Ləwke 19

Yɛ Yɛsə le Zashɛ

1Ma kwa dzembe Zhɛriko Yɛsə ne, ntəŋə ŋkɛ dzeyi mbe meleme. 2Pɛkwe kwete wəndə nya nza sləa ŋkɛ kaZashɛ. Nahe ŋkɛ kenza kawəndə nya te ghəa ka tsehe jaɓeregwale ba'a kande mcɛlə. 3Kaɗe ŋkɛ kanewe wa ŋkɛ wa ŋkɛ Yɛsə, ama shaŋe ŋkɛ ve va baslɛa ŋkɛ ba'a va nya nza mbeli nyi kedzaslete ŋkɛ kwele kwele. 4Tereŋe ŋkɛ le hwɛ kadzeyi te kema, tarame ŋkɛ pelɛ mekweɗa kezha newe Yɛsə nya ketedzeyi tagha. 5Ma kwa ntsehe Yɛsə te ŋkwa shɛ ne, pa kafete ghə, ma ke: «Zashɛ, sawa kahe kahe, kwa nza ŋkɛ ki ghɛa ŋa tehɛ 'ya ɓeshi.» 6Ɓərəkwə Zashɛ sawa kahe kahe, pa kemaneve Yɛsə le zlama. 7Ma mbeli nyi kenewe hɛ ne, pɛtɛ hɛ kandəghwə ndəghwə, ma ke shɛ: «Ki ghɛa nde jaɗafa dzekinyɛ Yɛsə gɛ wə!» 8Pa Zashɛ hendeke nda geva, ma ke sha Nde sleke ŋkwa: «Nde sleke ŋkwa, kateve nda kwa bake ta bela ta wəshia ɗa 'ya ke ka titikwəa kɛfi. Ma kekelehwe wəsəa wəndə 'ya le mbəɗəkwə ne, wəfaɗe zhigə teŋki nda 'ya.» 9Ma ke Yɛsə sha mbeli: «Ma ɓeshi ne, nahe mbele kedzeki ghɛ nya, kwa nza ŋkɛ nahe Zashɛ kenza kahwelefe ta Abraham perə! 10Kwa nza ŋkɛ nahe Wəzege ta za kese kezha sepa mbeli nyi keza za ba'a kezha mbele hɛ.»

Ghena keyipə pa te mze kwa tere tere

(MAT 25.14-30)

11Ma kwa nza mbeli kafa ghena shɛ ne, pa Yɛsə mbakete nda kwete ghena keyipə pa. Ma kwa nza ŋkɛ takwa takwa yitea Zhɛrəzalɛm, ma zəzə mbeli ne, tsetsenya tsetsenya tenca Meghea Shala. 12Ma ke Yɛsə sha hɛ: «Pa kwete hwelefe ta ka meghe kadzete kwete hɛɗi nya cakeɗake kezha kele meghe, nda tezhɛne geva ŋkɛ kase. 13Ma nda teslə ŋkɛ ne, pa hekakɛ kweci ka mavashia ŋkɛ meŋe ba'a ndeke nda slibə gwəmsə mcɛfe ke yayata wəndəa nci. Ma ke sha hɛ: Zhɛre mə dzeve le cɛdɛ nya nda se 'ya. 14Ama kazlɛ mbeli nyi te meleme ta nci ve, pa hɛ ghwenakɛ nda mɛ, ma ke hɛ shɛ: Kaɗe wəndəa shɛ ghen'yɛ kameghea n'yɛ we.

