Zẹkaraya 7
7
Ọmoogh-we phọ akel li ọkaagh ẹḍogh dị ị́ḍua eekuna ologhi
1Lhạ dị emuneniom inya sịphe ọda phọ ạDarios ogbogh ọdaam mọ, ḍio dị emuneniom inya esi ụnwanyu phọ ọpo amuneniom bọ esugha (ụnwanyu aKislev), Ọmoogh-we phọ ụngo ni ịmi dom.
2Awe phọ ạBetel morom Sarezer rꞌaRegem Mẹlek rꞌawe phọ ạbidi mọ ọghi sịphe Otu Ịiḅereghi Ọmoogh-we Oomo Ịikpo phọ ọoḅereghi ọlom ḍịseph Ọmoogh-we phọ 3ḅịle rꞌopuru ariil ạrikia phọ rꞌariil phọ ḍipuru phọ ạḍien: “Ẹkpe ni ḍụghum dị yoor kọtolonaan esi ọto loor esi ịduon phọ moogulemi bọ Otu Ịiḅereghi phọ, ọkaagh ghan ẹḍogh ụnwanyu phọ ọpo amuneniom bọ oogh phọ ịduon yoor moḍighi bọ sịen ịbadibadi ạsia?”
4Ḍịen kụ adom Ọmoogh-we phọ eru bọ ịteeny ịmi. 5Ọdi ạḅem mọ, “Ḅẹni weye ade phọ rꞌariil ạrikia phọ mọ mem mọ ọpo bịdi ọkaagh bọ ẹḍogh phọ ọḅile ọrol esi ọto rụnwanyu dị emuneniom oogh rꞌoḍual sịen oḍualdi ạsia phọ ịphen, nyina íḍighi ghan ịphen phọ oghueniom ạmi. 6Ḅịle kẹn mem lọ bịdi olhe ọḅile ọphughol, bịdi ulhe ghan ọphoomiom ạruuphua ạbidi ni.”
7Ịphen kụ ịdi Ọmoogh-we phọ marom ghan ni bụḅel ariil phọ kụ ọghaaph mem mọ ọpo ẹelha rꞌawe omuza bọ ni Jeruselem ḅịle rꞌamem mọ ọpo aḍita awe kụ orughogh bọ ni rạmha phọ ekoom bọ egbogh ẹmha phọ kụ ọḅile orughogh ẹpe esoorom mọ rꞌẹpe ọgbal aroogbolom mọ ẹpe erumuḍio phọ remeel ghan bọ.
Ẹ́naghanan kụ ịkom bọ dọl iiruen phọ
8Ọmoogh-we phọ ạngo ni Zẹkaraya dom mọ ạḍien mọ: 9“Mebia ni iboom mị ạto bọ ịphen phọ ạḅeni weye phọ ạmi: ‘Ịmaar ẹmiin mọ oogbo ghan ni iiḅi ịiruen, ḅịle kẹn oniin ạmoogh ghan ọnma ighirigiir esi oniin. 10Kẹ́gbiphoghom ghan rukpukele ạnmariir mꞌạbunyigo ạnmuny mꞌaruuruen lọ orugh sịphe ogbo anyina, mꞌạtorobo oye lọ odi esi ịiḅaghami; ḅịle kẹn, oniin kúgbiighiom ghan ịkaraph nyoniin.’
11“Kụ ọlo awe phọ ạmi ụ́ḅaar ri ẹmhu iboom kụ úmeera ụ́naghanan. Bịdi ụkparami ni iloghi 12kụ arokpom mọ ạbidi ẹkpar ịdipho aḍighiigh. Loor esi dị bịdi úmeera bọ ụ́naghanan ịtughemi phọ mị arom bọ bụḅel ariil phọ kụ ọtughemi, mị ụghagh ni ologhi iboom. 13Loor esi dị bịdi úmeera bọ úler rụru mem mọ mị ạghaaph bọ, mị ụ́pagharanaan mun mem mọ bịdi ọoḅereghi bọ. 14Mị uḍighi ịdipho oghim kụ aḅeer bịdi ạsighe ạghi iiruen areelhe. Ịma phọ ade phọ ạḍien ịrol bịn eten ẹekpua dị oye útugh.”
Currently Selected:
Zẹkaraya 7: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
