HECHOS 17

Tesalónica pueblopi causajcunami caparinajushca

1Pablondi, Silas runagundimi, Amfípolis shuti, Apolonia shuti pueblocunata yalishpa, Tesalónica shuti puebloman chayagrirca. Chaipimi, Judea llactamanda gentecuna tandanajuna huasi tiarca. 2Paicunapajmanmi, Pabloca rinata yachan carca. Chaipimi, quimsa semanacaman tiashpa, samana punllacunapica, paicunahuan chimbapura rimarinajurca. 3Dios escribichishca Shimipi nijujtaca, aliguta villashpami, cashna nishpa yachachijurca:

—Quishpichij Cristoca, huañunapachami carca. Shina cashpapash, huañushcacunapaj chaupimanda causarinami carca. Ñuca cangunaman villajushca Jesusca, Quishpichij Cristomi— nijurcami.

4Shina yachachijpimi, paicuna puramanda taucacuna crishpa Pablohuan, Silas runaguhuan tandanajurca. Shinallata Diosta yarij griego nishca gentecunapash, alicachi tucushca huarmicunapashmi, ashtacacuna crinajurca. 5Chaita ricushpami, Judea llactamanda na crij gentecunaca ninandapacha fiñashpa, yanga purij nali runacunata chai pueblopi caparinajuchun tandachinajurca. Chashna rurashpami, Jasón shuti runapaj huasi punguta faquishpa, chai ucumanda tucuicunapaj ñaupajman Pablotapash, Silastapash llujchingapaj munanajurca. 6Chaipi na tarishpaca, Jasón shuti runata, huaquin crijcunatapash, pueblota mandajcunapaj ñaupajmanmi apanajurca. Chaipimi ninanda caparishpa, cashna ninajurca:

—Cai runacunaca, tucui cai pachapi causajcunatamari umachishpa purinajun. Chaipajmi caimambash shamushca. 7Paicunatami, cai Jasón shuti runaca mingachishpa charijushca. Tucuilla paicunami: ‘Shuj jatun mandaj Jesusmi tian’ ninajun. Shina nishpami, Cesar mandashcatapash na cazunajun— ninajurcami.

8Chashna nijta uyanajushpami, chai pueblopi causajcunapash, mandajcunapash, ninanda caparinajurca. 9Mandajcunaman culquita cujpimi, Jasón shuti runatapash, caishuj crijcunatapash cacharinajurca.

Pablopash, Silaspash, Berea shuti pueblopimi yachachinajushca

10Chai jipallami crijcunaca, Pablotapash, Silastapash, Berea shuti puebloman uchalla cacharca. Chaiman chayashpaca, Judea llactamanda gentecuna tandanajuj huasimanmi yaicunajurca. 11Chaipi causajcunaca, Tesalónica shuti pueblopi causajcunataca yali ashtahuan alicachi tucushcacunami carca. Chaimandami paicunaman villajpica, ninanda cushijushpa uyanajurca. Shina cashpami: “¿Dios escribichishca Shimipipash, shinallatachu nijun?” nishpa, punllandi aliguta mascashpa leyinajurca. 12Shina leyinajushpami, paicuna puramandaca ashtacacuna Jesusta crinajurca. Alicachi tucushca griega nishca huarmicunapash, tauca jaricunapashmi crinajurca. 13Berea shuti pueblopipash, Taita Diospaj Shimita Pablo villajun nijtami Tesalónica pueblopi causanajuj Judea llactamanda gentecunaca uyarca. Paicunaca, chai pueblomambash rishpami, ashtaca gentecunapi caparinajurca. 14Chaimandami chai crijcunaca, uchalla mama cucha ladoman Pablotaca, cumbacunahuan cachanajurca. Silashuan, Timoteohuanga, chai pueblopillatami quedarca. 15Pablotaca, pushangapaj mingai tucushcacunaca, Atenas shuti pueblomanmi pushanajurca. Paicunatami Pabloca: “Silastapash, Timoteotapash, ucha ñucapajman pushamuichi nijunmi nigripaichi” nirca.

