Matiu 19
19
ẠJizos ạkaaph ịlo ọgbaranaan olhom rꞌạnir
(Mạk 10.1-12)
1ẠJizos rọmadan bọ ọghaaph phọ ọphon, kụ ạḍua Galili ạghi aḍigh eelhe aJudia, ẹpe ẹḅeenyom Ọphiiny ạJodan. 2Aḍita awe ụtuan ni nyọdi kụ ọdi aakonom bụphe úmoonogh bọ.
3Kụ buniin aFarisi phọ uru ni ọteeny nyọdi ịlo ọnaghan ọnhu ọdi kụ opuru mọ, “Ẹkpianaan ni lọ oye kạtuan tọrobo tọrobo ịyaar bịn aseere ạnir ọdi ḍụghum?”
4 #
Emi 1.27; 5.2 Kụ ạJizos mọ, “Nyina kạ̋al ghan mọ kꞌẹḅel egbiom mọ, Ẹnaan ẹlhem we, ẹya rꞌelephiri, 5#Emi 2.24kụ ẹḅem mọ loor ịduon phọ kụ ẹdi oye kạtuan ạgbatanaan ọde rꞌonhiin ọdi, kụ ạḅophan rꞌạnir ọdi, kụ ịyal phọ ạbidi koḍighi iniin iphulupul? 6Esi ịduon phọ bịdi kóḍighi mun ịyal, koḍighi nyoniin. Bụlo Ẹnaan mẹḅophoghi, oye kụ́gbarion ghan.”
7 #
Dut 24.1-4; Mat 5.31 Kụ aFarisi phọ opuru nyọdi mọ, “Iḍighi bọ ika kụ aMozis ạlogh bọ ni ologh mọ oye lọ aseere ạnir ọdi ạngoom ghan ḍịnya ọgbaranaan?”
8ẠJizos ạḅeni mọ, “AMozis ạtuan ịikpara iloghi phọ anyina kụ ameeraam bọ mọ isereghi ghan nmạriir phọ anyina. Ẹḅel egbiom mọ ị́tol ghan ịduon. 9#Mat 5.32; 1 Kọr 7.10, 11Kụ mị rịḅeni ghan inyina mọ oye lọ aseere ạnir ọdi, dị ụ́tuan olhe ẹmha, kụ aphin ọnon, pọ ọdi malhe ẹmha.”
10Ạbumatuan phọ ọdi ụḅeni ni nyọdi mọ, “Ịphen kụ eru reten apinien, pọ ị́kpianaan ophin ghan ạnir.”
11ẠJizos ạḅeni bịdi mọ, “Ịphen mị mạḅem bọ, kị́lo oomo aweye, emuton bụphe Ọde phọ ạmi ạngo bọ mọ ọnaghan phọ. 12Buniin iphoneen awe odi ni dị ọmaram ni ịdipho, kụ buniin odi ni dị awe kụ uḍighi, kụ buniin odi ni dị ụ́wa ophin ạnir, loor esi ọmar phọ kꞌẸnaan. Oye lọ katue ni ạnaghan ịphen phọ ạnaghan ni!”
ẠJizos ạngo ọghor ịbam ạnmuny
(Mạk 10.13-16; Luk 18.15-17)
13Kụ ụsighe ni ịbam ạnmuny oruomonaan Jịzos, ịlo ọdi kạḅam rạghaagh ọdi rụmhu ạbidi kụ ạaḅereghi; kụ ạbumatuan phọ ọḅaam we phọ ạbuen phọ. 14Kụ ạJizos ạḅem mọ, “Imeera ịbam ạnmuny phọ oru ụteeny ịmi. Kémirighan bịdi. Ọmar phọ kꞌẸnaan ọlo ọdo phọ ạbuen phọ.”
15Kụ ọdi ạḅam rạghaagh phọ ọdi rụmhu phọ ạbidi, kụ ạḍua sịphe.
Ịlo oniin onyugheel ọolha
(Mạk 10.17-31; Luk 18.18-30)
16Kụ oniin onyugheel ọony aru ni ạteeny Jịzos apuru mọ, “Ogey ọtughemia, mịna kaḍighi bọ eeghe egey ịyaar kụ ạmoogh aani ghuḍum kꞌagee-pọ?”