15Ma kwa ndeke nda meghe mbeli ne, pa zhɛneke geva kase kadzete hɛɗia ŋkɛ. Pa ŋkɛ hekakɛ ka mavashi nyi ndeke nda cɛdɛ ŋkɛ ke hɛ kezha newe meleɓe nya kemave hɛ. 16Ma ke nde ghate kwa se ŋkɛ: Nde sleke ɗa, nahe 'ya kekemave meleɓe miliyeŋə mcɛfe le cɛdɛ nya ndeke ɗa na. 17Ma ke nde sleke ŋkɛ shɛ: Yewə, mava nya ganyɛa mehele na. Ma va nya se na tiɗiɗi mbe wəshi nyi ɓɛhwɛ ɓɛhwɛ ne, 'ya kave ŋa kaŋgwamna ta meleme meŋe. 18Pa nde bake se, ma ke: Nde sleke ɗa, nahe 'ya kekemave meleɓe miliyeŋə bake ba'a slibə gwəmsə mcɛfe le cɛdɛ nya ndeke ɗa na. 19Ma ke nde sleke ŋkɛ shɛ: Ma gha ne, kave ŋa 'ya kaŋgwamna ta meleme mcɛfe. 20Pa kwete nde mene slene se, ma ke shɛ: Nde sleke ɗa, wa nya cɛdɛa ŋa nya ndeke ɗa na nya. Nahe 'ya kewəfərəakɛ kwa dəghwə kezha ɗema ŋkɛ kaza. 21Nahe 'ya keghazlənə ɗa va gha, kwa nza ŋkɛ dzawe mehele ta ŋa: kakele wəsə nya ɗema na keveyi na, kaɗa wəsə nya ɗema na ketsawete na te wəve. 22Ma ke nde sleke ŋkɛ shɛ: Mava nya ndiremia mehele na. Katemeha ghwə 'ya te gha laka ghena nyi gezete nyi na. Nahe na keɗepe dzawe 'ya, kakele wəsə nya ɗema 'ya keveyi 'ya, kamene wəshi nyi ɗema 'ya ketsawete hɛ 'ya se te wəve. 23Wa raberə ɗema na keveyi ɗa cɛdɛa ɗa kakane wa? Nza ma kese 'ya ne, katekele cɛdɛa ɗa 'ya le meleɓe yite wəka! 24Ma ke sha mbeli nyi tagha: Kelehwe mə cɛdɛa shɛ ve shɛ yɛ ndeke nda ke wəndə nya nza ŋa ŋkɛ meleɓe miliyeŋə mcɛfe. 25Ma ke hɛ shɛ: Nde sleke ŋkwa, miliyeŋə mcɛfe ya ve! 26Ma ke sha hɛ: Ma 'ya sha gheyɛ: ma wəndə nya nza wəsə ve ne, katembake nda mbeli. Ma wəndə nya ɗema wəsə ve ne, katekele ya nya ɓɛhwɛ ve mbeli. 27Ma mbeli nyi keɗema ɗa kameghe ne, fəke mə hɛ kase teke, mpəmte mə hɛ teke te kema ta ɗa.» 28Ma kwa gezemte ghena shɛ Yɛsə ne, ntəŋə ŋkɛ te kema ta mbeli kadzeme Zhɛrəzalɛm.

Yɛsə kadzembe Zhɛrəzalɛm

(MAT 21.1-11; MRK 11.1-11; ZHŊ 12.12-19)

