpa, micunatara caranajushpaca na cashcatapacha ruranajunchica. 3Huauquicuna, panicuna, canguna puramanda canchis runacunata agllapaichi. Paicunaca, Diospaj jucha illaj Espíritu junda causanajuj, tucuipi alicachi tucushca, aliguta yachajushcacuna cachun ninchimi. Cai ruranataca, paicunamanmi mingangapaj munanchi. 4Paicunata churashpami, ñucanchica Diosta mañashpa, paipaj Shimita villashpa catishun” ninajurcami.

5Shina nishcacunataca, chaipi tandanajushca tucuicunami alicachirca. Shina alicachishpami, Esteban runaguta agllanajurca. Paica, alipacha crij cashpami, Diospaj jucha illaj Espíritu junda carca. Shinallata: Felipe, Prócoro, Nicanor, Timón, Parmenas, Nicolás shuti runacunatapashmi agllarca. Nicolás runaca, Antioquía pueblomandami carca. Paica, israelcuna yachachishcata catijmi carca. 6Shina agllashpami, villachun cachashcacunapajman pushamurca. Paicunaca, chai agllai tucushcacunapaj umapi maquita churashpami, Diosta mañanajurca.

7Jatun Diospaj Shimita ashtahuan ashtahuan villanajujpimi, Jerusalenbica ashtacacuna crinajurca. Shinallata curacunapash ashtacacunami, Jesusta crishpa cazunajurca.

Esteban runagutami, prezu japinajushca

8Esteban runaguca ninan juyaihuan, ninan ushaihuan junda cashpami, jatun manllarinacunata rurashpa, juyailla ruranacunata gente puracunapi rurajurca. 9Shinamandami, gañan causashcamanda cacharishcami nishca shuti tandanajuna huasipi tandanajuj puramanda huaquingunaca, Estebanda fiñashpa ningapaj jatarinajurca. Paicunahuanga, Cirene shuti, Alejandría shuti pueblocunamanda, Cilicia shuti, Asia shuti llactacunamanda shuj runacunapashmi shamushca carca. 10Esteban runaguca, Diospaj Espíritu yachachijpi, ali yachaihuan villajujpimi, na chashnachu nishpa rimaitaca na ushanajurca. 11Shinamandami paicunaca, shuj runacunaman culquita pacalla curca. Paicunaca: “Moisés mandashca shimitapash, Diostapash nali shimicunata rimajujtami, cai runataca uyarcanchi” nishpa llullashpa villachunmi, chashna cunajurca.

12Paicunami, chaipi causajcunapash, mandaj rucucunapash, mandashca shimita yachachijcunapash fiñarishpa jatarichun, nali yuyaita cunajurca. Shina tandanajushpaca, Estebanda japishpami, mandaj puracunalla tandanajushcapaj ñaupajman apamunajurca. 13Llullashpa villachun churashca runacunaca, cashnami ninajurca: “Cai runaca na shaijushpami, Diospajlla tiajuj cai huasitapash, Moisés mandashca shimitapash, nali shimicunatalla rimajun. 14Cai runataca, cashnatapacha nijujtami uyarcanchi: ‘Nazaret pueblomanda Jesusca, Diospaj huasita urmachingami. Paillatami, ñucanchi catichun Moisés yachachishcataca chingachishpa, shujta yachachinga’ nijujtapashmi uyarcanchi” ninajurcami.

15Shina nijpimi, mandaj puracunalla tandanajuna ucupi tianajuj runacunaca, Estebandalla tucuicuna ricunajurca. Paipaj ñavica, angelpaj ñavishna cajtami ricunajurca.

Currently Selected:

HECHOS 6: QUII

Highlight

Copy