Ạsuor 7
7
Ịiḅereghi ịlo iiḅi ịiruen
1Ọmoogh-we, Ẹnaan ạmi, nạ kụ ọdi mị aḍuom ologhi.
Ụphel ịmi ạsighe esi oomo ạbuphe ruphorogh bọ ịmi, ạḅile ụtagharan ịmi,
2ọbo ịdipho ạnam-dịka bịdi kurool ịmi ọḍuanam
esi dị rꞌoniin ịmi kụ́phel,
kụ ẹpe phọ bịdi kụphanyi ịmi ịpherepe.
3,4Ọmoogh-we, Ẹnaan ạmi, eru mạar dị mị maḍighi ghan ni ịphen phọ,
eru mạar dị mị maḅulemian ghan ni ịkaraph ọyaghiri,
eru mạar dị mị mạphueghi ghan ni rạraar ọnon oye dị ịmi mạar úḍighi,
eru mạar dị mị maḍighi ghan ni ịphen phọ,
5pọ ạmulogh-ḍien phọ ạmi uphorogh ịmi, usiph ịmi,
ughiigh ịmi ạwile pạ ade phọ bịn!
6Ọmoogh-we, ḅetenuom rꞌọghagh ologhi phọ ạna
ạghi azuom bụmulogh-ḍien phọ ạmi.
Guuguna ụlhoghonaan ịmi ḍịghaagh.
Igey ịiruen kụ ẹdi nạ rạwa ghan bọ.
7Kpookpomoghi oomo awe ịsien aḅirini phọ bịdi okoom nyịna,
kụ ạrol ẹpe kꞌạke phọ ạda bịdi.
8Nạ Ọmoogh-we kụ oogboom ịiruen oomo aḅirini phọ.
Soph ịiruen ugheelemi ịmi.
Nạ alegheri ni mọ mị úlegheri aani oomo phọ ịphen phọ.
9 #
Ogon 2.23
Nạ kụ Ẹnaan aruukuan
dị rạaḅeghion ghan iloghi rꞌạruuphua awe.
Seseeny, ḍighi ịdi ạsipioghom abuḍighinom ịkaraph phọ kekunughian,
kụ ạkpeeghi aḅulemian bụo aruukuan phọ ịpe bịdi oḍighi bọ.
10Ẹnaan kụ riiko ghan ịmi.
Ọdi kụ rạpel ghan bụphe iloghi phọ eseleman bọ katene.
11Ẹnaan raagbonaan ghan ịiruen bụo aruukuan phọ,
kụ rạkagham ghan ologhi bụo ạsipioghom mọ tọrotoro aḍio.
12Eḍighi mạar dị bịdi únme rọozo phọ ạbidi,
Ẹnaan kakola ni elhool ẹgham mọ ọdi,
ạkpami kụmugh phọ ọdi kụ akoriom ghan.
13Ọdi maakolobinaan nyọdi rẹenema aḍuugh
kụ agbon ịkpina phọ ọdi asomoriom bụo ịgbiphoghom mọ.
14Mịin ịdi remitenaan ghan
oye lọ ragbiighiom ghan ọnon oye ịkaraph rꞌịlo ị́nighe.
15Ọdi aguph ghẹle ạmaar ạagelion,
kụ ọdi kụ ạḅile asuma ghẹle phọ ọdi aguph bọ.
16Ịkaraph phọ ọdi agbiom bọ bụnon meḅula loor ọdi,
kụ ẹkpar phọ ọdi meḅula repuru nyọdi.
17Mị kaboom Ọmoogh-we phọ ịlo aruukuan phọ ọdi.
Mị kạmoor sụor aboomiom ḍien Ọmoogh-we Ọkaraghi Ogbogh phọ.
Currently Selected:
Ạsuor 7: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
