Matiu 24
24
ẠJizos ạkaaph ịdi kopiemi Otu Ịiḅereghi phọ
(Mạk 13.1-2; Luk 21.5-6)
1Kụ ạJizos ạḍua pạ Otu Ịiḅereghi phọ amite rạki, bịn ạbumatuan phọ ọdi oru ọma ịma ẹloghom mọ ọlogh bọ otu phọ oḍeenaan nyọdi. 2Kụ ọdi ạḅeni bịdi mọ, “Tọ nyina rẹmiin ni oomo phọ ịphen phọ. Mị ạkar rịḅeni ghan inyina mọ rꞌaḍiniin aḍighiigh kọ́bile dị kőlhereghi.”
Ịiḅaghami rꞌịgbiphoghom
(Mạk 13.3-13; Luk 21.7-19)
3Ịdipho ạJizos ạrol bọ ude sịphe Eegum Ọlivs, mem dị ọdi bịn odi, ạbumatuan phọ uru ni opuru mọ, “Ụḅeni iyoor. Pụr amem kụ ẹdi ịphen phọ kemite bọ? Eeghe kụ kemite oḍeenaan mọ mẹteeny mem mọ nạ katu bọ eekuna aḅirini phọ.”
4Kụ ạJizos ạḅeni bịdi mọ, “Igona loor anyina, ọbo oye kiikeleghi ghan bọ inyina. 5Ịbadi kotu ni kụ okophora ḍien phọ ạmi kụ ọḅem ghan mọ ạbuno kụ aMesaya phọ kụ ookeleghi ḍita. 6Nyina kẹnaghan oghur ạraagham lọ mẹebeeph, rꞌọghaaph ạraagham lọ edi egher. Kụ ọlo kékiilaan. Ạraraar phọ ịphen kemiteghu ni, kụ eekuna phọ kẹ̋teeny. 7Eelhe kotuphiom ni eelhe ẹgham, ẹmha otuphiom ẹmha, kụ ade phọ kepiigha ni, ịgbakuro kẹtol li ịminighan arikpisi. 8Kụ oomo ạraraar phọ ịphen phọ kụ emiighom ịminimiin.
9 #
Mat 10.22
“Kịḅogh ni inyina ọngo mọ ọmiine kụ ịze inyina, kụ awe oomo areelhe kịlogh ni inyina ḍien loor ẹmhu phọ ạmi. 10Ịbadi awe kọkanyanu ni sịphe omeeraam mọ ạbidi, oniin abool nyoniin, oniin ạlogh nyoniin ḍien. 11Ịbadi ariil ọkpe komite ni kụ ookeleghi ịbadi awe. 12Kụ ịkaraph keleeny ni eleeny dị tụtu ẹphomoghian ịbadi awe kẹephoom ni. 13#Mat 10.22Kụ oye lọ ạkparam ạteeny eekuna phọ kạmoogh ni pẹleeny. 14Ḅịle ooḅi ọghaaph ọmar phọ kꞌẸnaan phọ ọphon kọkaaph ni oleenye oomo aḅirini phọ, ọgba oleenyemi oomo ạrama, kụ eekuna phọ egbi ọteeny.”
