Ləwke 18

Ghena keyipə pa te male wede le nde meha ghwə

1Pa Yɛsə gezete nda ghena keyipə pa nya ke hɛ, yitea ncɛ nda ke hɛ tsema tsema hi hɛ kasəkwə ghə keveci keveci kaɗema kaleɓe. 2Ma ke sha hɛ: «Pa kwete nde meha ghwə mbe kwete meleme. Kahawe ŋkɛ va Shala we, kahawe va wəndə we. 3Pa kwete male wede mbe melemea shɛ. Keveci keveci se malea shɛ shɛ, ma ke shɛ: Mehate ɗa ghwə ta ɗa le nde ghema ta ɗa. 4Kavə kwele kwele ne, pa nde meha ghwəa shɛ ɗema. Zhɛne ne, ma ke mbe ghəa ŋkɛ: Kaghazlənə 'ya va Shala tse we, kahawe 'ya va wəndə we. 5Ama nahe wede nya keleɓekɛ ɗa. Megela ma kiɗimte nda ghwə ta nta 'ya yitea ɗema nde kase kaleɓe ɗa keveci keveci.» 6Ma ke Nde sleke ŋkwa ɓiyitsa: «Fama mə ghena ta nde meha ghwə nya 'yaghwa mehele nya gɛ! 7Ashɛ Shala kameha nda ghwə nya tiɗiɗi ke mbeli nyi tsehave ŋkɛ nyi kenehwene nda nehwene veci le viɗi wəka? Ama kadera ŋkɛ kefa ghena ta nci na? 8Ma 'ya sha gheyɛ: kahe kahe temeha nda ghwə nya tiɗiɗi ŋkɛ ke hɛ. Ama te və nya tese Wəzege ta za ne, katesləyi wəndə nya nza yɛ ve ŋkɛ te hɛɗi na?»

Nde Fariziyɛn ba'a nde tsehe jaɓeregwale

9Pa Yɛsə gezete kwete ghena keyipə pa ɓiyitsa kezha mbeli nyi keve ghəa nci kambeli nyi tiɗiɗi kwa kema ta Shala ba'a nyi keɓelama kweci mbeli. 10Ma ke: «Pa kweci mbeli bake dzeme ghɛa Shala kezha səkwə ghə, nde Fariziyɛn kwete, nde tsehe jaɓeregwale kwete. 11Geɗefalaŋe nde Fariziyɛn slete, ma ke səkwəte ghə: Shala yawe, hana 'ya sha gha va nya ɗema 'ya keyipəte geva le kweci mbeli, ka ghərə, ka mefətekwə, ka gwaya. Hana 'ya sha gha va nya ɗema 'ya kala nde tsehe jaɓeregwale nya tse. 12Bake zhigə mene səwəmayɛ 'ya mbe shikwə kwetɛŋe, pɛtɛ ve ŋa kwa meŋe ta wəshi nyi kedzembe dzeve ta ɗa 'ya. 13Ma nde tsehe jaɓeregwale ne, te sebe nzanyɛ ŋkɛ, kese ŋkɛ kakafe kema kadzeme yitea ghweme we. Ntiŋə ŋkɛ ŋate ghə, ghɛve ghɛve ŋkɛ sha hate ta ŋkɛ, ma ke: Shala yawe, zhɛ heli yitea 'ya, va nya nza 'ya kande jaɗafa.» 14Ma ke Yɛsə mtsehete: «Ma 'ya sha gheyɛ: ma kwa lə wəndə nyagha sha ghɛa ŋkɛ ne, nahe Shala keveyi ŋkɛ kawəndə nya tiɗiɗi, sərə nde Fariziyɛn. Kwa nza ŋkɛ ma wəndə nya kekele ghəa ŋkɛ ne, kateshifə ŋkɛ. Ma wəndə nya keshifə ghəa ŋkɛ ne, katekele ŋkɛ.»

Yɛsə kawəpi ŋwalea fəshi

(MAT 19.13-15; MRK 10.13-16)

15Pa kweci mbeli fəke nda pa le yɛ velɛnjɛ ke Yɛsə kezha ve dzeve ŋkɛ kənəa hɛ. Ma kwa nakɛ wəsəa shɛ mbeli nyi ketəkwə təkwə ne, ntake hɛ kafɛa hɛ. 16Pa Yɛsə hendeke ŋwalea shɛhɛ kase kadzembe hwəa ŋkɛ. Ma ke: «Pelakɛ mə ŋwale kase sha 'ya, fɛama hɛ yɛ ma, kwa nza ŋkɛ kezha mbeli nyi nza mehele ta nci kala ŋa ŋwale veyi geva Meghea Shala. 17Kaganda ne, ma 'ya sha gheyɛ: ma keɗema wəndə kekemaneve Meghea Shala le mehele kala ŋa wəzege ne, katedzembe ŋkɛ we.

