Mak 15
15
Ram Lai Jisas vai aben Paelat
(Mat 27.1-2,11-14; Luk 23.1-5; Jon 18.28-38)
1Haḡe mwa ran mwabon̄ gaituvwa ira muai tataroi maira bwatmetua bul mai ira Vagahin Silo maira Kansel duluai ram ḡoḡo vilvilehi ram lol nora taritari. Ram bauhi Jisas gin gao talai i ram lagoi dagainia, ram lin̄ia lalai Paelat. 2Paelat mwa hudalinia mwa bevea be, “Matu giḡo Ratahigi lavoa nora Jius?”
Jisas mwa bwaliua be, “Gom bevea haḡea.”
3Kunia ira muai tataroi ram dul bonogai avoana ivusi vai alun, Jisas, 4Paelat mwa hudali muleinia mwa bevea be, “Matu gosav lai te dum avoan vwaliu huri ginau duluai uhu gabe ram dul bonogainira vai alumwa?”
5Take Jisas mwa hav vwaliu te nora avoana mulei. Bwatuna gea mwa lol Paelat mwa dan̄an̄a maragai.
Ram Bevegi Jisas huri Mateana
(Mat 27.15-26; Luk 23.13-25; Jon 18.39–19.16)
6Lol vataha Samsamwaran Halbisḡalau Paelat mwa ribwes hohoigi atat vwate alolora atat vauhi gabe sinombu ram hudaligi huria. 7Lol mahavana gea atat vauhi vwate gabe ihana Barabas nu togo lol imwa vauvauhi maira rituai ran bwalo mai Kavman i ram wehi atatu. 8Mahavana be sinombu ram ḡoḡo utegaituvwa, ram hudali Paelat huri alen̄a mwa lol hohoinia lalainira, 9haḡe Paelat mwa hudalinira be, “Gim doron be nav ribwes Ratahigi lavoa nora Jius lalai kimiu?” 10Bwatuna mwa ilo didininia be ira muai tataroi ram lin̄ Jisas vai lol limana gin nora sine hantai.
11Take ira muai tataroi ram suvwai sinombu be rav hudali Paelat be vi ribwes Barabas lalainira. 12Haḡe Paelat mwa avo mulei lalai sinombu mwa bevea be, “Matu, gim, doron be nav lol hano lalai wani gabe mwa uloinia be ratahigi lavoa nora Jius?”
13Ram haharigi ram bevea be, “Voha bolvoloe!”
14Take Paelat mwa hudalinira mwa bevea be, “Hava gina hantai nu lolia?”
Ram bato mutmutaigi amare be, “Vohae bolvoloe!”
15Paelat mwa doron be vi lol doroniva non sinombu, i mwa ribwes Barabas lalainira. Haḡe mwa bivilis Jisas vuvuri mwa lin̄ia be vi vohana vai alun volovolo.
Ira Atatun Bwaloana ram lol Leilei Jisas
(Mat 27.27-31; Jon 19.2-3)
16Haḡe atatun bwaloana ram lai Jisas vai lol aran imwan Tomuai vevev i vatugigi duluai huri bwaloana ram ḡoḡo dalisia. 17Ram saga Jisas gin koti memea i ram biri ḡauli gi gaisosorin bwatuna. 18Ram hagai limara huria ram bevea be, “Rahuan n̄ava Ratahigi lavoa nora Jius!” 19Haḡe ram wehia la bwatuna gin gai, ram lodovia, ram hivbwaubwau i ram dai bwatura vai aluna. 20Mahavana be ram lol leilei vuvuria, ram lai dagai koti memea i ram saga muleinia gin mwasin gaisagana. Haḡe ram lai dagainia be vi vohana vai alun volovolo.
Ram Boha Jisas vai Alun Volovolo
(Mat 27.32-44; Luk 23.26-43; Jon 19.17-27)
21Mahavana be atatun bwaloana ram ban maia la hala, ram habwe atatu vwate, ihana Saemon mwa lago be men vano vai la bwatutun vanua ram lolia be vi tatal volovolo non Jisas. (Saemon uhu kea ata Saerini taman Aleksanda mai Rovus.) 22Haḡe ram lai Jisas vai lol ute mwa huiana gi Kolkota, binihiva huria be, “Tanon bwalan bwatun Atatmate.” 23Ram lol ron̄oe be ramen lai waen gabe mwa haḡoan roiroi mai hun gai vwate ihana be mee be men mwinua, take mwa barihainia. 24Haḡe ram boha vuvuria alun volovolo, i ram hara gaisagana, ram bohai dais huri gaisagana be ihei vi lai hava gaisaga. 25Ram bohai vai alun volovolo la alo gaisivo mabon̄i. 26La ulun bwatuna nu tau ravrav seserai be: “Geki Ratahigi lavoa nora Jius.” 27I mulei ram boha bolvolo atat surasura gairua, mai Jisas vwate la mwatuana, i vwate la mwairina. 28La hala geki Ravrava Sabuga mwa mai gi mwasigi batena mwa bevea be, “Mwa mate bultai maira hantai.”