Ịlo ạḅaphanya amuphe
(Mạk 13.14-23; Luk 21.20-24)
15 #
Dạn 9.27; 11.31; 12.11 “Mem dị nyina ẹmiin ḅạphanya amuphe, ịpe ạDaniel oyil phọ ạghaaph bọ, dị odi sịphe Ạdol Iigbia phọ (ọlo rạbal ạmaar ạnaghan!), 16bụlo odi Judia oghiil ogheel ẹpe ạraaḅaraph phọ; 17#Luk 17.31oye lọ odi ạnyu otu kúsoor ookoroghian ạraraar; 18oye lọ odi ozo kúḅula ologhi otu ọsighe oonmenemineen ọdi! 19Kụ pọ eeghe ọdo ịminimiin dị kẹtolonaan nmạriir lọ odi rꞌịyal amem aloor, rꞌạbulo ọpham nmụny dị kőghin mạmaam riiḍio phọ ịpe. 20Ịiḅereghi ghan mọ eghiil phọ kíḍighi mem ẹephoom mụghumo aḍio ophooghian, 21#Dạn 12.1; Ogon 7.14ịdi eḍighi bọ ịminimiin amem mọ ọpo kẹloghori ni epu ịdi memite ghan, emiigh kꞌẹḅel egbiom aḅirini phọ kụ ẹteeny nyịidipho. Kụ ịnon ịdi epu ịphen phọ kémite mun. 22Mọ Ẹnaan kụ ímeera bọ osoph ariiḍio ịminimiin phọ okpere, ọbo rꞌoniin oye músugha. Kụ loor ẹmhu ạbuphe dị mạsaḅar bọ, ọdi kasoph ni riiḍio phọ akpere.
23“Kụ mọ oye ịḅeni inyina mọ ipogh ẹphen, mọ aMesaya phọ odi sịen mꞌẹpe, kémeeraam. 24Ariil ọkpe rꞌạbudi kokola ḍien aMesaya komite ni oḍighi yogh igbogh areḍeenaan rꞌịiḍaany, lọ ẹghigh, ịlo ookeleghiom ạbuphe Ẹnaan mẹsaḅar bọ. 25Ịnaghan. Mị mịphur ri inyina rụru.
26 #
Luk 17.23, 24 “Esi ịduon phọ kụ bịdi ịḅeni inyina mọ, ‘Ipogh aani, ọdi odi ẹpe ẹdala phọ,’ kẹ́ki; mọ, ‘Ọdi odi osoph,’ kémeeraam. 27Ịdipho aḍio phọ rẹmeephian ghan bọ kegborori ẹḅeeny okuaḍio phọ kụ ịdi kẹtol ḍio phọ ạḍiphe Ọony phọ Oye katu bọ.
28 #
Luk 17.37
“Tọrobo ekpisi lọ ịḅoria aruzu edi kụ ẹdi ạredelhe resoor ghan keekpomoghan.”
Erumom Ọony phọ Oye
(Mạk 13.24-27; Luk 21.25-28)
29 #
Azay 13.10; Joel 2.10, 31; 3.15; Ogon 6.12;
Azay 13.10; Izik 32.7; Joel 2.10; 3.15;
Azay 34.4; Ogon 6.13 “Kụ riiḍio phọ ịpe, mem dị ịminimiin phọ meten, ootaany katen ni ufiri, ụnwanyu phọ kạ́mu mun. Ạraanaan phọ kẹḍuaghu ni kꞌạke ẹkaraghu, kụ ịikpo phọ ịpe edi bọ kꞌạke kepiigha ni. 30#Dạn 7.13; Zẹk 12.10-14; Ogon 1.7Pọ kụ amem dị eḍeenaan Ọony phọ Oye kemite ẹpe kꞌạke, kụ oomo arughunughun ịsien aḅirini phọ kọmoogh ni ọto, kụ ọmiin dị Ọony phọ Oye ạḍua ẹpe okuaḍio phọ kụ ratu rꞌịikpo rꞌiboom igbogh phọ ọdi. 31Kopula ni ọkuodu phọ Ẹnaan, kụ ọdi atom mọ ạruukpaany phọ ọdi ọghi inya ạsiagaany aḅirini phọ ookpomoghi ạbuphe dị mạsaḅar bọ.”
Ịsighe oreeny dị oghol mọ ạfig ẹtuughaam olegheri-ịyaar
(Mạk 13.28-31; Luk 21.29-33)
32“Ịsighe oreeny dị oghol mọ ạfig ẹtuughaam olegheri-ịyaar. Mem lọ oreeny phọ ọphon ratigheel ọnam, nyina elegheri ni mọ osoor mạteeny. 33Ịduon phọ kẹn, mem dị nyina ẹmiin oomo phọ ịphen phọ, nyina kelegheri ni mọ Ọony phọ Oye masi sịen ẹda ạḍighaagh. 34Mị ạkar rịḅeni ghan inyina mọ oghiil phọ ọphon káten kụ oomo phọ ịphen phọ emiteghu. 35Ạke phọ rꞌade phọ kepe ni. Ikpo ọnhu phọ ạmi képe aani.”
