Matiu 22
22
Aḍidogh amalhe kꞌạrogo
(Luk 14.15-24)
1Kụ ạJizos ạḅile ạsighe sidogh kụ ạghaaphom ạḅeni we phọ mọ, 2“Kọsighe ọmar phọ kꞌẸnaan ọmaaniom ọghaaph oniin ọdaam dị rapinanaan mọony ọdi ạnir, kụ ạsa eḍien ạrogo. 3Kụ arom butelhedom mọ ọdi mọ ọghi ọomaghagh bụphe mọḅeni yogh bọ oru kꞌạrogo phọ; kụ bịdi úmeera utu. 4Kụ ọdi ạḅile kẹn arom bụnon abutelhedom mọ, ‘Ịki ẹḅeni bụphe mọḅeni yogh bọ mọ mị maakolobian ni malhe phọ. Mị mạze ugheel ạsinam rꞌaroophoony ịnam mọ ạmi ạkanyan. Oomo phọ ạraraar phọ meekpomoghan ni rekori malhe phọ. Itu kꞌạrogo phọ.’ 5Kụ bịdi ụ́sighe ụmaghami ịyaar, bịn ọwalala ọḍuaghu. Oniin aten ạghi ozo ọdi, oniin ạghi omuul aḍighi ọdi. 6Kụ bụphe osugha bọ osiphi butelhedom oye phọ bịn okuphogh ọze. 7Kụ mem dị ọdaam mọ ạnaghan bọ ịphen phọ, ịghagh ni ologhi ọdi, kụ arom we ẹgham ọdi mọ ọghi ọze rọokom-enu phọ ạbuphe, ọsu ẹmha phọ ạbidi nịan ophiemi. 8Kụ ọdi ạḅeni butelhedom mọ ọdi mọ, ‘Mookpomoghi ni rạraar ạrogo phọ, kụ bụphe mọḅeni yogh bọ ụ́kpianaan oru kꞌạrogo phọ. 9Ịki ghụn ẹpe aroḅodo phọ ẹemaghagh bụlo nyina ẹmiin, ẹḅeni mọ oru kꞌạrogo phọ.’ 10Kụ abutelhedom mọ ạbuphe ọghi roḅodo phọ ọomaghagh bụlo bịdi ọmiin, bụkaraph rꞌabugey, ookpomoghi. Kụ awe omuza kꞌạrogo phọ.
11“Kụ ọdaam mọ ạghi aḍigh sịphe phọ ophogh aruuruen phọ, kụ ạmiin oniin oye dị odi aani pạ phọ, dị ạsuoma apinien phọ ụ́kpologhian aani. 12Kụ ọdi ạmagh nyọdi mọ, ‘Mọony phọ, nạ uru ika sịen kụ ạsuoma apinien phọ nạ ọ́kpologhian aani?’ Kụ ọdi mạar ọ́ḅem. 13#Mat 8.12; 25.30; Luk 13.28Kụ ọdaam mọ ạḅeni butelhedom mọ ọdi mọ, ‘Ịpaḍi nyọdi rạghaagh rꞌaruwol, esumeeny nyọdi ẹpe ọkikiph ufiri phọ; ịpa kụ esi dị kạtol amoghi yogh ạkirigha.’
14“Ụmagh ni ḍita, kụ ẹphurukpu kụ ạbudi ọsaḅar.”
Aḍipuru ịlo osogh ghan iisogh
(Mạk 12.13-17; Luk 20.20-26)
15Kụ aFarisi phọ ọghi oḍighan egir, pịdi bịdi ọnaghan ḍụghum ọnhu ọdi ọtuan osiphom. 16Kụ bịdi orom bụmatuan ạbidi rꞌạbuo ạHerod, mọ ọghi ọteeny Jịzos opuru mọ, “Ọtughemia, yoor olegheri ni mọ nạ oye aruukuan ni. Nạ rápogh ghan oye kạmagh mọ ịyaar ri. Esi ạna oye oye ópu. Nạ ạkar ri rạtughemi ghan reten phọ Ẹnaan. 17Loor ịduon phọ, ụḅeni iyoor. Nạ ragbi ghan ika? Iilogh phọ ayira emeeraam ni mọ yira osogh ghan iisogh phọ aSiza, ọdaam mọ aRom? Ẹkpe ni ḍụghum kụ ị́kpe?”
18Kụ ạJizos alegheri ni ịkaraph igbiighi phọ ạbidi, kụ apuru mọ, “Nyina rịdegh ghan ịmi eeghe? Nyina awe ịyal asinem. 19Iḍeenaan ịmi ọdo ikpoki phọ nyina resoghom ghan bọ iisogh phọ.”
Kụ bịdi ọsighe okpoki phọ oruomonaan nyọdi. 20Kụ ọdi mọ, “Ẹphen phọ ẹkigh ẹmhu ạnhian? Ọge sịen phọ ịlo ạnhian?”
21Kụ bịdi mọ, “ASiza.”
Kụ ọdi ạḅeni bịdi mọ, “Isogh ịlo aSiza ẹngo Siza, esogh ịlo Ẹnaan ẹngo Ẹnaan.”
22Bịdi rọnaghan bọ ịphen phọ kụ omaghagha yogh kụ ọwile nyọdi ọḍuaghu.
