YouVersion Logo
Search Icon

Ạsuor 68

68
Ạḍuor ọkpar opu
1Ẹnaan reḅetenu ghan kụ kạawalami bụmulogh-ḍien ọdi.
Bụphe ọlogh bọ nyọdi ḍien rokiil ghan kosuma dị mọkpar opu bịdi.
2Ịdipho ropula ghan bọ mụghi kọwalalami, ịdipho kụ ẹdi nạ kaporogh bịdi ạwalalami;
ịdipho oba rạgbo ghan bọ loor ạnian,
ịdipho kụ ẹdi ạbukaraph kope egbodo Ẹnaan.
3Kụ ọlo awe aruukuan phọ rọḅaal ologhi kụ oboh risigh ọdi;
bịdi rọmoogh ghan iboh kụ kọlo ḍịolho iboh.
4Ịmoor sụor ẹngo Ẹnaan, ịmoor eboom ḍien phọ ọdi;
iseleminaan eten nyọpo ratelhe ghan bọ ẹdala phọ.
Aḍien phọ ọdi — Ọmoogh-we phọ. Ịmoogh ọḅaal ologhi risigh ọdi.
5Ẹnaan, ọpo odi ghan bọ ologhi Otu iigbia phọ ọdi,
ạmaar ghan rạpam bụnyigo ạnmuny kạḅile ạmaar aphogh rukpukele ạnmariir,
6Ọdi ramitiom ghan esi ọrol bụlo otu úlho
kạḅile aḍiemiom bụo ikoli ọrol ạdol ẹereegh rꞌibo.
Kụ ọlo awe ọḅaar ẹmhu kọtol de lọ awe úlho ghan.
7Ẹnaan, mem mọ nạ aḍiemiom bọ we phọ ạna,
mem mọ nạ agbiriph bọ erelhe ạḅeeny de ọosaar phọ,
8 # Ẹḍua 19.18 ade phọ iphiigha ni, kụ okuaḍio asereghi ude ọlophia,
loor ẹmhu eru Ẹnaan phọ aSainai,
eru Ẹnaan phọ Ịzirel.
9Nạ uḍighi ịdi ọminighan ọlophia ạloph
kụ ạḅile ạasa ḍịgharaghar ade phọ meminenom bọ.
10Awe phọ ạna oḍighi sịphe dọl ạbidi;
esi egeny eḍighinom ịyaar phọ ạna, nạ ạngo rukulom phọ eḍien olhe.
11Ọmoogh-we phọ ạto ạngo,
kụ ịbadi ạnmariir oleenye iphiligba phọ:
12“Ạbudaam rꞌawe ẹgham ạbidi rosumughu.”
Ạnmariir phọ osugha bọ iloghi aruutu phọ udianagh rạraar phọ owum bọ:
13ịkaaneen arukuru-ghọzo dị okpoghom silva,
dị araphaaph ẹnmana mụdi ogey agol.
(Uḍighi ika kụ buniin anyina eeḍikuan bọ rꞌiyool-ịga sịphe arugbogo phọ ḍio ẹgham mọ?)
14Mem mọ Ẹnaan Oomo Ịikpo phọ ẹewalami bọ bụdaam mọ sịphe Eegum aZalmon,
ọdi aḍighi ịdi ibikpo esoor sịphe phọ.
15Pọ eeghe eboom Eegum ạBasan phọ,
eegum ịbadi ịsogolo ariisi!
16Esi ika kụ nạ ạrol bọ egbogh ẹsogolo esi phọ ạna
kụ aphogh ude ịlo ạrigilaam ạnyu eegum phọ
Ẹnaan mẹsaḅar bọ ọrol phọ?
Ọmoogh-we phọ kạtol li sịphe kꞌagee-pọ.
17Rꞌịbadi ạsimuunir igbogh arughuugh ẹgham mọ ọdi,
Ọmoogh-we phọ ạḍua Sainai aru aḍigh esi iigbia phọ.
18 # Ẹfe 4.8 Ọdi agheel riisi ạnyu kꞌạke,
asiphi ịbadi awe ạḍuanam,
ạanyi ruunmo rạghaagh awe ọḅaar ẹmhu.
Ọmoogh-we Ẹnaan phọ kạtol li sịphe.
19Iboom Ọmoogh-we phọ,
ọpo ratool ghan bọ ịiḅaghami ayira ḍio etum ḍio;
