Ạsuor 69
69
Emoghi ọloghonaan ạḍighaagh
1Ụphel ạmi, Ẹnaan.
Ạmuum masi orum ạmi;
2mị raḅi loor ọgbudu,
kụ esi ọdaari ẹda ílho;
mị masuma ḍigher ạmuum,
kụ oologh rạwa oḅiemi ạmi.
3Mị maminenom loor esi ịlooghi ịlom ọloghonaan ạḍighaagh
kụ ẹḍogh ạmi repin.
Mị mạnmagharan riḍien iboom
kụ mị odi ghan rakori ọloghonaan ạḍighaagh ạna.
4 #
Ạsuo 35.19; Jọn 15.25 Bụphe ụlogh bọ ịmi ḍien phọ dị ẹmhu ílho
oḍiza opu sịlaal ẹmhu ạmi.
Ạbumulogh-ḍien ạmi rụgbaaghiom ghan ịmi ọkpe;
bịdi awe ịikpo kụ rọwa oghiigh ạmi.
Bịdi uḍighi ịdi mị aḅulemi rạraar dị mị kụ úmi.
5Ịkaraph ạmi, Ẹnaan, ị́booghian ghisigh ạna;
nạ alegheri ni elologhi ạmi.
6Kámeera mị aruomaan umugholoor bụphe ọkpasi bọ ịitughian phọ ạbidi esi ạna
Ogbogh Ọmoogh-we Oomo Ịikpo,
Kámeera ụtuan ịmi bịn umugholoor asiph bụphe ooseeny bọ nyịna,
Ẹnaan Ịzirel.
7Loor ẹmhu ạna kụ ẹdi ụḅeni yogh bọ ịmi
kụ umugholoor uzuoghom ịmi.
8Mị ạkigh ooruen esi abumor ạmi,
mụdi ọlo ẹnon eelhe sịphe ogbo eghunotu ạmi.
9 #
Jọn 2.17;
Rom 15.3
Oseere ologhi sịphe Otu Ịiḅereghi phọ ạna reemor ghan ekpom ạmi ịdipho ạnian;
iitunyian ạbuphe rootunyi ghan bọ nyịna misoroghuom ịmi.
10Mị asooromi loor ạmi reten ọkaagh ẹḍogh
kụ awe rụḅeni yogh ghan ịmi;
11Mị ạkpologhian loor ạmi iinmenan ọto,
kụ bịdi rụmilogh ghan ịmi.
12Bịdi rọkaaph ghan ịlo ạmi sịphe oomo ịbam areten phọ,
ḅịle ạbupughol miim rụmooroghom ịmi sụor.
13Kụ ọlo ẹlo ạmi, mị kạaḅereghi nyịna, Ọmoogh-we;
ụphagharanaan ịmi, Ẹnaan, mem lọ ẹḅeeraan nyịna.
Ụphagharanaan ịmi loor eboom ẹphomoghian phọ ạna
loor esi dị nạ aḍighi amitiom oguanaan phọ ạna ọphel ạmi.
14Ụtophoron ịmi aphune sịphe ọgbudu phọ, kámeera mị aḅi;
ụphel ịmi ạsighe esi ạbumulogh-ḍien ạmi,
uphune ịmi ạsighe sịphe aḍigher ạmuum mọ.
15Kámeera amugbogh ạmuum ụminighom ịmi;
kámeera mị aḅi sịphe aḍigher phọ,
ḅịle mꞌosuma ologhi oḍi.
16Ụnaghanan ịmi, Ọmoogh-we, esi ẹnighe ẹphomoghian phọ ạna rémuneen ghan bọ;
esi eboom ẹphomoghian phọ ạna rémuneen ghan bọ kiton usoman ịmi.
17Kạ́booghi loor phọ ạna esi otelhedom mọ ạna;
mị odi esi iboom ịiḅaghami — ụnaghanan ịmi nyịidipho.