Atenas shuti pueblopimi, Pabloca villashca

16Atenas shuti pueblopimi Pabloca, Silasta, Timoteota shuyajurca. Chai pueblopi causajcunaca, yanga dioscunata ninanda yariajlla causajtami ricujurca. Shina ricushpami, paipaj shungupica ninanda llaquirishpa fiñarirca. 17Chaimandami Pabloca, tandanajuj huasipica, Judea llactamanda gentecunahuan, Diosta yariashpa causajcunahuan, Pabloca chimbapura parlajurca. Jatun plazapi purijcunamambash, punllandimi yachachijurca. 18Epicúreos nishca, estoicos nishca yachachij runacunapash, Pablohuanga chimbapura parlangapajmi tandanajurca. Jesusmanda ali villaitapash, huañushcacuna causarinatapashmi, Pabloca villajurca. Shina villajpimi, huaquingunaca:

—Cai shimisapa runaca, ¿imatata nirijunlla?— ninajurca.

Ashtahuan shujcunaca:

—Ñucanchi na rijsishca dioscunamanda villajmi yarin— ninajurcami.

19Pablota japishpami, Areópago nishca pushtuman pushashpa, cashna ninajurca:

—Ñucanchi nara uyashcatami yachachijungui. Chaitaca, ¿yachai ushanachu capanchi? 20Ñucanchi nara uyashca shimicunatami villaj shamushcangui. Can imata villajujtapash yachashumbacha nipanchimi— ninajurcami.

21(Atenas shuti pueblopi tucui causajcunapash, caru llactamanda shamushpa causajcunapash, nara uyashca shimicunata uyanata, imatapash parlanatallami, ninanda munashpa causan carca).

22Pabloca, Areópago nishca plaza chaupipi shayarishpami, cashna nijurca:

—Atenas pueblopi causajcuna. Cangunataca, dioscunata alipaj yarijcuna cajtami, tucuipi ricujuni. 23Ñuca cai pueblopi purijushpaca, cangunapaj dioscunata yarina huasicuna tiajtami ricurcani. Shuj altarpica: NA RIJSISHCA DIOSTA YARINAMI nishpa escribishca tiajujtami ricurcani. Chai Diostaca, na ricushpapash, ninanda alicachishpami causashcanguichi. Paimandami cangunaman villajuni.

24Chai Diosllatami, cai pachatapash, cai pachapi tucui ima tiachumbash rurashca. Paica jahua pachata, cai pachata Mandaj cashpami, gentecuna yaringapaj rurashca huasicunapica, na tiajun. 25Pai imata minishtijujpishna paita alicachishpa gentecuna imata maquihuan rurachumbash, na munanllu. Paica causaita, samaita, imata munashcatapash tucuicunamanmi caramujun.

26Shujlla runamandami cai pachapica, maipipash shuj shuj gentecuna mirashpa causanajuchun Diosca rurashca. Paillatami, gentecuna causana huatacunatapash, paicuna maipi causanajuchumbash, ñaupallata churashca. 27Ñucanchi causashpallata, Taita Diosta mascashpa, imashnallapash paita tuparichunmi munan. Ashtahuangarin paica, ñucanchimandaca na carupi canllu. 28Paimandami causanchi, purinajunchi, imatapash ruranchi. Canguna puracunamanda ali yachajushca runacunapashmi, cashna nishca: ‘Ñucanchica, Diospaj huahuacunami canchi’ ninajushcami. 29Taita Diospaj huahuacuna cashpaca, orota, culquita, rumita rurashcacunaca, Diosman rijchajpachami nishpaca, na yarinachu canchi. Chaicunaca, imatapash ruranata ali yachaj runacuna aliguta yarishpa rurashcallami. 30Chashna na yachashca causanajujpipash yanga saquishpami, Taita Diosca na llaquichirca. Ashtahuangarin cunanga, maipi causajcunatapash tucuillatami ninanda llaquirishpa, paipajman tigrarichun mandajun. 31Diosca, ñami shuj punllata agllashca. Chai punllapimi, cai pachapi causajcuna imata rurashcatapash ricuchishpa, imatapash cashcatapacha ruranga. Chashna ricuchingapajmi, tucuicuna yachachun pai agllashca runataca, huañushcacunapaj chaupimanda causachirca— nijurcami.

32“Huañushcacunapaj chaupimandami causachirca” nijta uyashpaca, huaquingunaca ninanda asishpami ricurca. Shujcunaca:

—Can chashna villajujtaca, cutimbajmi uyapashun— ninajurca.

33Shina nijpimi Pabloca, paicunapaj chaupimandaca llujshishpa rirca. 34Ashtahuangarin huaquingunaca Jesusta crishpami, Pablohuan tandanajurca. Paicuna purapica, Areópago nishca mandajpura tandanajuj, Dionisio shuti runapashmi carca. Dámaris shuti huarmipash, shujcunapashmi crirca.

Currently Selected:

HECHOS 17: QUII

Highlight

Copy