Jon 21
21
Jisas mwa Bisirae aben ira Roron̄tai Gaibitu
1Ataguna geki, Jisas mwa bisirai mulei abera non roron̄tai hurin numbu gaivua Taeberias. Geki halana gabe nu loli. 2Saemon Pita, Tomas gabe mwa (uloinia be malava), Nataniel (atatu nin kera lol vanua Kalili), ira nitun Sebedi, i roron̄tai non Jisas gairua mulei maira. 3Saemon Pita mwa bevea lalainira rituai be, “Namen hivo ba rav gabe.”
Haḡe ram bevea lalainia be, “Tav hivo bulu.” Haḡe kera ram hivo la waḡa, take bon̄i duluai gea ran hav lai te dum ige. 4Mahavana be alo mwa hae Jisas mwa du aia aute, take ira roron̄tai ram hav iloe tehe be kea Jisas. 5Haḡe mwa hudalinira mwa bevea be, “Ira mwalmwalaḡelo, gin lai te dum ige?”
Take ram bwaliua be, “Sigai len̄len̄a.”
6Kea mwa bevea lalainira be, “Giv vohai nomiu gabe la valan waḡa la mwatua, i giv lai dumwia.” Haḡe kera ram bohai gabe i ram hav rav te lua dumwia mulei, bwatuna be ram ḡoḡo ige ivusi maragai lol gabe.
7Haḡe roron̄tai gabe Jisas mwa dabea mwa bevea lalai Pita be, “Ratahigi sibona!” Batena Pita mwa ron̄oe be kea Ratahigi, mwa dau mulei gaisagana aluna (bwatuna be nu lai dagai gaisagana) mwa burere lol tahi. 8Ira roron̄tai rituai ram hae mulei mai botu vai aute, ram rav gabe be nu masiri gin ige. I ute be ran vohai gabe aia mwa hav vora te hautu nin ute aute, mahavana kun meta vudolua n̄ano. 9Mahavana be ram botu aute, ram ḡita manonon gabi aia mai ige alolona i bereti rituai mulei. 10Haḡe Jisas mwa bevea lalainira be, “Gin lai ige rituai gabe gim siv laira.”
11Saemon Pita mwa ḡalo la waḡa mwa rav gabe vai aute nu masiri gin ige, nu dadariha kun vudolu vatuvwa vena n̄avul gailima domwan gaitolu; i gaituvwa n̄an be ige ivusi maragai, ta gabe nuhav mahera tehe. 12Jisas mwa bevea lalainira be, “Gin mai ba ḡan ginau.” Tuara vwate ninira roron̄tai mwa hav vinihia tehe be men hudalinia be, “Giḡo ihei?” bwatuna ram iloe be kea Ratahigi. 13Haḡe Jisas mwa ban mwa lai bereti mwa laia lalainira; i mwa lolia n̄an mulei kunia mai ige.
14Geki, vatoluna be Jisas mwa bisirai lalainira non roron̄tai ataguna be kea nu tomare nin mateana.
Jisas mai Pita
15Ataguna be ram ḡan vuvuri ginau, Jisas mwa bevea lalai Saemon Pita be, “Saemon nitun Jon, matu gom dabeau ninira geki be ram dabeau?”
Haḡe mwa bwaliua be, “Uwe, Ratahigi, gom iloe be nam dabego.”
Jisas mwa bevea lalainia be, “Gov gitaḡoro bilaku sipsip.” 16Jisas mwa bev muleinia varuana lalainia be, “Saemon nitun Jon, matu gom dabeau?”
Pita mwa bwaliua be, “Uwe Ratahigi, gom iloe be nam dabego.”
Jisas mwa bevea lalainia be, “Gov gitaḡoro bilaku sipsip.” 17Jisas mwa bev muleinia vatoluna be, “Saemon nitun Jon, gom dabeau?”
Pita mwa ron̄ mwahantai bwatuna Jisas mwa hudalinia vatoluna be, “Gom dabeau?” Haḡe kea mwa bevea lalainia be, “Ratahigi, gom ilo ginau duluai; gom iloe be nam dabego!”
Jisas mwa bevea lalainia be, “Gov gitaḡoro bilaku sipsip. 18Nam bev mwasigi lalainigo be: mahavana be giḡo mwalaḡelo, gon lol vatuvwai vataha mahavana be gomen van halabehe tehe be gom doron be gomen vano aia. Take batena be gom bwatmetuaga gov sogai lua limwamwa i atat dolua vi vauhigo i vi laigo vai lol ute gabe gom hav doron tehe be gov van aia.” 19(Huria be mwa bevea kungeki, Jisas mwa dugu halana kunhanigi be Pita vi mate be ihan God vi roroa.) Haḡe Jisas mwa bevea lalainia be, “Huriau!”
Jisas mai non Roron̄tai be mwa Dabe Maragainia
20Pita mwa ban burigai mwa ḡita roron̄tai mwa du ataguna, kea gabe Jisas mwa dabea wani gabe nu to sosori Jisas lol mahavan ginaganiana mwa hudaligi be, “Ratahigi ihei be vi sinego?” 21Mahavana Pita mwa ḡita wani gea, mwa hudali Jisas mwa bevea be, “Ratahigi, kunhanigi huri wani geki?”
22Jisas mwa bwaliua mwa bevea be, “Be nav doronia be vi togo vaivotu be nav mai, vi vora kun hanigi lalainigo? Huriau!”
23Haḡe ram bavatui roroi huria alolora gabe ram huri Jisas ram bevea be, roron̄tai geki sihav mate tehe. Take Jisas nuhav vevea tehe be sihav mate tehe; nu vevea n̄an be, “Be nas doronia be si togo vaivotu nai mai mulei, vi vora kunhanigi lalainigo?”
24Kea haḡea roron̄tai gabe nu avo huri ginau kerageki i kea n̄an haḡea mulei be nu rav ḡorora; i gam iloe be havanau be nu vevea nu mwasigi.
Nogonan Avoana
25Ginau ivusi mulei radu gabe Jisas nu lolira. Be si ravan ḡoro goro duluai, nam binihia be ureure duluai sihav haḡo te dum buka duluai gabe si ravana.
Currently Selected:
Jon 21: HNB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
