Matiu 21
21
Ọsaram Jịzos osiemi Jeruselem
(Mạk 11.1-11; Luk 19.28-40; Jọn 12.12-19)
1Mem dị moru otuman Jeruselem ẹpe Betfagi, bịdi uru ni osi Eegum Ọlivs, kụ ạJizos arom ịyal ạbumatuan, 2mọ, “Ịki ẹmha phọ ẹpe nyina rẹmiin bọ. Nyina esi, nyina kẹmiin ni ẹnam adool dị ọkpooghi rꞌọony ọdi odi. Ịkatan ẹsighe iruomonaan ịmi. 3Kụ oye lọ ipuru inyina ịyaar, ịḅeni mọ, ‘Ọmoogh-we phọ ạmoogh ni ịyaar oḍighinom ọdi, kụ kạnuun ni aḅulemi.’”
4Oomo phọ ịphen imite omuneniom ịpe oyil phọ Ẹnaan ạghaaph bọ kụ ạḅem mọ,
5 #
Zẹk 9.9
“Ịḅeni we phọ ạZayon mọ,
‘Ọdaam ẹmha phọ anyina maḍigh ẹnam adool,
onyugheel ẹnam adool,
asooromi ni loor kụ ratu kꞌanyina.’”
6Kụ ạbumatuan phọ ọghi ọtuugh ịpe ạJizos ạto bọ ạḅeni bịdi oḍighi. 7Kụ bịdi ọsighe ạsu phọ rꞌọony phọ oru, kụ ọkporonaan rụsuoma ạbidi ozuughiom ọman ịnam mọ, kụ ạJizos aḍigh. 8Kụ aḍigbogh aḍita awe phọ ụkporonaan kẹn ni rụsuoma ạbidi ọdeeghi oḅodo phọ, kụ buniin ọgba rịphiph ireeny, kụ ọdeeghi oḅodo phọ. 9#Ạsuo 118.25, 26Kụ bụphe oḍia bọ rꞌạbuphe ọrol bọ ọman phọ ụlooghi ghan mọ, “Iboom mọony phọ aDevid. Ẹnaan ẹseph ni nyọon phọ ratumom bọ ḍien Ọmoogh-we phọ! Iboh ẹrolonaan ni Ẹnaan ẹpe kꞌạke!”
10Kụ mem dị ạJizos asi bọ ẹpe Jeruselem, oomo phọ ẹmha phọ iphiigha ni, kụ opuru ghan mọ, “Ọphon phọ ạnhian?”
11Kụ aḍita awe phọ ọḅem ghan mọ, “Ọphon phọ ạJizos, oyil phọ ạNazeret ẹpe Galili.”
ẠJizos ạki aḍigh Otu Ịiḅereghi phọ
(Mạk 11.15-19; Luk 19.45-48; Jọn 2.13-22)
12Kụ ạJizos ạghi aḍigh Otu Ịiḅereghi phọ, kụ aphorogh oomo ạbuphe romuul bọ ḍighi pạ otu phọ, kụ agborion ịdaabili ạbuphe ronmeeghi bọ ikpoki phọ, rꞌạsigada awe phọ robologhi bọ rụkurughozo phọ. 13#Azay 56.7; Jer 7.11Kụ ạḅeni bịdi mọ, “Ọge ni pạ Ạḍinya Iigbia phọ otu ạmi kokol mọ Otu Ịiḅereghi, kụ nyina mẹḅile ekiton eḍighi otu ạruḅa.”
14Kụ awe ikpom ariḍien rꞌạrukugha uru ni ọteeny nyọdi sịphe Otu Ịiḅereghi phọ, kụ ọdi aakonom bịdi. 15Iphin ni iloghi ạbuo ạrumhu ariil ạrikia phọ rꞌạbutughemia iilogh phọ, mem dị bịdi ọmiin bọ rạraar ịiḍaany phọ dị aḍighi yogh bọ, ọḅile bọ ọnaghan ịlooghi phọ ịbam ạnmuny phọ roboom bọ Jịzos pạ Otu Ịiḅereghi phọ mọ, “Iboh ẹrolonaan mọony phọ aDevid!”
16 #
Ạsuo 8.2
Kụ bịdi opuru nyọdi mọ, “Nạ ạnaghan ni ịphen bịdi rọḅem bọ?”
Kụ ạJizos ameera mọ, “Ii. Nyina kạ̋al ghan mọ Ẹnaan ẹḅem mọ ọno kaḍighi dị ịbam ạnmuny rꞌạbulo rọmaam kọkuami ni oboom nyịno?”
17Kụ ọdi ạwile bịdi kụ ạḍua aḅula ẹpe Betani, kụ ạmina ẹḅaal.
