Matiu 18
18
Ạnhian kụ ọkaraghi ogbogh phọ?
(Mạk 9.33-37; Luk 9.46-48)
1 #
Luk 22.24
Egina phọ amem mọ, ạbumatuan phọ uru ni ọteeny Jịzos kụ opuru mọ, “Ạnhian kụ aḍighi ọkaraghi ogbogh ẹpe ọmar phọ kꞌẸnaan?”
2Kụ ạJizos ạmagh ọbumoony ạmeremi sịphe ogbo phọ ạbidi, 3#Mạk 10.15; Luk 18.17kụ ạḅem mọ, “Mị ạkar rịḅeni ghan inyina mọ nyina kéḍigh ọmar phọ kꞌẸnaan, emuton dị nyina ekiton esi ịkaraph phọ anyina kụ ẹḅile esooromi loor ịdipho ịbam ạnmuny. 4Oye lọ asooromi loor ọdi ịduon ọbumoony phọ ọphon kụ ọkaraghi ogbogh ẹpe ọmar phọ kꞌẸnaan. 5Kụ oye lọ ạloghoma ọdo ọbumoony phọ ọphon loor ẹmhu phọ ạmi, pọ mụlhoghoma aani ni ịmi.”
Kámeel aḍighanaan ọdegh ophogh
(Mạk 9.42-48; Luk 17.1-2)
6“Ịlo ịbam ạnmuny phọ ạbuen umeeraam bọ ịmi oye lọ aakeleghi oniin ọnyo ạbuen phọ mọ akiton ạḍua esi ạmi, mịkpianaan ghụn nyọdi dị mụsighe ịluma kụ ọghoroghiom orum ọdi osumeeny ḍigher ọphiiny oḍinyighi oghiigh. 7Ịminimiin kẹtolonaan ni aḅirini phọ ịdi eḍighi bọ ạraraar emuza ni dị reḍighi ghan dị awe rọpioman ghan, kụ ạraraar phọ ịpe kẹ́bile ghan omiteghu, kụ pọ eeghe ọdo ịminimiin dị kẹtolonaan oye phọ ọpo ịphen phọ kẹtuan bọ esoor.
8 #
Mat 5.30
“Mọ ạḍighaagh ạna, mọ owol ạna, kụ rẹphue nyịna, pọ soph amutonaan bịdi loor ạna aroph, kẹnighe epu ọpham aḍiniin ạḍighaagh rꞌoniin owol kụ oḍighom esi aghuḍum, kpạripe rꞌomunughan ạraghaagh rꞌaruwol kụ osumeeny nyịna esi ooni ạnian. 9#Mat 5.29Kụ mọ ekpeḍien ạna kụ rẹphue nyịna, pọ pọghoronaan aroph; kẹnighe epu ọpham eniin ekpeḍien kụ oḍighom esi aghuḍum, kpạripe rꞌomunughan ariḍien kụ osumeeny nyịna ooni ạnian.”
Aḍidogh oyool-ọga dị aphe
(Luk 15.3-7)
10 #
Luk 19.10
“Igona loor ị́ḅitonaan ghan rꞌoniin ẹphurukpu ọnyo ạbuen phọ. Mị rịḅeni ghan inyina mọ ạruukpaany phọ Ẹnaan ẹngo bọ bịdi odi ghan ni ghisigh Ọde phọ ạmi ẹpe kꞌạke oomo amem. [ 11Ịdi eḍighi bọ Ọony phọ Oye aru ọphel ạbuphe ophe bọ.]
12“Eru mạar dị oye ạmoogh oniin okuron iyool-ịga kụ oniin aphe, nyina regbi mọ ọdi kaḍighi ika? Ọdi kạbile esughadi rꞌesugha phọ ẹpe aroogbolom mọ, ạki ạwa nyọpo aphe bọ. 13Ọdi ạmiin, mị ạkar rịḅeni ghan inyina mọ ọdi kabo ni iboh ọga phọ ọpo apuemi 99 phọ ẹpe ípe aani bọ. 14Ịduon kẹn kụ ịdi ị́ḅeeraan Ọde phọ anyina odi bọ kꞌạke phọ lọ oniin ẹphurukpu ọnyo ạbuen phọ kaphe.”
Ọnyo asiya lọ aḍighi nyịna ịkaraph
15 #
Luk 17.3
“Mọ ọnyo asiya ạna aḍighi nyịna ịkaraph, kịa ạḅeni nyọdi ọpioman phọ ọdi, esi dị ịyal anyina bịn edi. Kụ ọdi ạnaghanan nyịna, pọ nạ makiton ọnyo asiya phọ ạna. 16#Dut 19.15Mọ nyịna ọ́naghanan, pọ mạgh oniin mụghumo ịyal awe ọdaph nyịna, ịdi eḍighi bọ ọge ni pạ ạḍinya iigbia phọ mọ, ‘Mụghumo ọnon oye rꞌạna kụ ịmoogh sighiton, pọ ịyal awe mụghumo ịraar awe ọrol aani ni pạ ọnaghan aani!’ 17Kụ mọ ọdi inyina ị́naghanan, pọ kạaph ạḅeni bụo ạsiosi phọ. Kụ mọ ọdi bụo ạsiosi phọ ọ́naghanan, pọ kạ́loghoma mun nyọdi. Sịghenom nyọdi ịdipho ooruen rꞌọbonyiom iisogh.”