29Sinombu gabe ram ḡao la hala ram daltali bwatura vai aluna i ram bev avoan hantai vai alun Jisas ram bevea be, “Ia! Gon vevea be gov salan̄ai Imwa Tataro, i gov haḡo domarei mulei heheina lol gubwen̄ gaitolu! 30Varahu muleinigo ba himai nin volovolo.”
31Kunia mulei ira muai tataroi mai ira vagahin Silo ram lol leilei Jisas, ram bevea ginginira be, “Nu varahu atat dodolua, take kea sibona sihav varahu te dum muleinia! 32Tan ḡita Kraes, ratahigi lavoa vai Israel, na himai vai ata nin volovolo kadogaha, be tamen binihimwasiginia!”
Kera gairua gabe ran vohara alun volovolo bul mai Jisas ramuru av hantai vai aluna mulei.
Mateanan Jisas
(Mat 27.45-56; Luk 23.44-49; Jon 19.28-30)
33Haḡe abobon alo ute mwa metmeto ḡoro vanua duluai huri mahavan alo gaitolu. 34Haḡe kun alo gaitolu Jisas mwa haharigi amare mwa bevea be, “Eli, Eli, Lama Sabaktani?” binihiva be, “Noḡu God, noḡu God, huri hano gom lin̄iau nam du kunia?”
35Atatu rituai ran tu aia ram ron̄oe, ram bevea be, “Gin ron̄oe wani mwa uloi Elaija!” 36Haḡe tuara vwate ninira mwa rovo darihou mai bwatlumute nu ruhuana lol waen garagara, nu sisian batugehi alun ariu, Haḡe mwa hagai luae vai aben bwan̄on Jisas mwa bevea be, “Tohuba! Tan gitae be Elaija vi mai ba lai huria vai ata nin volovolo!”
37Haḡe Jisas mwa haharigi amare gin silo gaivua vuvuri mwa mwaruruhi.
38Haḡe gavu lol Imwa Tataro mwa mahera bora vora tumu, nu tau bwatuna amare vai votu ata. 39Tomuai ḡoro atatun bwaloana nu tu aia baten gea abwatun volovolo mwa ḡitae kun hanigi Jisas nu mwaruruhi. Mwa bevea be, “Mwasigi wani uhu Nitun God!”
40Vavine rituai ran tu aia hen hautu ram ḡita hano be nu loli. Alolon ira vavine uhu Mere Makdalen, Mere ratahin Josep mai mwaleḡelo Semes i Salome. 41Ran huri Jisas mahavana nu togo Kalili i ram buluia. Vavine rituai mulei gabe ran mai bul mai Jisas nin Jerusalem ran tu aia mulei.
Ram Davi Jisas
(Mat 27.57-61; Luk 23.50-56; Jon 19.38-42)
42-43Haḡe batena Josep ata Arimatia mwa botu mwa sosori huba gin ute ravravi. Kea atat binihi marahi ata lol Kansel, wani uhu mwa do hohov maiana non rahuan gara gabe God mwa bora Ratahigi ḡoro non sinombu alolona. Gubwen̄i gea nu vora gubwen̄ lol dautau huri gubwen̄ mambuharai, i Josep mwa hav matagu tehe, mwa ban vai aben Paelat mwa hudalinia huri rebehin Jisas. 44Paelat mwa dan̄an̄a be Jisas nu mate huba. Kea mwa ware tomuai ḡoro atatun bwaloana mwa hudalinia be Jisas nu mate mahavana n̄ava kunhanigi. 45Ataguna be mwa ron̄ avoana non tomuai ḡoro atatun bwaloana, mwa mahin̄ai rebehin Jisas lalai Josep. 46Josep nu vol gavu vwate mwa nubwa rebehin Jisas alolona i mwa daua lol malan̄a be nu taiana lol vatu. Haḡe mwa datui vat gaivua ḡoro bwan̄on malan̄a. 47Mere Makdalen i Mere ratahin Josep ramuru du ramuru gita hano be nu loli i ute gabe mwa dauana na rebehin Jisas aia.
Currently Selected:
Mak 15: HNB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