ẠJizos asu ọnhu oreeny dị oghol mọ ạfig
(Mạk 11.12-14, 20-24)
18Kụ rẹḅaal ạJizos ạḅile rạki ẹpe ẹmha phọ, kụ ọkoony asiph nyọdi. 19Kụ ạmiin oreeny dị oghol mọ ạfig pạ ọgbal eten phọ, kụ ạghi ophogh, kụ ọ́miin ịyaar omuton rịnya phọ bịn, kụ ọdi ạḅeni mọ, “Kámuum mun iimuma, kꞌiḍuul kꞌiḍuul kꞌagee-pọ!” Kụ mem mem mọ bịn oreeny phọ anyororo.
20Kụ mem dị ạbumatuan phọ ọdi ọmiin bọ, iḍighi ni iikia esi ạbidi kụ bịdi opuru mọ, “Iḍighi ika kụ oreeny phọ ọphon phọ anyororo bọ egina ịduon phọ?”
21 #
Mat 17.20; 1 Kọr 13.2 Kụ ạJizos mọ, “Mị ạkar rịḅeni ghan inyina mọ eḍighi ịyaar dị nyina emeeraam kụ ịyal iloghi nyina ị́moogh, pọ nyina ketue ni eḍighi oreeny phọ ịduon mị aḍighi bọ. Ḅịle kẹn, nyina ẹḅeni ẹeḅaraph phọ ẹphen mọ tuphuronu ameel asuma ọphiiny, pọ Ẹnaan keḍighi ni ịngo inyina. 22Nyina ẹmoogh ni omeeraam, pọ ịyaar lọ nyina ẹlom esi ịiḅereghi nyina kẹmoogh ni.”
Aḍipuru olegheriom ịikpo phọ ịpe ạJizos ạsighe bọ kụ raḍighinom
(Mạk 11.27-33; Luk 20.1-8)
23Kụ ạJizos ạḅile aḍigh Otu Ịiḅereghi phọ rạtughemi ghan we, kụ ạbuo ạrumhu ariil ạrikia phọ rꞌikumoor awe phọ uru ni ọteeny nyọdi, kụ opuru mọ, “Nạ ụsighe ịghen ịikpo kụ raḍighinom ghan bọ ịphen phọ? Ạnhian kụ ạngo bọ nyịna ịikpo oḍighinom ịphen phọ?”
24Kụ ạJizos ạḅeni bịdi mọ, “Mị kipuru aani inyina ḍiniin aḍipuru ạgbagh, kụ nyina ẹphagharanaan, pọ mị kịḅeni ni inyina ịikpo phọ mị ạsighe bọ kụ raḍighinom ghan bọ. 25Ịikpo phọ ạJon awurom ghan bọ we mụum mọ ịḍua ẹghen kụ eru — esi Ẹnaan ḍụghum, kụ esi oye?”
Kụ aḍipuru phọ ạḍien ẹsighe ọogbaghanaan ịlo kọpagharanaan ẹlogh ogbo phọ ạbidi mọ, “Yira ọḅem mọ ịḍua esi Ẹnaan, pọ ọdi kạḅem mọ, ‘Iḍighi bọ ika kụ nyina nyọdi ímeeraam bọ?’ 26Kụ yira ọḅem mọ, ‘Ịḍua esi awe,’ pọ rokiilaan we phọ, ịdi eḍighi bọ oomo awe mọsighenom mọ ạJon phọ oyil Ẹnaan ni.” 27Kụ bịdi ọphagharanaan Jịzos mọ, “Yoor úlegheri.”
Kụ ọdi ạḅeni bịdi mọ, “Mị kẹn inyina rị́ḅeni ịikpo phọ mị ạsighe bọ kụ raḍighinom ghan bọ ịphen phọ.”
Aḍidogh ịlo ịyal ạnmuny
28“Nyina regbi ghan ika? Oniin oye ạrol li dị ạmoogh ịyal ạnmuny, kụ ọdi ạghi ạḅeni ọḅel phọ mọ, ‘Mọony ạmi, kịa rodon pạ ozo ireeny amiim mọ ạmi aḍighi oḍighi.’ 29Kụ ọdi mọ, ‘Mị rạ́wa ọghi.’ Kụ íbia iboom kụ anme ịitughian ọdi ạghi. 30Kụ ọde phọ ạghi ạtuugh igina phọ ạḅeni aani nyọori phọ ọony phọ ọdi. Kụ ọphon mọ, ‘Oye phọ, mị kạki ni’, kụ ọ́ghi. 31Sịphe ịyal phọ ạbidi ọghen kụ aḍighi ịpe ọde phọ ọdi rạwa bọ?”
