Zẹkaraya 9
9
Ịiruen dị osophonaan rạmha phọ etuman bọ
1 #
Azay 17.1-3; Jer 49.23-27; Ẹmos 1.3-5 #
Azay 23.1-18; Izik 26.1—28.26; Joel 3.4-8; Ẹmos 1.9, 10; Mat 11.21, 22; Luk 10.13, 14 Ḍịen kụ adom Ọmoogh-we phọ:
Ọdi mạto mọ kọliom ni de phọ aHadrak rꞌẹmha phọ ạDamaskos. Arughunughun phọ Ịzirel ḅịle rꞌẹkpana ẹmha phọ ạSiria eḍighi ni ịlo Ọmoogh-we phọ. 2ẠHamat phọ odi bọ ọku aHadrak, ọlo ọdi phọ kẹn ni; ịduon phọ kẹn kụ ịdi igbogh ạramha phọ aTaya rꞌaSaidon rꞌoomo ẹmaar phọ ạbidi eḍighi ni ịlo ọdi. 3ATaya maghoony akitonom loor ọdi, ạḅile atool silva rꞌagol akpol dị ẹkigh ịikpelem! 4Kụ ọlo Ọmoogh-we phọ kạsighiogh ni tọrotoro ịyaar lọ bịdi ọmoogh. Ọdi kạsighe ni ẹelha phọ ạbidi atoph asumughi ọphiiny, kụ ọlogh nịan ẹmha phọ.
5 #
Azay 14.29-31; Jer 47.1-7; Izik 25.15-17; Joel 3.4-8; Ẹmos 1.6-8; Zẹf 2.4-7 Ẹmha phọ Askelon kẹmiin ni ịphen phọ kụ aruugu asiph. Ẹmha phọ aGaza kẹmiin ni ịphen phọ kụ epin loor ạbidi iboom. Ịduon phọ kẹn ni kụ kẹtolonaan Ẹkron, ḅịle kẹn oḍuom ologhi phọ ạbidi kape ni. Ọdaam mọ aGaza kạ́tol mun, ḅịle kẹn oye kạ́tol mun Askelon. 6Ọdo kịrokiro awe kụ kọtol Ạsdod. Ọmoogh-we phọ ạḅem mọ, “Mị kasooromi we aFilistia phọ ạbuen phọ ophoophe bọ siloor phọ ạbidi. 7Bịdi kọ́ba ghan mun ẹnam lọ emughom ịḅaal mụghumo ole ẹnon eḍien lọ eḍighi ugbini ugbini. Oomo awe phọ ạbuphe kosugha bọ koḍighi pạkiri awe phọ ạmi, kụ ọkigh ọto eghun phọ aJuda. Ẹkron kaḍighi pạkiri awe phọ ạmi ịdipho aJebusait oḍighi bọ. 8Mị kaako ni de phọ ạmi, ḅịle kẹn mị kámeera awe ẹgham ạay ghan oten. Mị kámeera mun ịkaraph awe ọda ọgbiphoghom weye phọ ạmi. Mị mạmiin ni ịpe awe phọ ạmi mọmiinom bọ.”
Ọdaam-ẹmha dị ratu
9 #
Mat 21.5; Jọn 12.15 Weye ạZayon, ịmoogh iboh, ịmoogh iboh!
Nyina awe aJeruselem, ịlo ḍịolho iboh!
Ịmiin, ọdaam ẹmha phọ anyina ratu ọteeny anyina!
Ọdi ratumom ịikpo rꞌọkpar opu,
kụ ọlo asooromi ni loor kụ aḍigh ẹnam adool —
ẹnam mọ eḍighi elephiri ẹnam adool.
10 #
Ạsuo 72.8
Ọmoogh-we phọ ạḅem mọ,
“Mị kạsighiogh rughuugh ẹgham ude sịen Ịzirel
ạḅile ạsighiogh rụsu phọ sịen Jeruselem;
Ạsikumugh phọ rọkimom ghan bọ ẹgham mọ kebunughian ni.
Ọdaam-ẹmha phọ anyina rꞌịpheri phọ areelhe phọ kọtol li rꞌẹepho;
Ọdi kạda ni emiigh otu-ḅualhe kụ ẹghi ẹteeny otu-ḅualhe,
emiigh ẹpe Ọphiiny aYufratis kụ ẹghi esi ruukuna ade phọ.”
Ọḅile ooḅulemi awe phọ Ẹnaan
11 #
Ẹḍua 24.8
Ọmoogh-we phọ ạḅem mọ,
“Loor esi ịyo phọ ạmi rꞌanyina,
ịpe ọmeremiom bọ rꞌịḅaal ạrikia phọ,
Mị kạtagharan ni weye phọ anyina —
bịdi opun ooni ạdol iiruen phọ.
12Itigheleghu, nyina phọ edi bọ dọl iiruen phọ kụ ẹmoogh bọ ni oḍuom ologhi;
Itigheel esi ạdol ẹereegh phọ anyina.
Mị rịḅeni inyina nyịidipho. Mị kạsighe ni ḍịseph kụ ịkpiom inyina
apeelhe ịyal amem esi oomo ịpe nyina mẹmiinom bọ.
13Mị kạsighe Juda kụ aḍighinom ịdipho ạkumugh oye ẹgham
kụ Ịzirel ịdipho ịkpina phọ.
Mị kaḍighinom weye phọ ạZayon ịdipho elhool ẹgham,
kụ atuphiom ẹgham weye aGris.”
14Ọmoogh-we phọ kamite ni ạnyu awe phọ ọdi;
Ọdi kạtaph ni ịkpina phọ ọdi ịdipho aḍio lọ rẹmepheghian.
Ọkar Ogbogh Ọmoogh-we phọ kapula ni ọkuodu phọ;
Ọdi katelhe esi oghim mọ ạḍua bọ ẹpe esoorom mọ.
15Ọmoogh-we Oomo Ịikpo phọ kaako ni weye phọ ọdi,
kụ bịdi oogulemi ẹpomoghian phọ ạbidi.
Bịdi kọlooghi ghan ẹpe erugh ẹgham mọ ịdipho awe lọ amiim rakiigh
kụ bịdi ozu ịḅaal ẹpomoghian phọ ạbidi;
ịḅaal phọ kekil ịdipho ịḅaal ẹkia lọ ọsighe loor ẹkpa
kụ ooku sịphe enmeny phọ.
16Mem dị aḍio phọ ạḍiphe phọ ketu bọ, Ọmoogh-we phọ kạpel li weye phọ ọdi
ịdipho okoriom iyool-ịga phọ rạpel ghan bọ ḍita iyool-ịga phọ ọdi esi ịiḅaghami.
Bịdi kọmu ni sịphe ade phọ ọdi
ịdipho ịbekulari lọ ọdamaghi eghoony ọdaam-ẹmha.
17Ẹpe eeghia ẹnighe dị ade phọ kẹnighe!
Ugheel ạnmuny phọ kọmoogh ni ịikpo
esi olhe ghan ịbiakpa ade phọ rꞌọphughol amiim ade phọ.
Currently Selected:
Zẹkaraya 9: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