Kwete nde mcɛlə

(MAT 19.16-30; MRK 10.17-31)

18Ma ke kwete wəndə nya te ghəa ka Zhəwif 'yɛwete va Yɛsə: Nde sleke ɗa ganyɛ, wa wəsə nya nza 'ya kamenete kezha kemave mpi nya kaghala ghala wa?» 19Ma ke Yɛsə shɛ: «Yite wa heka ɗa na kawəndə ganyɛ wa? Wəndə ganyɛ shɛ keɗema Shala kwetɛŋe we. 20Nahe na keɗepe ghena nyi gezeke Shala: valema na tahe ma, peslema wəndə na ma, ghərəma na ma, sla nda ma tseŋwə na ke wəndə ma, hawe va yiteyɛ ŋa ba'a meyɛ ŋa.» 21Ma ke wəndəa shɛ shɛ: «Nahe 'ya keyate pɛtɛa wəshi nyi se kawəzege.» 22Ma kwa fate ghena shɛ Yɛsə ne, ma ke sha wəndəa shɛ: «Wəsə kwetɛŋe yatene na kamene zhɛkwa, kwiɗi pamte pɛtɛa wəshia ŋa, ndeke nda cɛdɛ nya kese te hɛ ke ka titikwəa kɛfi. Tsagha ne, kwele kwele tekemave mcɛlə na pelɛ ghweme. Ma kwa sebe ta ŋkɛ, se katəkwə təkwə ɗa.» 23Ma kwa fate ghena nyagha wəndəa shɛ, pa heɗete kema, va nya nza ŋkɛ kande mcɛlə. 24Newe ke Yɛsə ne teheɗe kema va wəndəa shɛ, ma ke: «Dzawe ŋkɛ sha ka mcɛləa kɛfi kadzembe Meghea Shala. 25Dzawe ŋkɛ nda nza zlegwemə kajive mbe wəfela ta zhɛliɓə, ama dzawe ma nza ŋkɛ sha nde mcɛlə kadzembe Meghea Shala ɓiyitsa.» 26Ma ke mbeli nyi kefate ghena shɛ shɛ: «Ama wa nde tenza kambele tsagha wa?» 27Ma ke Yɛsə zhɛnete nda ke hɛ: «Ma wəsə nya dzawe sha mbeli ne, dekwede ŋkɛ sha Shala.» 28Ma ke Piyɛre shɛ: «Fa gi, nahe ghen'yɛ kesərəakɛ pɛtɛa wəshia n'yɛ katəkwə təkwə ŋa.» 29Ma ke Yɛsə sha hɛ: «Kaganda ne, ma 'ya sha gheyɛ: ma wəndə nya kesərəakɛ ghɛa ŋkɛ, male ta ŋkɛ, ka kesaka meghekɛ, mbeli nyi keyake ŋkɛ ba'a ŋwalea ŋkɛ tewəmbəreke Meghea Shala ne, 30kwele kwele ma tekemave wəshi ŋkɛ tsetsenya. Ma te kwete və nya ketese ne, mpi nya kaghala ghala yatekemave ŋkɛ.»

Yɛsə kageze mte ta ŋkɛ ba'a same ta ŋkɛ kwa kwele kakwa keɗaŋe

(MAT 20.17-19; MRK 10.32-34)

31Pa Yɛsə hekakɛ mbeli nyi meŋe bakeghəmbe, ma ke sha hɛ: «Wa nya gheɓəmə kadzeme Zhɛrəzalɛm nya teyipə geva pɛtɛa ghena nyi rafete ka mɛ ŋkwa ta Shala te ghəa Wəzege ta za pelɛagha. 32Kateve nda ŋkɛ mbeli ke kweci hwelefefi. Kateŋ'wəshi ŋkɛ mbeli, kateŋele ŋkɛ mbeli ba'a katenciɗi ndɛghwɛɗɛ mbeli kadzete. 33Kateɗa ŋkɛ hɛ le ghweɗa, katepesle ŋkɛ hɛ. Ma te kwa maheke ta hɛ ne, katesame ŋkɛ kwa kwele le mpi.» 34Kefave ghena shɛ mbeli nyi ketəkwə təkwə ya ci'a we. Ma wəsə nya ɗe ghena shɛ kageze ne, tentikə ŋkɛ va hɛ, keɗepe ghena nya mbe ghena nya gezete Yɛsə hɛ we.

Yɛsə kapele nda ntsə ke ghwələ

(MAT 20.29-34; MRK 10.46-52)

35Takwa takwa Yɛsə yitea Zhɛriko ne, ntishɛ kwete ghwələ tagha mɛa hweŋkwa kezha səkwə wəshi. 36Ma kwa fate gaka ta mbeli nyi kedzeyi ŋkɛ kwa hweŋkwa, ma ke 'yɛwete: «Wa wəsə nya kemenete geva wa?» 37Ma ke mbeli shɛ: «Yɛsə nde Nazarɛt nde dzeyi kwa hweŋkwa.» 38Ma ke sha lewela: Yɛsə, wəzege ta David, zhɛakɛ heli yitea 'ya. 39Ntake mbeli nyi kedzeghwa mbe kema ta Yɛsə kaŋele ŋkɛ kezha nza ŋkɛ divə. Ama ma ke zlapete le berete: «Wəzege ta David, zhɛ heli yitea 'ya.» 40Pa Yɛsə ghereŋe ba'a gezete kezha kele nda ŋkɛ mbeli kase. Ma kwa hendeke geva wəndəa shɛ ne, ma ke Yɛsə 'yɛwete ve: 41«Wa yaɗe na kamene ŋa 'ya wa?» Ma ke zhɛnete: «Nde sleke ŋkwa, kezha nakɛ ŋkwa 'ya ɓiyitsa.» 42Ma ke Yɛsə shɛ: «Newe ŋkwa! Nahe yɛ ta ŋa kembelete ŋa.» 43Taghanyɛ, kanewe ŋkwa ŋkɛ. Ntəŋə ŋkɛ yitea Yɛsə le tsahe Shala. Ma kwa nakɛ wəsə shɛ mbeli pɛtɛ ne, ntəŋə hɛ yitea tsahe Shala.

Currently Selected:

Ləwke 18: BEKDC12

Highlight

Copy