Matiu 16
16
Opuru ọmiin ịiḍaany
(Mạk 8.11-13; Luk 12.54-56)
1 #
Mat 12.38; Luk 11.16 Buniin aFarisi rꞌaSadusi uru ni ọteeny Jịzos ịlo ọdegh ọdi ophogh kụ ọḅeni mọ, “Ḍighi ịiḍaany kꞌạke uḍeenaan iyoor.” 2ẠJizos ạḅeni bịdi mọ, “Nyina elegheri mọ sịen eelhe phọ ayira dulhe lọ erumuḍio remeel ighool kụ okuaḍio phọ ạtoghom, pọ rẹḅaal ọmu kạmu ni. 3Ḍịroor lọ erumuḍio remite kụ aḍio phọ eghire ẹtoghom pọ ọlophia kạnuun ni ạloph. Nyina etue ghan ni repogh okuaḍio phọ bịn kelegheri ịlo aḍio phọ kẹtol, kụ nyina kétue epogh ịiḍaany ariiḍio phọ ịphen bịn elegheri ịlo kemite. 4#Mat 12.39; Luk 11.29Ọkaraph oghiil phọ ọphon Ẹnaan úlegheri bọ ropuru aani ghan ịiḍaany, kụ ịiḍaany dị kọngo bịdi ílho, emuton ịiḍaany phọ ẹpe aJona oyil phọ Ẹnaan.”
Kụ ọdi ạwile bịdi ạḍua.
Ịtughemi aFarisi rꞌịpe aSadusi phọ ẹkigh yist
(Mạk 8.14-21)
5Mem dị ạbumatuan phọ osi bọ ḍịeri phọ ạḍighaagh ọphiiny phọ, bịdi ologhoma ni mọ bụno eḍien ụ́pam. 6#Luk 12.1Kụ ạJizos ạḅeni bịdi mọ, “Igona loor anyina esi ayist aFarisi phọ rꞌọpo aSadusi phọ.”
7Kụ bịdi omiigh ọghaaphan sịphe ogbo phọ ạbidi mọ, “Ọdi ạḅem ịduon, ịdi eḍighi bọ yira eḍien ụ́pam.”
8Mem dị ạJizos alegheri bọ, ọdi apuru ni bịdi mọ, “Iḍighi ika nụun kụ nyina ẹḅile bọ rẹkaaph ghan ịdi nyina ạbred ị́moogh? Nyina awe dị omeeraam ụ́manam. 9#Mat 14.17-21Nyina ke̋lhegheri kꞌạnyiidipho. Nyina mewula mem mọ mị ạparion bọ oogh iiḅoghoḍi ạbred phọ ạngo oogh ọonir awe phọ, ipoḍi phọ nyina ẹson bọ emuza bọ ika ạrigiel? 10#Mat 15.34-38Ḅịle kẹn, mem mọ mị ạparion bọ oḍual iiḅoghoḍi ạbred phọ ạngo inya ọonir awe phọ, ipoḍi phọ nyina ẹson bọ emuza bọ ika arugunum? 11Iḍighi ika nụun kụ nyina ị́naghan bọ mọ mị ụ́kaaph ịlo eḍien kụ ịḅeni bọ inyina? Mị rịḅeni ghan inyina mọ igona loor anyina esi ayist aFarisi phọ rꞌọpo aSadusi phọ!”
12Pọ kụ amem dị bịdi ọnaghan mọ ọdi ọ́ghaaph ịlo eḍien kụ ạḅeni bọ bụno, pọ ịlo ịtughemi aFarisi rꞌaSadusi phọ kụ ẹdi ọdi ạghaaph bọ.
APita ạḅem mọ ạJizos kụ aMesaya phọ
(Mạk 8.27-30; Luk 9.18-21)
13ẠJizos aru bọ asi eelhe phọ etuman bọ ẹmha aSizaria Filipai, apuru ni bụmatuan phọ ọdi mọ, “Awe rọḅem ghan mọ Ọony phọ Oye ạnhian?”
14 #
Mat 14.1, 2; Mạk 6.14, 15; Luk 9.7, 8 Kụ bịdi mọ, “Buniin rọḅem ghan mọ ạna ạJon oburogh mụum mọ, buniin mọ Ilaija, buniin mọ aJerimaya, mụghumo oniin oyil phọ Ẹnaan.”