29Ma kwa nza hɛ takwa takwa yitea yɛ Bɛtfazhɛ le Bɛtani, terasle ghweme ta yɛ Bekele, pa Yɛsə ghwenakɛ kweci mbeli nyi ketəkwə təkwə bake kalə te kema ta ŋkɛ. 30Ma ke sha hɛ: «Kwiɗi mə kalə kadzembe meleme nya te kema ta ŋayɛ nya. Dzembema ta ŋayɛ ne, katenewe leve ta kwara yɛ tehwepe, nya ghama wəndə kase pelɛ. Pelemte mə ŋkɛ ba'a ŋkake ɗa mə ŋkɛ. 31Ma kegeze ŋayɛ kwete wəndə: Kawa yɛ le wa, a ke ne, Nde sleke ŋkwa nza kaɗe, pe yɛ shɛ.» 32Ntəŋə mbeli nyi ghwenakɛ nyighɛ Yɛsə kalə, pa hɛ kemave kala nya gezete nda Yɛsə ke hɛ. 33Ma vəa ŋkwa nya pele leve ta kwara hɛ ne, ma ke mbeli ke kwara sha hɛ: «Kawa yɛ le leve ta kwara nya wa?» 34Ma ke zhɛnete: «Nde sleke ŋkwa nza kaɗe.» 35Pa hɛ ŋkake nda kwara ke Yɛsə. Ma kwa hite lekwesa ta nci hɛ te wəmbəa kwara ne, tarame Yɛsə pelɛ. 36Ma kadzeghwa Yɛsə, kapelake lekwesa ta nci mbeli kwa hweŋkwa. 37Takwa takwa hɛ yitea hweŋkwa nya kesawa pelɛ ghweme ta Bekele ne, ntake pɛtɛa mbeli nyi ketəkwə təkwə Yɛsə katsahe Shala le zlama ba'a le berete, va nya nakɛ wəshi meŋele nyi menete Yɛsə hɛ. 38Ma ke hɛ: «Kewəpi wəpi nza wəndə nya kese te sləa Mahwətə. Kwelɛŋe ya pelɛ ghweme ba'a zləvə ya te Shala.»

39Ma ke kweci ka Fariziyɛn nyi tagha hwa mbeli sha Yɛsə: «Nde sleke n'yɛ, geze nda ke mbeli nyi ketəkwə təkwə ŋa kanza divə gi!» 40Ma ke Yɛsə sha hɛ: «Ma 'ya sha gheyɛ: ya mbeli nyi nzanji divə ne, katetsa lewela yɛ pelɛ.»

Yɛsə kanehwene yitea Zhɛrəzalɛm

41Ma kwa se Yɛsə takwa takwa yitea Zhɛrəzalɛm ba'a kwa nakɛ ŋkɛ ne, bəghə ŋkɛ tenehwene yitea melemea shɛ. 42Ma ke: «Zhɛrəzalɛm, keɗepe na ɓeshi tsema tsema nza na kakemave kwelɛŋe we. Ma tsetsenya ne tewəfərə ŋkɛ sha gha. 43Katese kwete və nya teha ŋa mpa ka ghema ta ŋa. Katedzasle ŋa hɛ le zli ba'a kateha ŋa mpa hɛ shave mbe yayata bela. 44Kateza ŋa hɛ, gha le ŋwalea ŋa. Katetene pelɛ hɛ kənəa pelɛ we, kwa nza ŋkɛ keɗepete və nya se Shala kakemane ŋa kwa na we.»

Yɛsə mbe ghɛa Shala

(MAT 21.12-17; MRK 11.15-19; ZHŊ 2.13-22)

45Shilimə Yɛsə mbe ghɛa Shala, ntake ŋkɛ kaŋka mbeli nyi kepamte wəshi shave mbe. 46Ma ke sha hɛ: «Ma mbe Ghena ta Shala ne, ma ke Shala gezete: Kateheka ghɛa ɗa mbeli kaghɛ kesəkwə ghə. Ama gheyɛ ne, nahe yɛ kezhɛrete ŋkɛ kazlera ta ka ghərəa kɛfi.»

47Kateke nda wəshi Yɛsə ke mbeli mbe ghɛa Shala keveci keveci. Kasepa ntsehwele mbeli nyi te ghəa ka dzeghe Shala, ka rafe wəsə mahalegə ba'a mbelia jama ta ka Zhəwif kezha pesle ŋkɛ. 48Ama keɗepe hɛ tsema tsema nza hɛ kakeseve ŋkɛ we, kwa nza ŋkɛ katsəkwə geva mbeli kezha fa ghena ta ŋkɛ.

Currently Selected:

Ləwke 19: BEKDC12

Highlight

Copy