17Kụ ọdi ạḅeni nyọdi mọ, “Uḍighi ika kụ nạ ughol bọ ịmi mọ ogey oye phọ? Ogey oye ólho emuton Ẹnaan bịn. Sịen dị nạ rạwa bọ ọmoogh aghuḍum, pọ kooko iilogh phọ!”
18 #
Ẹḍua 20.13; Dut 5.17;
Ẹḍua 20.14; Dut 5.18;
Ẹḍua 20.15; Dut 5.19;
Ẹḍua 20.16; Dut 5.20 Kụ oye phọ apuru nyọdi mọ, “Ịghen?”
Kụ ạJizos mọ, “Enu kạ́ko, ẹmha kále, imi kámi, ịkaraph ạsiagba kạ́gbaanaan oye, 19#Ẹḍua 20.12; Dut 5.16; Lịv 19.18ọde rꞌonhiin lọgh eegu kụ ạphomoghian ọnon oye ịdipho aloor phọ ạna.”
20Kụ onyugheel ọony phọ ạḅeni nyọdi mọ, “Kꞌẹghoroghor ạmi, mị raako ghan ni oomo phọ iilogh phọ ịphen. Eeghe ẹnon ịyaar kụ isughanaan ịmi oḍighi?”
21Kụ ạJizos ạḅeni nyọdi mọ, “Nạ rạwa oseleman, pọ keel aalhaghi oomo phọ ịpe nạ ạmoogh bọ ạsighe ikpoki phọ ạngo rukulom, kụ nạ kạmoogh ni ẹelha ẹpe kꞌạke, kụ aru ụdaph ịmi.”
22Kụ onyugheel ọony phọ rọnaghan ịphen phọ bịn akiriri, ịdi eḍighi bọ ọdi ạmoogh ni eboom ẹelha, kụ ạpham ọto kụ agheelom.
23Kụ ạJizos ạḅeni bụmatuan phọ ọdi mọ, “Mị ạkar rịḅeni ghan inyina mọ ẹkparanaan ịikia ọolha oḍigh ọmar phọ kꞌẸnaan. 24Mị ạḅile kẹn rịḅeni ghan inyina mọ edugh ghụn ni dị ạkamel kạbol epogh ạlaga epu dị ọolha kaḍigh ọmar phọ kꞌẸnaan.”
25Mem dị ạbumatuan phọ ọdi ọnaghan bọ ịphen phọ, ịphughanam ni kụ eḍigh ḍiigu esi ạbidi, kụ opuru mọ, “Ạnhian kụ ẹdi kọpel bọ otene?”
26Kụ ạJizos aphogh ni bịdi kụ ạḅem mọ, “Ịphen phọ ídughanaan oye, kụ oomo ạraraar edughanaan ni Ẹnaan.”
27Pọ kụ amem dị aPita ạḅeni nyọdi mọ, “Yoor phọ ạbuen mọwile bọ oomo ạraraar phọ kụ rọdaph bọ nyịna kọmoogh eeghe?”
28 #
Mat 25.31;
Luk 22.30
Kụ ạJizos ạḅeni bịdi mọ, “Mị ạkar rịḅeni ghan inyina mọ mem omoom ọmar phọ ọpo Ọony phọ Oye kạtolom bọ ạgada ọdaam ẹmha eghuan phọ ọdi, nyina phọ ạbuen rịdaph bọ ịmi kẹtolom aani ḍioph rꞌịyal ạsigada ọdaam ẹmha, kụ eegbo ịiruen ẹngo ḍioph rꞌịyal arughughun phọ Ịzirel. 29Kụ tọrobo ọlo mạwile ruutu rꞌabumor, rꞌabumarani, rꞌọde, rꞌonhiin, rꞌạnmuny, rꞌarere loor esi aḍien phọ ạmi, konmoom ni nyọdi okuron opuemiom ịdipho phọ kụ ọḅaram ghuḍum kꞌagee-pọ. 30#Mat 20.16; Luk 13.30Kụ ịbadi ạbudi oḍia ghisigh koḅula ni ọman, kụ bụphe odi bọ ọman phọ koḍia ni ghisigh.”
Currently Selected:
Matiu 19: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