Oye ólhegheri ḍio phọ
(Mạk 13.32-37; Luk 17.26-30, 34-36)
36“Kụ ịlo aḍio phọ ạḍiphe rꞌamem mọ ạmuphe, ọnon oye ólhegheri omuton Ọde phọ bịn. Ạruukpaany phọ odi bọ kꞌạke, rꞌỌony phọ, úlegheri. 37#Emi 6.5-8Kụ ịdipho ẹrol bọ mem mọ aNoa kụ ịdi kẹtol mem mọ Ọony phọ Oye katu bọ. 38Ịdipho ẹrol bọ siḍughul-otu phọ ịpe retu bọ ọteeny amem mọ ạmuum-aḍigho phọ, awe ule ni eḍien ọḅile ọphughologh, alephiri ạnmuny rꞌạnmariir ạalan yogh ni ilom, tụtu ẹteeny bọ ọkaraghi aḍio phọ aNoa aḍigh bọ oghuugh phọ; 39#Emi 7.6-24kụ ạri bịdi úlegheri ịpe remite bọ tụtu ạmuum-aḍigho phọ aru bọ aghughom bịdi ạḍuanam. Ịdipho kụ ịdi kẹtol mem mọ Ọony phọ Oye katu bọ. 40Ịyal awe lọ odi ozo roḍighi oḍighi, kọsighe ni nyoniin, ọbile nyọori phọ. 41Ịyal ạnmariir lọ odi esi rọgbe ghan ịbiakpa, kọsighe ni nyoniin, ọbile nyọori phọ.
42“Ịduon kụ iḍighi kụ igon ghan. Nyina ílegheri ọdo phọ aḍio phọ Ọmoogh-we phọ anyina katigheel bọ. 43#Luk 12.39, 40Kụ ilegheri ịduon, mọ uwotu phọ kụ alegheri mem mọ ọḅa phọ katu bọ, ọbo ọdi mugon ni, ọdi múmeera mọ ọḅa phọ ạka otu phọ ọdi aḍigh awum rạraar ạḍuanam. 44Esi ịduon phọ, igon ni. Amem mọ ọpo nyina íḍuom bọ ologhi kụ ẹdi Ọony phọ Oye katu bọ.”
Ịyal ọdo ạrebene
(Luk 12.41-48)
45“Ạnhian kụ ogey ẹbene phọ ọpo alegheri bọ mạar? Pọ ọpo ọde-otu phọ ọdi ạdaami bọ mọ aphogh bụeri phọ ạrebene phọ kụ ạngo ghan bịdi eḍien, mem lọ ẹkpe ọngo. 46Ạḍiseph edianaan ẹbene phọ ọpo, dị ọde-otu phọ ọdi aru asi otu kụ ạmiin dị ọdi raḍighi ni ịphen phọ. 47Mị ạkar rịḅeni ghan inyina mọ ọdi kạsighe nyọdi ạdaami mọ aphogh oomo aruphua phọ ọno. 48Kụ ọdi aḍighi ọkaraph ẹbene, pọ kạḅemom ni ologhi mọ ọde-otu ọno kạ́nuun atu, 49bịn amiigh okuphogh ạbueri phọ ạrebene phọ, rꞌolian eḍien rꞌọphugholan amiim rꞌạbupughol miim. 50Ọde-otu phọ katu ni ḍio rꞌamem dị ẹbene phọ ọpo ụ́kiom ologhi mọ ọdi ratu. 51Kạkiriph ni nyọdi, kụ ạlogh nyọdi esi dị ọdi kamoghi yogh ạkirigha rꞌawe ịyal asinem.”
Currently Selected:
Matiu 24: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
