Ạsuor 10
10
Ịiḅereghi ịlo iiḅi ịiruen
1Ọmoogh-we, uḍighi ika kụ nạ ạmeera bọ kꞌẹpe egher ịdipho?
Uḍighi ika kụ nạ ạbooghian bọ mem ịiḅaghami phọ ayoor?
2Abuḍighinom ịkaraph phọ opoophe loor ạbidi kụ rọgbiphoghom rukulom mọ.
Ḍighi ịdi bịdi kụ komeleghu siphil phọ bịdi ọkpamaghi bọ.
3Oye ạsipioghom mọ raatumaam ghan ịkaraph ạruuphua phọ ọdi.
Ọdi ạseph ghan bụo ekpooko kụ apogh Ọmoogh-we phọ asooromi.
4Ọkaraph oye ọ́maghami Ẹnaan ịyaar;
ịitughian ịlo Ẹnaan ologhi ọdi ílho ghan.
5Oomo ạraraar rẹnighenaan ghan ni ọkaraph oye.
Ịiruen phọ Ẹnaan ọdi ólhegheri.
Ọdi apogh bụmulogh-ḍien phọ ọdi ạḅitonaan.
6Ọdi rạḅem ghan pạ ologhi phọ ọdi mọ, “Dọl phọ ạmi ạḍien ịmi kụ́aar.
Mị rꞌamem kạ́tol esi ịminimiin.”
7 #
Rom 3.14
Pạ ọnhu phọ ọdi iitunyan, ọkpe rꞌịidegheghan bịn kụ edi ghan.
Ịkaraph ikpo ọnhu rꞌọwa asighiton emuza ni pạ anem mọ ọdi.
8Ọdi ạbooghian aḅona pạ ạramha phọ rakori ghan we dị mạar ụ́piom ọze,
kụ rạnmanaghian ghan ọmiin ạbulo ọdi kạmiine.
9Ạmina ạbooghian, ịdipho ạnam-dịka
rakori ghan rukulom mọ;
ọdi rasiphi ghan bịdi sịphe siphil ọdi kụ kạghogh bịdi ạḍuanam.
10Uwo ẹkaraph ẹmugh phọ mameel aḍighanaan.
Ịgbagara ịikpo meghiigh nyọdi
11Ọkaraph oye phọ rạḅem ghan pạ ologhi phọ ọdi mọ, “Ẹnaan ọ́maghami ịphen ịyaar.
Ọdi makpereghi riḍien phọ ọdi kụ ịmi ụ́miin.”
12Ọmoogh-we, ḅetenu ạlhiom bụkaraph awe phọ ạbuphe.
Kábula bụphe rọmiinom bọ.
13Uḍighi ika kụ ọnyo ạsipioghom mọ raafolomi bọ Ẹnaan ịduon,
kụ rạḅem ghan pạ ologhi phọ ọdi mọ Ẹnaan mạar képuru?
14Tọ nạ rạmiin ghan ni. Nạ akiririom ni apogh ịiḅaghami rꞌịminimiin,
kụ aakolobian oomo amem ọlogh ạḍighaagh.
Ọpo ị́nighenom bọ ạḅogh loor phọ ọdi ạngo nyịna!
Nạ kụ ọpelia ạbunyigo ạnmuny.
15Bunughi ịikpo oye ạsipioghom mọ rꞌoḍighinom ịkaraph phọ.
Lịom bịdi sịpioghom mọ ịpe bịdi moḍighi bọ
tụtu bịdi ụ́pioghom mun.
16Ọmoogh-we phọ kụ ọdaam ẹmha phọ kꞌagee-pọ.
Bụlo rọoḅereghi ịnon ạrumugh kope ni.
17Ọmoogh-we, nạ alegheri ni rụuphua ạbuphe osooromi bọ loor.
Nạghan emoghi phọ ạbidi ạḅile ạkparami iloghi phọ ạbidi.
18Leeleminaan ịiruen ạnmuny-ịgo rꞌạbuphe rọmiinom bọ,
ọbo oye phọ ọlhemom bọ ọposo kạdeghogh ghan bọ bịdi bịn okpereghaan yogh.
Currently Selected:
Ạsuor 10: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