Bịdi ọḅeni nyọdi mọ, “Ọḅel phọ.”
ẠJizos ạḅeni bịdi mọ, “Mị ạkar rịḅeni ghan inyina mọ ạbubonyiom iisogh phọ rꞌabulhiom ẹmha phọ kụ kịphur inyina oḍigh ọmar phọ kꞌẸnaan. 32#Luk 3.12; 7.29, 30ẠJon aru oḍeenaan anyina egey eḍighinom ịyaar, kụ nyina ímeeraam nyọdi. Ạbubonyiom iisogh phọ rꞌabulhiom ẹmha phọ kụ umeeraam nyọdi. Nyina ẹmiin bọ ni ịphen phọ, uḍighi ika kụ nyina íkiton bọ esi ịkaraph phọ anyina ímeeraam nyọdi?”
Aḍidogh ịlo awe dị ọḅogh ozo ireeny amiim ọlogh ḍịghaagh
(Mạk 12.1-12; Luk 20.9-19)
33 #
Azay 5.1, 2 “Ịnaghan ḍịnon aḍidogh. Oniin uwotu ạrol li, dị aḅeph ozo ịizupha ireeny amiim kụ aghoony akitonom, kụ aguph esi omiim ghan iimuma phọ, kụ ạlogh ogbogo dị kọtol ghan okori ozo phọ kụ ạḅogh ozo phọ ạlogh ḍịghaagh abuḅephom iizo mọ oḍighinaan ghan nyịno, kụ ạḍua agheel ẹnon ẹmha. 34Kụ rẹteeny mem ibugha phọ kụ arom rẹbene mọ ọghi ọteeny bụphe roḍighi ghan bọ ozo phọ ophin bin mụo ọno. 35Kụ awe oḍighi phọ osiph rẹbene phọ ọdi, okuphogh nyoniin, oghiigh nyoniin, oroḅol ikpo nyoniin. 36Ọdi ạḅile kẹn arom rẹbene apelom bụḅel phọ, kụ awe oḍighi phọ ọḅile kẹn ọtuugh igina phọ oḍighi. 37Kụ ekureriom mọ, ọdi arom mọony ọdi mọ ạghi aani mọ, ‘Bịdi kokueni ni mọony phọ ạmi.’ 38Kụ mem dị bụphe roḍighi bọ ozo phọ ọmiin bọ mọony phọ, uupuruan mọ, ‘Ọphon kụ kale bọ erua phọ ọdi. Itu oghiigh, kụ oziton ozo phọ ọdi ạar.’ 39Kụ bịdi osiph nyọdi ọḍuanam pạ ozo phọ, kụ oghiigh.
40“Mem dị uwozo phọ katu bọ, ọdi kaḍighi bọ ika we oḍighi phọ ạbuphe?”
41Bịdi ụḅeni nyọdi mọ, “Ọdi kaagulemi ni bụkaraph awe oḍighi phọ ạbuphe, kụ ạḅogh ozo phọ ạlogh ḍịghaagh ạbunon, dị ẹteeny mem ibugha phọ kọngo ghan bin iimuma phọ mụo ọdi.”
42 #
Ạsuo 118.22, 23 ẠJizos ạḅeni bịdi mọ, “Nyina kạ̋al aani ghan ịphen phọ ọge bọ pạ Ạḍinya Iigbia phọ mọ,
“‘Ẹko phọ ạbuloghom ruutu phọ oghel bọ
kụ mẹḅile eḍighi ẹko ogbo.
Ọmoogh-we phọ kụ aḍighi ịduon
kụ eḍighi ni iikia riḍien ayira’?
43“Ịduon kụ iḍighi kụ mị rịḅeni ghan inyina mọ kạar inyina ọmar phọ kꞌẸnaan kụ ọngo we dị komuum igey iimuma. [ 44Tọrobo oye lọ ameelom ḍighiigh phọ ẹphen kabunughian ni ạmadan, kụ eḍighi ịyaar dị ḍighiigh phọ kụ emeelom oye, kẹgbe ni nyọdi etene ịisaar.]”
45Kụ mem dị ạbuo ạrumhu ariil ạrikia phọ rꞌaFarisi phọ ọnaghan bọ sidogh phọ ọdi, bịdi uloghoma ni mọ ịphen phọ ọdi ạḅem ghan ạkpulughiom bụno. 46Bịdi oogonoghian Jịzos osiph kụ ọwile, loor oghiilaan aḍita awe phọ, ịdi eḍighi bọ bịdi mọsighenom mọ ọdi oyil Ẹnaan ni.
Currently Selected:
Matiu 21: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