Aḍipuru ịlo oḅetenu esi aḍuugh
(Mạk 12.18-27; Luk 20.27-40)
23 #
Iiḍ 23.8
Egina phọ aḍio phọ, buniin aSadusi phọ uru ni ọteeny Jịzos. Kụ ạri awe phọ ạbuen úmeeraam mọ oye kạḅile ni aḅetenu esi aḍuugh. 24#Dut 25.5Kụ bịdi opuru mọ, “Ọtughemia, aMozis ạtughemi mọ oye aphin ạnir kụ ạwile amugh kụ nmụny ọ́mar, pọ umor ọdi ale ạnir phọ erua amiteghomonaan nmụny. 25Eniin amem oḍual abumor ụrolan ni rꞌayira, kụ okumoor phọ aphin ạnir kụ amugh kụ nmụny ọ́mar, kụ umor phọ ọdi ale ạnir phọ ọdi erua. 26Ịdipho kẹn kụ ịdi emitenaan nyọpo amuneniom bọ ịyal rꞌịraar tụtu ẹteeny nyọpo amuneniom bọ oḍual phọ. 27Ruukuna phọ ạnir phọ amugh aani ni. 28Ụḅeni iyoor, mem oḅerenu esi aḍuugh phọ, ạnir phọ kaḍighi ọlo ạnhian sịphe oḍual phọ? Oomo phọ ạbidi mophin ghan bọ ni nyọdi.”
29Kụ ạJizos ạphagharanaan bịdi mọ, “Nyina ẹkar ri ẹpioman, ịdi eḍighi bọ nyina ị́naghanan Ạḍinya Iigbia phọ, ílegheri kẹn ịikpo phọ Ẹnaan. 30Mem oḅerenu esi aḍuugh phọ, apinien kạ́tol, kụ awe kọkighogh rụukpaany phọ Ẹnaan. 31Kụ ịlo oḅerenu esi aḍuugh phọ, nyina kạ̋al ghan mọ Ẹnaan ịḅeni inyina mọ, 32#Ẹḍua 3.6‘Mị kụ Ẹnaan phọ Ebraham rꞌẠizik rꞌạJekob.’ Ịkiom ologhi mọ Ẹnaan ẹḅem ni ẹkpaariom mọ ọno kụ Ẹnaan phọ ạbidi, ghạlamo ịdipho bịdi momuughu bọ ni, pọ bịdi odi ni.”
33Kụ mem dị aḍita awe phọ ọnaghan bọ ịphen phọ, ịtughemi phọ ọdi iḍigh ni ḍiigu esi ạbidi.
Ọkaraghi ogbogh ologh phọ
(Mạk 12.28-34; Luk 10.25-28)
34Mem dị aFarisi phọ ọnaghan bọ mọ ạJizos makpomori ọnhu aSadusi phọ, bịdi uukpomoghan ni egina esi. 35Kụ oniin ọnyo ạbidi, ọgbaam iilogh, ạwaaghi ni reten ọnaghan ạḍughum ọnhu ọdi, kụ apuru mọ, 36“Ọtughemia, ọghen kụ ọkaraghi ogbogh sịphe iilogh phọ?”
37 #
Dut 6.5
Kụ ạJizos mọ, “‘Pọmoghian Ọmoogh-we Ẹnaan phọ ạna, rꞌoomo ologhi ạna, rꞌoomo uwaloor ạna, rꞌoomo ịitughian ạna.’ 38Ọphon kụ ọḅel rꞌọkaraghi ogbogh phọ. 39#Lịv 19.18Kụ ọpo amuneniom bọ ịyal phọ ịdipho ọḅel phọ ni mọ, ‘Pọmoghian ọnon oye ịdipho aloor phọ ạna.’ 40#Luk 10.25-28Oomo phọ iilogh phọ aMozis rꞌịtughemi ariil phọ edi sịen ịyal phọ iilogh phọ ịphen bịn.”
Aḍipuru ịlo aMesaya phọ
(Mạk 12.35-37; Luk 20.41-44)
41Mem dị aFarisi phọ ookpomoghan egina esi, ạJizos apuru ni bịdi mọ, 42“Nyina regbi ghan ika ịlo aMesaya phọ? Ọdi ọony ạnhian?”
Kụ bịdi mọ, “Ọdi, ọony aDevid.”
43Kụ ọdi apuru bịdi mọ, “Uḍighi ika kụ Uwaloor Iigbia phọ aḍighi bọ dị aDevid rꞌaloor ọdi aghol bọ nyọdi mọ Ọmoogh-we? ADevid kụ ạḅem bọ mọ,
44 #
Ạsuo 110.1
“‘Ẹnaan phọ ẹḅeni Ọmoogh-we ạmi mọ:
Tọl ḍịghaagh elhiom ạmi,
tụtu ẹteeny mem dị mị kaḍighi bụmulogh-ḍien phọ ạna ịkasi ọkpasaghiom aruwol.’
45“ADevid aghol li Mesaya phọ mọ Ọmoogh-we, ika kụ ẹdi ọdi aru bọ mọony ọdi?”
46Kụ rꞌoniin oye órue ọphagharanaan Jịzos ekpo ọnhu, kụ emiigh kꞌaḍio phọ ạḍiphe kụ ẹghiom risigh, oye óḅom ghan mun ẹmhu ọḅile opuru nyọdi ḍipuru.
Currently Selected:
Matiu 22: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