ọdi kụ Ẹnaan phọ rịphel ghan bọ iyira.
20Ẹnaan ayira Ẹnaan dị rạpel ghan;
ọdi kụ Ọmoogh-we, Ọmoogh-we phọ ayira,
ọpo rụtagharan ghan bọ iyira esi aḍuugh.
21Ẹnaan kẹmiin ni mọ ọno ạgurogh ni rụmhu ạbumulogh-ḍien ọno,
bụphe ọkananaam bọ reten ịkaraph phọ ạbidi.
22Ọmoogh-we phọ mạḅem, “Mị kạsighe ni ẹpomoghian phọ anyina ẹpe Bạsan aḅulemi;
mị kạtophion ni bịdi sịphe aḍigher otu-ḅualhe phọ apune,
23ẹrol dị nyina ẹguph ogbo ịḅaal ạbidi,
ḅịle asuogh anyina ẹlaay ịlo bịdi ketue.”
24Ẹnaan, oomo awe mọmiin ni ekakara erelhe ọkpar opu phọ ạna,
mọmiin ịdi ạḍikool awe Ẹnaan, ọdaam ạmi, rọki esi ạdol iigbia phọ ọdi.
25Ạbuo ọmoor sụor phọ odi ghisigh, ạbuo iitia phọ odi ọman,
ogbo ạbidi ạnmanyaan dị rọsagh ịsagha kụ odi.
26“Iboom Ẹnaan sịphe ookpomoghan awe phọ ọdi.
Iboom Ọmoogh-we phọ, oomo anyina ạnmuny ạnmuny ạJekob.”
27Sịphe awe phọ oru bọ osi, ạbuḅel phọ kụ eghun ạBenjamin, eghun phọ ẹkar bọ eghom;
bụdi otum pạ, abuḍiemiom aJuda rꞌaḍita ạbidi,
ḅịle rꞌabuḍiemiom ạZebiulon rꞌạNaftalai.
28Ḍeenaan ịikpo phọ ạna, Ẹnaan,
ịikpo phọ nạ aghol bọ ẹmhu ayoor aḍighinom
29sịphe Otu Ịiḅereghi phọ ạna ẹpe Jeruselem,
esi phọ ạbudaam ọsighe bọ ruunmo oruomonaan bọ nyịna.
30Ḅạamogh weye Ijipt, bụphe ọghigh bọ ilhom ịnam mọ edi bọ loor ikpu phọ;
ḅạamogh weye areelhe kịrokiro, bụphe ọghigh bọ ilephiri ạsinam rꞌạnmuny ạbidi,
tụtu oomo ạbidi okpuḍughian kụ ọngo nyịna silva ạbidi.
Wạawalami oomo awe phọ ạbuphe ạraagham kụ ẹḅeeraan bọ.
31Ạruukpaany kọḍua ni Ijipt kụ otu;
awe Ẹtiopia kopoophe rạghaagh ạbidi ọoḅereghi Ẹnaan.
32Ịmoor eboom Ẹnaan, oomo areelhe aḅirini phọ;
ịmoor sụor oboomiom Ọmoogh-we phọ,
33ọpo rakiilom bọ okuaḍio,
okuaḍio ageedi phọ.
Ịnaghan ịdi ọdi ạlho ḍịolho rꞌegumaguma ẹḍogh.
34Gbeelom ịikpo phọ Ẹnaan;
ịikpo phọ ọdi kụ ighoph Ịzirel,
igbogh phọ ọdi esi ni okuaḍio phọ.
35Kọsighe eeghe kụ ọtomaam egbogh eegu dị Ẹnaan, Ẹnaan phọ Ịzirel, ẹpham
mem dị ọdi amite dọl iigbia phọ ọdi?
Ọdi ạngo ịnyaam rꞌịikpo we phọ ọdi.
Iboom Ẹnaan!

Currently Selected:

Ạsuor 68: ẠḌI

Highlight

Share

Copy

None

Want to have your highlights saved across all your devices? Sign up or sign in

Free Reading Plans and Devotionals related to Ạsuor 68

YouVersion uses cookies to personalize your experience. By using our website, you accept our use of cookies as described in our Privacy Policy