Gha ta Wəshi 9
9
Meɗe mɛa Shala ke Nowɛ
1Pa Shala wəpikɛ yɛ Nowɛ le ŋwalea ŋkɛ, ma ke sha hɛ: «Yate mə ya ba'a mbakete mə geva kwele kwele, viɗikɛ mə hɛɗi. 2Pɛtɛ teghazlənə wəshi keseɗa nyi te hɛɗi ba'a 'yɛ nyi yitea ghweme va gheyɛ. Ma pɛtɛa wəshi nyi kedzeghwa te hɛɗi ba'a kelepe nyi kwa ndərə ne, te dzeve hɛ va gheyɛ. 3Yayata wəsə nya kedzeghwa te hɛɗi ba'a nya nza mpi hwe ne, kawəsə kezeme ta ŋayɛ tenza nde kala nya ndeke ŋayɛ wəshi nyi kepese 'ya. 'Ya kave ŋayɛ pɛtɛ tsetsenya. 4Ama katezeme sli nya nza mpi mbe, geze ta ŋkɛ, mimi yɛ we. 5Ma mimia ŋayɛ perə ne, mpia ŋayɛ ŋkɛ. Vatse gɛ, kate'yɛwe ghena 'ya te, kate'yɛwe ghena 'ya va yayata wəsə keseɗa keɗema wəndə nya kepeslekɛ ŋkwa te. Kate'yɛwe ghena 'ya te mpia wəndə ŋelɛ.
6Ma wəndə nya kepeslekɛ wəndə ne,
va wəndə temte ŋkɛ.
Va nya nza ŋkɛ kala ghəa ŋkɛ pate wəndə ŋelɛ Shala.
7Ma gheyɛ le ŋa ŋayɛ gɛ ne, yate mə ya ba'a mbakete mə geva kwele kwele, pesleyi mə geva te hɛɗi ba'a viɗikɛ mə ŋkɛ.»
8Ma ke Shala sha yɛ Nowɛ le ŋwalea ŋkɛ: 9«Katemene jikə geva 'ya le gheyɛ, le ŋwale nyi ketesawa mbe gheyɛ 10ba'a le wəshi nyi nza mpi hwe nyi yitea gheyɛ: yɛ 'yɛ, wəshi keseɗa nyi ki ghɛ ba'a nyi hwa gamba, pɛtɛa wəshi nyi keshave mbe kwambelə ba'a wəshi keseɗa nyi ketenza te hɛɗi lema. 11Katemene jikə geva 'ya le gheyɛ: katezhɛne yɛmə nya wəba kaza wəsə nya nza mpi hwe te hɛɗi we. Katezhɛne yɛmə nya wəba kaza ŋkwa nya te hɛɗi we.» 12Ma ke Shala zhɛkwa: «Wa nya wəsə kencɛ jikə geva nya mene 'ya le gheyɛ ba'a wəshi nyi nza mpi hwe yitea gheyɛ keshi keshi nya: 13'Ya kave rəgia ɗa te ləmbə kezha nza nde kawəsə kencɛ jikə geva nya kwelɛ 'ya le hɛɗi. 14Kala və nya temene ləmbə 'ya kənəa ghəa hɛɗi ba'a nya tenca maɓelɛaŋe ne, 15katezəzə jikə geva nya kwelɛ 'ya le gheyɛ, le mama ta wəshi nyi nza mpi hwe 'ya. Katezhɛne yɛmə nya wəba kaza wəsə nya nza mpi hwe we. 16Ma vəa ŋkwa nya tenza maɓelɛaŋe te ləmbə ne, katenewe ŋkɛ 'ya kezha zəzə jikə geva kwa kiɗima nya menete 'ya le mama ta wəshi nyi nza mpi hwe te hɛɗi.» 17Ma ke Shala sha Nowɛ zhɛkwa: «Gheŋkɛ ya kawəsə kencɛ jikə geva nya menete 'ya le yayata wəsə nya nza mpi hwe te hɛɗi.»
Ŋwale tezhilia Nowɛ mahekene
18Ma ŋwalea Nowɛ nyi keshave mbe kwambelə ne, Sɛm, Sham ba'a Zhafɛt. Sham ya kayiteyɛa Kanan. 19Se mbe ŋwalea Nowɛ nyi mahekenea shɛhɛ yate ya mbeli te hɛɗi.
20Nowɛ ya kande ghate ta nde wəza nya kemɓete wəfe ta rɛzɛŋe. 21Pa ŋkɛ sakɛ tɛa ŋkɛ, ghwəyinyɛ ba'a nzanyɛ mederelaŋe mbe cɛ lekwesa ta ŋkɛ. 22Pa Sham nya kayiteyɛa Kanan nakɛ yitenyɛ mederelaŋe ba'a gezete nda ke ka kesaka meghekɛ nyi bake pelɛ te ŋwela. 23Tagha ne, pa yɛ Sɛm le Zhafɛt kelete lekwesa ta Nowɛ, pa hɛ veyi te bazla ta nci. Shilimə hɛ mbe cɛ lekwesa shɛ le wəmbə le wəmbə, pa hɛ dəpəyi lekwesa kənəa yite nci. Ŋkwa nya laka kwete ŋkwa yanewe hɛ yitea ɗema hɛ kanakɛ yite nci mederelaŋe. 24Ma kwa wetɛaŋe ghwəyia ŋkɛ yitea ghə va Nowɛ ne, pa ŋkɛ fate wəsə nya menete nda wəzege ta ŋkɛ nya ɓɛhwɛ ma. 25Tagha, ma ke:
«Kande bezla bezla nza Kanan!
Nza ŋkɛ kande keɗaŋe
ta ka mene slene ta ka kesaka meghekɛ!»
26Ma ke zhɛkwa:
«Nza zləvə te Mahwətə, Shala ta Sɛm!
Nza Kanan kande mene slene ta Sɛm!
27Ndeke nda hɛɗi Shala kwele kwele ke Zhafɛt,
nza ŋkɛ mbe yɛ cɛ lekwesa ta Sɛm
ba'a nza Kanan kande mene nda slene ke Zhafɛt!»
28Va gwəmsə mahekene ba'a mcɛfemsə menete Nowɛ zhɛkwa kwa sebe ta yɛmə nya wəba. 29Ma kwa menete va ŋkɛ gwəmsə mesli ba'a mcɛfemsə pɛtɛa ŋkɛ ne, mtiwə ŋkɛ.
Currently Selected:
Gha ta Wəshi 9: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.
