Matiu 20
20
Ạbuo oḍighi ozo ireeny amiim mọ
1“Kọsighe ọmar phọ kꞌẸnaan ọmaaniom ọghaaph oye dị ạmoogh ozo ireeny amiim. Eḅon ạḍiroor kụ ọdi amite ophir awe ọghianaan ọdi ozo. 2Kụ ạmerenyan mọ ọno kạkpe ghan bịdi naira ḍio kụ ạḅeni bịdi mọ ọghi ozo phọ. 3Kụ ọdi ạḅile amite mem dị aḍio mẹza, kụ ạmiin bụnon dị ọmeregha ẹpe aḍighi phọ, dị ịyaar oḍighi ụ́moogh, 4kụ ạḅeni bịdi mọ, ‘Ịki aani ẹpe ozo phọ, kụ ịlo ẹkpianaan ọkpe anyina, mị kịkpe ni inyina.’ Kụ bịdi ọghi. 5Kụ ọdi amite ogbo ootaany ạmiin buniin, kụ ạḅile kẹn amite mem dị erumuḍio mẹgbol kụ ạmiin bụnon, kụ ạtuugh kẹn igina phọ ạḅeni. 6Kụ mem dị mẹteeny dulhe, kụ ọdi ạḅile amite ạmiin bụnon dị ọmeregha yogh, dị mạar oḍighi ụ́moogh, kụ apuru bịdi mọ, ‘Uḍighi ika kụ nyina ẹmeregha bọ sịen oomo phọ arodon bịn ịyaar réḍighi?’ 7Kụ bịdi ọḅeni nyọdi mọ, ‘Oye iyoor úphir.’ Ọdi ạḅeni bịdi mọ, ‘Ịki aani ẹpe ozo phọ, kụ ịlo ẹkpianaan ọkpe anyina, mị kịkpe ni inyina.’
8 #
Lịv 19.13; Dut 24.15 “Rekpereghian, kụ uwozo phọ ạghi ẹpe ozo phọ ạḅeni nyọpo rapogh bọ ozo phọ mọ, ‘Mạgh we oḍighi phọ aakpomoghi ạkpe ịpe omerenyan bọ. Miigh bụen osugha bọ ọman phọ kụ ạkpe ạteenye bụḅel phọ.’ 9Kụ bụphe oru bọ dulhe phọ ụkpe ni oye ye ạbidi oniin anaira. 10Kụ ạbuḅel ạbuphe oru bọ ugbiom ghan mọ kọkpe ni bụno opuemi bụphe osugha bọ ọman phọ. Kụ ọḅile bịn ọkpe aani bịdi oniin anaira. 11Kụ bịdi rạar ikpoki phọ kụ ọgumom uwozo phọ 12mọ, ‘Bụen oḍighi bọ oniin ạwa phọ bịn nạ ạkpe ni aalenyan rꞌayoor phọ ọsela bọ ogogo ẹmhu aḍio phọ.’
13“Kụ ọdi ạphagharanaan oniin ọnyo ạbidi kụ ạḅem mọ, ‘Ọyaghiri, mị nyịna ịkaraph úḍighi. Mịna rꞌạna úmerenyan oniin anaira ẹmhu aḍio ḍụghum? 14Sịghe ịpe eru bọ ịpe ạna agheelom. Ịdipho mị ạngo bọ bụen osugha bọ ọman phọ kụ ịdi mị kạtuugh ni ạngo aani nyịna. 15Nạ kámeera mọ mị ulhiom ikpoki phọ ạmi ịlo ịḅeeraan ịmi ḍụghum? Rẹkagh ni ologhi ạna, mọ mị ogey oye ḍụghum?’
16 #
Mat 19.30; Mạk 10.31; Luk 13.30 “Ịduon phọ, pọ bụdi osugha ọman koḍighi bụḅel, kụ ạbuḅel phọ osugha ọman.”
ẠJizos ạkaaph akol ḍuugh phọ ọdi amuneniom ịraar amem
(Mạk 10.32-34; Luk 18.31-34)
17ẠJizos aten rạki Jeruselem, kụ ạgbatan ḍioph rꞌịyal ạbumatuan phọ atenom ọgbal ẹpe eten phọ, kụ ạḅeni bịdi mọ, 18“Ịnaghan, ịduon yira rọki bọ Jeruselem, kọḅogh ni Mọony phọ Oye ọngo bụo ạrumhu ariil ạrikia phọ rꞌạbutughemia iilogh phọ, kụ bịdi osoph erugh aḍuugh opume, 19kụ ọsighe nyọdi ọlogh ḍịghaagh aruuruen, ọnmoghoghoom yogh, ọgurogh kụ ọkan nyọdi okiigh, kụ ḍughul otu dị kemuneniom ịraar kụ ọdi aḅetenu esi aḍuugh phọ.”
