Mak 16
16
Jisas mwa Domare nin Mateana
(Mat 28.1-8; Luk 24.1-12; Jon 20.1-10)
1Haḡe ataguna be gubwen̄ mambuharai mwa nogo, Mere Makdalen, i Mere gabe ratahin Semes mai Salome ramuru bol hun wai sasasav bonboni be raru men van ba sasav rebehin Jisas ginia. 2Haḡe mwa ran mabon̄ gaituvwa la Sande alo nu hae huba, ramuru ban vai aben malan̄a. 3-4La hala ramuru avo maginira be, “Ihei vi tatui dum dagai vatu lalai gidaru nin bwan̄on malan̄a?” (Bwatuna vatu gaivua maragai.) Haḡe ramuru garere, i ramuru ḡitae be vatu nu tatuian dagai huba. 5I ramuru haroro lol malan̄a, ramuru ḡita mwalaḡelo vwate mwa dogo la mwatuan malan̄a nu saga gaisaga maita ramuru dan̄an̄a maragai.
6Haḡe atatu mwa avo maira mwa bevea be, “Giru sihav matagu tehe, nam iloe be gumuru hiḡe Jisas ata Nasaret, kea gabe ran voha bolvoloe vai alun volovolo. Kea sigai teti nu tomare mulei! Gita tanona uhu gabe ran taua aia. 7Giru van ba bev roroi uhu lalai ira non roron̄tai mai Pita: ‘Be kea mwa ban dotomua nin kimiu vai Kalili giv gitae aia, kunia gabe nu vev daua lalai kimiu amua.’ ”
8Haḡe ramuru mwalue nin malan̄a ramuru matagu maragai ramuru rovo. Ramuru hav vev te dum ginau gabe raru gitae lalai atat dolua bwatuna ramuru matagu.
NOGONAN LEO TAVUHA ATATUAI LALAI MAK#16.8: Ravrava rituai ata tuai ran leahi avoana i ran hav nogoi te nogonan Leo Tavuha geki lol varana gaisivo vaivotu n̄avul gairua (varana 9-20).
Jisas mwa Bisirai Aben Mere Makdalen
(Mat 28.9-10; Jon 20.11-18)
[9Ataguna be Jisas nu tomare mulei nin mateana mabon̄ gaituvwa la Sande, nu visirai amua aben Mere Makdalen, kea gabe Jisas nu hora lua vui hantai gaibitu ninia. 10Nu van mwa bev serae abera ira buluana non Jisas, i kera ram ron̄mwahantai i ram dei. 11Batena ram ron̄ Mere mwa bevea be Jisas nu rahu mulei, i kea nu gitae sibona, ta kera ram hav binihi te mwasiginia.
Jisas mwa Bisirai Abera Roron̄tai Gairua
(Luk 24.13-35)
12Haḡe atagun ginau geki Jisas mwa bisirai la hala dolua aben ira tarua gairua batena ramuru lago dagai nin bwatutun vanua. 13Ramuru dabagilu ramuru bevurinia lalainira rituai take ram hav binihi te mwasiginira.
Jisas mwa Bisirai abera Han̄vul Domwan Gaituvwa
(Mat 28.16-20; Luk 24.36-49; Jon 20.19-23; Lala 1.6-8)
14Haḡe la nogonana, Jisas mwa bisirai abera han̄vul domwan gaituvwa mahavana be ram ḡan ginau. Kea mwa avo gin avoan wasi lalainira bwatuna nora binihimwasigi garagusi sigai bwatuna be lolora nu wasi be rai binihimwasiginira gabe ran gitae nu rahu. 15Haḡe Jisas mwa bevea lalainira be, “Gin van lol ureure duluai ba doretore huri Leo Tavuha. 16Ihei tehe mwa binihimwasigi i mwa ḡaruhisabuga vi rahu; ihei mwa hav binihi te mwasigi vi vevegia huria. 17Kera gabe ram binihimwasigi vi lai roron̄o lalainira be rav lol ginau dan̄an̄a ivusi; rav goro lua vui hantai ivusi lol ihaku; rav avo gin avoan dodolua; 18be ras haḡo domarei teltel gagasi sa ras mwin wai hantai, sihav lol te hantai dumwira, rav tau limara alun ira harova, kera rav rahu.”
Jisas mwa hae Mulei vai Amare
(Luk 24.50-53; Lala 1.9-11)
19Haḡe ataguna be Jisas nu avo vuvuri maira, kea mwa hae mulei vai amare mwa dogo la mwatuan God. 20Ira roron̄tai ram ban ram doretore vataha ute, i Ratahigi mwa lalaḡo bul maira i mwa dovon̄ainia be nora toretore nu mwasigi gin ginau dan̄an̄a ivusi be ram lolia.]
NOGONAN AVOANA MULEI LOL LEO TAVUHA NON MAK#16.20: Ravrava rituai ata tuai ran leahi avoana i ran hav nogoi te nogonan Leo Tavuha la varana gaisivo-vaivotu n̄avul gairua (9-20).
Mak 16.9,10
[ 9Ira vavine ram ban vai aben Pita mai non buluana duluai ram lai vev huri vwelvwele lalainira huri ginau duluai be nu veveana lalainira. 10Ataguna geki Jisas sibona mwa lalaḡo lua roroi sabuga gabe vi togo vai tuai sivi non roron̄tai lol ureure duluai huri rahuana vai tuai.]
Currently Selected:
Mak 16: HNB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