18Tue ụteeny ịmi ụphel ịmi;
ụtagharan ịmi rạghaagh ạbumulogh-ḍien phọ ạmi.
19Nạ alegheri ni ịdi rụḅeni yogh ghan ịmi,
ịdi ruufolomi ghan ịmi kụ ọḅile usooromi ịmi;
nạ ạmiin ni oomo ạbumulogh-ḍien phọ ạmi.
20Ịḅenian mẹphue ekpom ạmi
mị odi dọl okururu.
Mị ạnmanaghian oye lọ rụseenyaan ịmi kụ mị ụ́miin;
ọlo rụudereghi ịmi kụ mị ụ́miin.
21 #
Mat 27.48; Mạk 15.36; Luk 23.26; Jọn 19.28, 29 Mem dị ọkoony usiph ịmi, bịdi ụngo ịmi elu oboom-oḍigh;
mem dị ạmuum ụphu ịmi, bịdi ụngo ịmi mụkpueneen amiim.
22 #
Rom 11.9, 10 Egbogh ẹkpa eḍien ạbidi kụ eegulemi bịdi;
eḍien ẹlo ạrayaal iigbia ạbidi kụ eruomaan emeel ạbidi!
23Ḅomoghi riḍien ạbidi ịlo ịiḍaany!
Dughe rạman ạbidi oomo amem!
24Kạgham bịdi ologhi;
ḅịle ạghelhe phọ ạna asoroghuom bịdi!
25 #
Iiḍ 1.20
Amarugh ạbidi aḍighi ọkpagha;
rꞌoniin oye kútugh mun sịphe arugbogo phọ ạbidi.
26Bịdi ọgbiphoghom bụphe nạ mạlhiom bọ;
bịdi rọkaaph ghan ịlo ịminimiin awe phọ nạ maḍighi yogh bọ rạraar phọ.
27Gẹeghi ịkaraph ạbidi ạlogh ḍịnya;
kámeera bịdi ọmoogh esi sịphe ạpeleeny phọ ạna.
28 #
Ẹḍua 32.32; Ogon 3.5; 13.8; 17.8 Ḍighi ịdi kogbuurogh siḍien ạbidi sịphe ạḍinya ạbuphe odi bọ eye;
kụ́loghom bịdi sịphe aḍita awe phọ ạna.
29Kụ ọlo mị odimom riiphina rꞌokururu;
uphoophe ịmi, Ẹnaan, ḅịle ụphel ịmi.
30Mị kạmoor ḍụor ạsephom Ẹnaan;
mị kagbeelom igbogh phọ ọdi esi ọngo ghan ọdi ḍịseph.
31Ịphen kụ kẹḅeeraan Ọmoogh-we phọ epu ọsighe ạnam oḍighinom ịyaar aghuḍum kụ ọngo ọdi,
epu ọsighe aḍilephiri ạnam dị ạmanam oḍighinom ịyaar aghuḍum.
32Mem dị bụphe mọmiinom bọ ịminimiin ọmiin ịphen phọ, bịdi kọmoogh ọḅaal ologhi;
bụphe ooseeny bọ Ẹnaan kọmoogh oḅio dị ạkpar.
33Ọmoogh-we phọ rạnaghanan ghan ni bụlo odimom ẹkparam
ḅịle rábula ghan we ọdi lọ odi otu ikoli.
34Iboom Ẹnaan, kẹ rꞌade,
rịphiiny rꞌoomo ạraraar lọ ediighi ologhi.
35Ọdi kạpel li Jeruselem,
ạḅile aselemi rạmha phọ aJuda.
Awe ọdi kọtol sịphe kụ ọmooghom de phọ.
36Ạnmuny ạnmuny abutelhedom ạbidi kole ni erua ịpa phọ,
kụ bụphe ọphomoghian bọ ḍien phọ ọdi otugh sịphe.
Currently Selected:
Ạsuor 69: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
