2 REYES 24
24
1Joacim shuti runa mandajui huatacunapimi, Babilonia llactata jatun mandaj Nabucodonosor runaca, macanajungapaj paipaj soldadocunandi vichai shamurca. Chaimandami Joacim runaca, quimsa huatata Nabucodonosor runata servishpa causajurca. Shina causajushpapash Joacim runaca, paita na cazushpami jariyarca. 2Ashtahuangarin Mandaj Diosca, Joacim runahuan macanajuchunmi, caldeocunapaj, siriocunapaj, moabitacunapaj, amonitacunapaj soldadocunata cachamurca. Paicunataca, Mandaj Dios imashna villachishcashnallatami, Judá llactapi causajcunata tucuchinajuchun cachamurca. Chaitaca, Dios ima nishcata villashpa, Diosta servijcunahuanmi villachishca carca. 3Judá llactapi causajcunapaj cai llaquica, Mandaj Diospacha cachamujpimi, chashna shamurca. Juchacunata Manasés runa rurashcata, tucui imatalla pai rurashcata, paipaj ñaupajmanda anchuchingapajmi, chashna cachamurca. 4Shinallata ima nalitapash na ruraj gentecunata huañuchishpa yahuarta jichashcamandami, Mandaj Diosca na cungangapaj munarca. Paicunaca, ima nalitapash na ruraj gentecunapaj yahuartami, Jerusalenbica jundachirca.
5Joacim runa ashtahuan imatalla rurashcapash, tucui imatalla rurashcapash, ¿nachu Judá llactata jatun mandajcuna imatalla rurashcacunata escribishca libropi tiajun? 6Joacim runa huañushpa, paipaj ñaupa taitacunahuan tandanajujpica, paipaj randica paipaj churi Joaquín runami mandajurca.
7Egipto llacta jatun yacumandaca, Eufrates jatun yacucamanmi, Babilonia llactata jatun mandajca quichurca. Chaimandami Egipto llactata jatun mandajca, paipaj llactamanda llujshitaca, na ashtahuan usharca.
Joaquín shuti runapash, alicachi tucushcacunapashmi, Babilonia llactaman prezu apai tucushca
(2 Crón. 36:9-10)
8Joaquín shuti runaca, chunga pusaj huatata charishpami, mandai callarirca. Paica, quimsa quillatami Jerusalenbi mandajurca. Paipaj mamaca, Jerusalenbi causajuj Elnatán runapaj ushi Nehusta shutimi carca. 9Joaquín runaca, paipaj taita tucui nalita rurashcashnallatami, Mandaj Diospaj ñaupajpica, nalita rurashpa causajurca.
10Chai huatacunapimi, Babilonia llactata jatun mandaj Nabucodonosor runata servijcunaca, Jerusalenbi causajcunahuan macanajungapaj vichai shamushpa, chai pueblotaca chaupipi churarca. 11Babilonia llactata jatun mandaj Nabucodonosor runapashmi, paita servijcuna chashna chaupipi churashca cajpi, Jerusalenbi causajcunahuan macanajungapaj shamurca. 12Chaimandami, Judá llactata jatun mandaj Joaquín runaca, paipaj mamandi, paita servijcunandi, pai churashca mandajcunandi, chaishuj mandajcunandi, Babilonia llactata jatun mandaj Nabucodonosor runapajman llujshirca. Chashna llujshijpimi, Babilonia llactata jatun mandajca prezu japirca. Ña pusaj huatata pai mandajushpami, chashna japirca.
13Nabucodonosor runaca, Mandaj Diospaj huasipi, mandana huasipi tucui ima ninan valishcacuna tiashcatami llujchirca. Chai jipaca, Israel llactata jatun mandaj Salomón, Mandaj Diospaj huasipi imalla charinacunata oromanda rurachishcacunatami faquishpa saquirca. Chaicunataca, Mandaj Dios imashna villashcashnallatami rurarca. 14Nabucodonosor runaca, Jerusalenbi tucui causajcunatapash, tucui mandajcunatapash, ninan shinlli tucui soldadocunatapash, imatalla ruranata tucui yachajcunatapash, jirruta tacashpa tucui imatalla rurajcunatapash, chunga huarangacaman tandachishpami prezu aparca. Llactapica, ali gentecunaca maijambash na quedarcachu, imagutapash na charij gentecunallami quedarca. 15Shinallata Joaquín runatapash, jatun mandajpaj mamatapash, pai jatun mandajpaj huarmicunatapash, paita servijcunatapash, Judá llactapi causanajuj ninan ushaita charijcunatapashmi, Jerusalenmandaca Babilonia llactaman prezu aparca. 16Jatun macanajuiman llujshinalla canchis huaranga tucui runacunatapash, imatalla ruranata yachajcunatapash, jirruta tacashpa imatalla rurajcunatapash, huaranga runacunacunatami aparca. Shinallata macanajunata ali yachaj soldadocunatapashmi, Babilonia llactata jatun mandajca prezu aparca. 17Babilonia llactata jatun mandajca, Joaquín runapaj tío Matanías shuti runatami, Joaquín runapaj randi jatun mandaj cachun churarca. Matanías shuti runataca, Sedequías shutitami shutichirca.
Sedequías shuti runami mandajushca
(2 Crón. 36:11-16; Jer. 52:1-3)
18Sedequías shuti runaca, ishcai chunga shuj huatata charishpami, mandai callarirca. Paica, chunga shuj huatatami, Jerusalenbi mandajurca. Paipaj mamaca, Libna shuti pueblomanda Jeremiaspaj ushi Hamutal shutimi carca. 19Paipaj ñaupa taita Joacim shuti runa tucui nalita rurashcashnallatami, paipash Mandaj Diospaj ñaupajpica, nalita rurajurca. 20Shinamandami Mandaj Diosca, Jerusalenbi causajcunahuan, Judá llactapi causajcunahuan ninandapacha fiñarishpa, paipaj ñaupajmanda anchuchirca. Sedequías runaca, Babilonia llactata jatun mandajta fiñashpami na cazurca.
Currently Selected:
2 REYES 24: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