15Kụ ọdi apuru bịdi mọ, “Nyina rẹḅem aani ghan mọ ạmi ạnhian?”
16 #
Jọn 6.68, 69 Kụ aSaimon Pita mọ, “Nạ kụ aMesaya phọ, Ọony Ẹnaan phọ edi ghan bọ kꞌagee-pọ.”
17Kụ ạJizos ạḅeni nyọdi mọ, “Iboh kꞌẸnaan edianaan ni nyịna Saimon ọony aJona, ịdi eḍighi bọ awe kụ nyịna ịphen úḍeenaan, omuton Ọde phọ ạmi odi bọ kꞌạke phọ. 18Mị ạḅile kẹn rạḅeni nyịna mọ nạ kụ aPita, ẹmhu ịduon phọ pọ aḍighiigh. Omeeraam mọ ạna kụ kaḍighi ḍighiigh dị mị kạmeremiom bụo ạsiosi phọ ạmi. Ghạlamo rꞌaḍuugh bịn kétue ẹka bịdi. 19#Mat 18.18; Jọn 20.23Mị kạngo nyịna ịsabi ọmar phọ kꞌẸnaan, kụ tọrobo ịyaar lọ nạ kamutonaan sịen aḅirini phọ, momutonaan ni ẹpe kꞌạke; kụ tọrobo ịyaar lọ nạ ạloghoma sịen aḅirini phọ, mọlhoghoma ni ẹpe kꞌạke.”
20Kụ ọdi ạphur bụmatuan phọ rụru, mọ kụ́ḅeni oye mọ ọno kụ aMesaya phọ ni.
ẠJizos ạkaaph akol ịminimiin rꞌaḍuugh phọ ọdi
(Mạk 8.31—9.1; Luk 9.22-27)
21Emiigh kꞌamem mọ ọpo phọ, ạJizos amiigh ni oḍeenaan ạbumatuan phọ ọdi, mọ ọno kạki Jeruselem kụ ạmiinom iboom ịminimiin. Mọ ikumoor awe phọ rꞌạbuo ạrumhu ariil ạrikia phọ rꞌạbutughemia iilogh phọ kokiigh ni nyịno, kụ ḍughul otu dị kemuneniom ịraar kụ ọno aḅetenu esi aḍuugh phọ.
22Kụ aPita ạsighe nyọdi atenom ọgbal kụ ạḅaam kụ ạḅem mọ, “Ọmoogh-we. Ẹnaan kímeera! Ịphen phọ nyịna kímitenaan!”
23ẠJizos akiton aphogh kụ ạḅeni Pita mọ, “Setan, ḍụa sịen ghisigh ạmi. Nạ atu ogbororian aghisigh ạmi, loor esi dị ịitughian phọ ạna, ịitughian awe, kị́itughian Ẹnaan.”
24 #
Mat 10.38; Luk 14.27 Kụ ạJizos ạḅeni bụmatuan phọ ọdi mọ, “Oye lọ rạwa ọdaph ạmi asooromi loor ameeraam ḍuugh kụ aḅeton osuom arusu phọ ọdi arool kụ ụdapham ịmi! 25#Mat 10.39; Luk 17.33; Jọn 12.25Oye lọ ạmaghami ghuḍum mọ ọdi ịyaar kapiemi ni; kụ oye lọ ghuḍum mọ ọdi ụ́maghami ịyaar loor ẹmhu ạmi kạmoogh ni. 26Eeghe ạsuo kụ ẹdi oye kạsighe, dị ạmoogh ẹelha aḅirini phọ kụ aphiemi ghuḍum mọ Ẹnaan ẹngo bọ nyọdi? Kạsighe bọ eeghe kụ aanmeneniom kẹn ghuḍum mọ Ẹnaan ẹngo bọ nyọdi? 27#Mat 25.31; Ạsuo 62.12; Rom 2.6Ọony phọ Oye kạpam ni rụukpaany phọ ọdi kụ atu rꞌigbogh Ọde phọ ọdi, kụ ạkpe tọrobo oye ịdipho oḍighi phọ ọdi ạman bọ. 28Mị ạkar rịḅeni ghan inyina mọ buniin ạbuen ọmeregha bọ sịen kọmiin ni dị Ọony phọ Oye ratu ọda ọmar phọ ọdi, kụ ogbi omugh.”
Currently Selected:
Matiu 16: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