Onhiin ạlom ịlom
(Mạk 10.35-45)
20Kụ onhiin ạnmuny phọ aZebidi ạpham ni nmụny phọ ọdi arumom ạteeny Jịzos akpuḍian, kụ ạlom nyọdi mọ aḍighinaan nyịno iiḅi.
21Kụ ọdi apuru ạnir phọ mọ, “Eeghe ịyaar kụ ẹdi nạ rạwa bọ?”
Kụ ạnir phọ mọ, “Meera ni mọ ịyal ạnmuny phọ ạmi ạbuen ọrol oniin ḍịghaagh elhiom, ọphori phọ ḍịghaagh ekeeny ạna ẹpe ọmar phọ ạna.”
22Kụ ạJizos mọ, “Nyina ílegheri ịyaar phọ nyina rẹlom bọ. Nyina ketue ni ẹpugholom ẹgo ịminimiin phọ ẹphen mị kạpugholom bọ ḍụghum?”
Kụ bịdi mọ, “Yoor kotue ni.”
23Kụ ọdi ạḅeni bịdi mọ, “Agey ni nyina kẹpugholom ni ẹgo phọ ạmi; kụ ịikpo ọngo awe sịdol oniin elhiom, ọphori phọ ekeeny, mị kụ ụ́moogh. Ọde phọ ạmi bịn kụ kạngo sịdol phọ ịpe we phọ ạbuphe dị maseenaan bọ.”
24Kụ bụeri phọ aḍioph ạbumatuan phọ ọnaghan bọ ịphen phọ, ụghagham ni iloghi ịyal phọ ạnmuny-onhiin phọ. 25#Luk 22.25, 26Kụ ạJizos ạmagh bịdi mọ oru, kụ ạḅeni bịdi mọ, “Nyina elegheri ni mọ awe phọ ạbuphe oseere bọ mọ ọda ruuruen ọmoogh ni ịikpo esi awe phọ bịdi ọda bọ, ḅịle kẹn abugbogh phọ rọtooghi ghan ni ịtooghi kọngo bịdi. 26#Mat 23.11; Mạk 9.35; Luk 22.26Kụ kẹ́tol ịdipho sịen ogbo phọ anyina. Ogbo phọ anyina, ọlo rạwa oḍighi ogbogh, pọ kaḍighi oye dị kakumu ghan ạngo bụeri phọ. 27Kụ ọlo rạwa oḍighi oḍiemiom, pọ ọdi kaḍighi eekuna ẹbene 28ạkighemi Mọony phọ Oye, dị útu mọ okumu ọngo nyịno, aru okumu ọngo awe rꞌọsighe aghuḍum mọ ọdi ọtanyanam aḍita.”
ẠJizos aakonom ịyal awe ikpom ariḍien
(Mạk 10.46-52; Luk 18.35-43)
29Kụ ịdipho bịdi ọḍua bọ Jeriko, aḍita awe ụdaph ni nyọdi. 30Kụ ịyal awe ikpom ariḍien ụrol li ude ọgbal oḅodo phọ. Kụ ọnaghan mọ ạJizos kụ ratu oten, kụ ọlooghi mọ, “Oye phọ, nạ ọony phọ aDevid, ụnma iyoor ighirigiir.”
31Kụ aḍita awe phọ uubophoghi ni bịdi mọ, “Ikpomori rụnhu anyina,” kụ bịdi ọkparami ghụn ịlooghi phọ mọ, “Oye phọ, nạ ọony phọ aDevid, ụnma iyoor ighirigiir.”
32ẠJizos ạmeera kụ ạmagh bịdi kụ ạḅeni mọ, “Nyina rẹwa mọ ạmi iḍighinaan inyina eeghe?”
33Bịdi mọ, “Oye phọ, yoor rọwa mọ nạ ḅạrion riḍien phọ ayoor.”
34Kụ ạJizos ạmoogh igbiririph esi ạbidi, kụ ạḅogh riḍien phọ ạbidi, kụ egina amem bịn bịdi ọmiin eten kụ ọghi ọdaph aani nyọdi.
Currently Selected:
Matiu 20: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