Omutonaan rꞌọlhoghoma
18 #
Mat 16.19; Jọn 20.23 “Mị ạkar rịḅeni ghan inyina mọ ẹlo nyina emutonaan sịen aḅirini phọ, pọ momutonaan ni ẹpe kꞌạke; kụ ẹlo nyina ẹloghoma sịen ade phọ, pọ mọlhoghoma ni ẹpe kꞌạke.
19“Mị ạḅile kẹn rịḅeni ghan inyina mọ mem lọ ịyal anyina ẹḅoph ọnhu sịen aḅirini phọ kụ ẹlom ịyaar Ọde phọ ạmi odi bọ kꞌạke phọ pọ ọdi kịngo ni inyina. 20Mọ ịyal mọ ịraar kụ oghol ḍien phọ ạmi kụ ookpomoghan, pọ mị odi aani ni pạ ogbo phọ ạbidi.”
Aḍidogh otelhedom dị ụ́sar ụbilenaan ọmugh
21 #
Luk 17.3, 4 Kụ aPita ạghi kụ apuru Jịzos mọ, “Ọmoogh-we, ika amem kụ ẹdi mị kạsar ghan ạbilenaan umor ạmi dị ruḍighi yogh ghan ịmi ịkaraph? Oḍual amem ḍụghum?”
22 #
Emi 4.24
ẠJizos mọ, “Kóḍual amem bịn. Oḍualdi amem oḍual. 23Esi ịduon phọ, mị kạsighe ọmar phọ kꞌẸnaan ạmaaniom ọghaaph oniin ọdaam ẹmha dị eḍigh ologhi ọdi ogunogh abutelhedom ọdi ịimugh. 24Ọdi romiigh ogbiighi phọ, kụ ọsighe oniin otelhedom dị ale ọmugh ọdi sịmuunir anaira oruomonaan nyọdi. 25Ịdipho ọdi útue bọ ụkpe ọmugh phọ kụ ọde-otu phọ ạḅem mọ ọḅar nyọdi rꞌạnir phọ rꞌạnmuny phọ, rꞌoomo ịlo ọdi ạmoogh aal, ịlo ọkpiom. 26Otelhedom mọ akpuḍian ạaḅereghian nyọdi mọ, ‘Oye phọ, mọogh ọkparam mị kạkpe ni nyịna ạmadan!’ 27Pọ kụ amem dị ọde-otu phọ ạmoogh igbiririph esi otelhedom mọ, kụ ạwilenaan nyọdi ọmugh phọ kụ ạḅeni mọ keel.
28“Ogina phọ otelhedom mọ ọphon amite aten rạki, kụ ạmiin ọnon otelhedom dị ale ọmugh ọdi dị ụ́bugh, kụ ạghi ạpogh ooko ọdi, kụ ạḅem mọ, ‘Ụkpe ọmugh ạmi!’ 29Kụ otelhedom mọ ọphon phọ akpuḍian ạaḅereghi nyọdi mọ. ‘Mọogh ọkparam mị kạkpe ni nyịna ạmadan!’ 30Kụ ọdi ómeera, kụ ạsighe nyọdi ạlogh ikoli, mọ tụtu ọdi ạkpe ọmugh phọ ạmadan. 31Kụ mem dị bụeri phọ abutelhedom mọ ọmiin bọ ịpe ọdi aḍighi bọ, ịiḅaghami ni bịdi iboom, kụ ọghi ọghaaph oomo phọ ịpe emite bọ ọḅeni ọde-otu phọ. 32Kụ ọde-otu phọ ạmagh nyọdi ạḅeni mọ, ‘Sey, nạ ọkaraph otelhedom, mị ụwilenaan ni nyịna oomo phọ ịimugh phọ ịpe, ịdipho nạ ụuḅereghian bọ ịmi. 33Ịkpe dị nạ mụnma aani ighirigiir onyoogbo phọ ạna, ịdipho mị ạnma bọ nyịna.’ 34Rꞌọghagh ologhi kụ ọde-otu phọ ạḅogh nyọdi ạngo bụphe rọmiine ghan bọ bụo ikoli phọ, mọ tụtu ọdi ạkpe oomo phọ ịimugh phọ ọdi.
35“Ịdipho kẹn kụ ẹdi Ọde phọ ạmi odi bọ kꞌạke phọ kiḍighi inyina, eḍighi ịyaar dị nyina ị́sar ghan ịkaraph ịbilenaan bụnon sịphe iloghi phọ anyina.”
Currently Selected:
Matiu 18: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
