Zẹkaraya 8
8
Ọmoogh-we phọ aguanaan ooḅulemi aJeruselem
1Ọmoogh-we Oomo Ịikpo ạngo ni Zẹkaraya dom mọ ạḍien mọ: 2“Mị mạwa ghan ni ọloghonaan ạḍighaagh Jeruselem loor esi eboom ẹphomoghian phọ mị ạphomoghian bọ weye phọ ọdi, ẹphomoghian dị meḍighi ịdi mị rạkagham ologhi ẹpomoghian phọ ạbidi. 3Mị katigheel atugh sịphe Jeruselem, ẹmha iigbia phọ ạmi. Kọḅile ghan okol mọ ẹmha omeeraam, ḅịle kẹn kọḅile ghan okol ẹeḅaraph Ọmoogh-we Oomo Ịikpo phọ mọ ẹeḅaraph iigbia. 4Ikumoor awe rꞌikumoor ạnmariir dị mọkpo osi esi dị ọpham eḅu rotelhiom kọḅile ghan ni ọtologhu sịphe egbogh erugh phọ. 5Ḅịle kẹn, ịbam ạnmuny rꞌạnmanyaan komuza ni roḅodo phọ kụ opeghogh ghan reephegh.
6“Esi awe phọ ạbuphe osugha bọ sịphe eelhe phọ ẹkigh mụdi ịphen phọ kétue emite, kụ ọlo ịphen phọ ịmi ị́kparanaan oḍighi. 7Mị kạtagharan weye phọ ạmi ẹpe arikpisi phọ mọsighe bọ bịdi ọghiighi, 8kụ mị ạsighe bịdi ẹpe erumuḍio phọ remite ghan bọ rꞌẹpe erumuḍio phọ remeel ghan bọ kụ mị aḅulemi mọ orugh sịen Jeruselem. Bịdi koḍighi weye ạmi, kụ mị aḍighi Ẹnaan ạbidi dị kạda bịdi asophonaan ghan iiḅi ịiruen.
9“Ịmoogh ọkparam! Nyina rẹnaghan iniin phọ ikpo ọnhu phọ ariil phọ ọghaaph bọ mem mọ ọḅile bọ ropighi Otu Ịiḅereghi phọ ạmi. 10Tụtu kẹteeny bọ sịen phọ oye órue ghan ophir oye mꞌẹnam, ḅịle kẹn oye ọ́rol dị úkiilaan ghan ẹpomoghian phọ ọdi. Mị kụ ụsighe ghan weye ạkpaaghiom weye. 11Kụ ọlo nyịidipho mị rapogh ni kịro ọdo ephoghom weye eelhe phọ ẹphen osugha bọ. 12Bịdi koḅeph ghan ni riiḍien phọ ạbidi rꞌẹepho. Ireeny avain phọ ạbidi kemuum ghan ni rughuuny, ade phọ kesoor ghan ni riiḍien, ḅịle kẹn ọlophia kạbugh ni. Mị kạngo ni oomo phọ ạḍiseph phọ ạḍien phọ weye eelhe phọ ạmi osugha bọ. 13Nyina awe phọ aJuda rꞌỊzirel! Mem dị eten aruuruen uronyonaan ghan kụ oniin ạḅeni ghan nyoniin mọ, ‘Guugulaan ịdipho oogulemi bọ Juda rꞌỊzirel!’ Kụ ọlo mị kịphel inyina, kụ aruuruen phọ oniin agbi ghan ọḅeni oniin mọ, ‘Aḍiniin phọ ạḍiseph phọ ẹteeny bọ Juda rꞌỊzirel kụ ẹteeny aani nyịna!’ Kụ iḍighi kụ ịmoogh ọkparam, kékiilaan.”
14Ọmoogh-we Oomo Ịikpo phọ ạḅem mọ, “Mem mọ ọpo ạburude ạburude phọ anyina oḍighi bọ ịpe ẹghagh bọ ologhi phọ ạmi, mị ugbiighi ni oogulemi ạbidi kụ mị únme ologhi ạmi, mị uḍighi ni ịpe mị agbiighi bọ. 15Kụ ọlo nyịidipho mị ragbiighi ghan ọseph awe phọ aJeruselem rꞌaJuda. Kụ iḍighi kụ kékiilaan. 16#Ẹfe 4.25Ịphen kụ ạraraar dị nyina ẹkpe oḍighi: Oniin ạgba ghan igey kụ ạḅeni nyoniin. Ẹpe aruutu iilogh phọ, isoph ghan iiḅi ịiruen — ịdo phọ ịpe rẹsighe ghan bọ ẹepho keru. 17Oniin kúgbiighiom ghan nyoniin ịkaraph. Kẹ́gba ghan ọkpe mem dị nyina meghunyan ni. Mị akel li ọkpe, ịkaraph ịiruen ḅịle rꞌigbagbaar iḍighinom ạraraar.”
18Ọmoogh-we Oomo Ịikpo phọ ạngo ni Zẹkaraya dom mọ ạḍien mọ: 19“Ọkaagh ẹḍogh phọ ạrol ghan bọ rụnwanyu phọ ịpe emuneniom bọ inya, oogh, oḍual rꞌaḍioph phọ keḍighi mem olhe ghan ẹyaal iboh rꞌọḅaal ologhi awe phọ aJuda. Nyina ẹkpe ọphomoghian igey phọ ḅịle rꞌẹepho.”
20Ọmoogh-we Oomo Ịikpo ạḅem mọ, “Amem mọ retu ni mem dị awe kọḍua ịbadi ạramha kụ otu Jeruselem. 21Awe eniin ẹmha kọḅeni ghan ni weye ẹnon ẹmha mọ, ‘Yoor rọki ọoḅereghi Ọmoogh-we Oomo Ịikpo phọ ḅịle rꞌọlom ạḍiseph phọ ọdi. Ịdaph iyoor’ 22Ịbadi aweye ḅịle rꞌareelhe dị ẹmoogh ni ịikpo kotu ni Jeruselem ọoḅereghi Ọmoogh-we Oomo Ịikpo phọ ḅịle rꞌọlom ạḍiseph phọ ọdi. 23Riiḍio phọ ịpe phọ, ḍioph aruuruen kotu ghan ni ọteeny oniin ọnyo aJu kụ ọḅeni mọ, ‘Yoor rọwa ophinomaam aani eseeriom mọ anyina, loor esi dị yoor mọnaghan ni mọ Ẹnaan edi ni rꞌanyina.’”
Currently Selected:
Zẹkaraya 8: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
