Matiu 15
15
Ịtughemi awe aḍiodiidi
(Mạk 7.1-13)
1Mem mọ ọpo phọ buniin aFarisi rꞌạbutughemia iilogh phọ ụḍua ni ẹpe Jeruselem oru opuru Jịzos mọ, 2“Uḍighi ika kụ ạbumatuan phọ ạna rọpueghi bọ eḍighinom ịyaar agediidi phọ? Bịdi ụ́kuami uutola rạghaagh kụ ogbi olhe eḍien.”
3Kụ ọdi mọ, “Nyina ẹḅile reeko ghan eḍighinom ịyaar phọ anyina, uḍighi ika kụ kẹkaaghiom iilogh phọ Ẹnaan? 4#Ẹḍua 20.12; Dut 5.16; Ẹḍua 21.17; Lịv 20.9Ẹnaan ẹḅem mọ, ‘Ọde rꞌonhiin lọgh eegu,’ mọ kẹn, ‘Oye lọ alhomaan ọde mꞌonhiin, oghiigh ghan ni.’ 5Kụ nyina ẹḅile rẹtughemi ghan mọ oye lọ ạmoogh ịyaar lọ kẹngo sụo ọde mꞌonhiin kụ ạḅem mọ nyẹen moogho oseenaan Ẹnaan, 6pọ ọdi kụ́logh mun eegu ọde mꞌonhiin. Ịduon phọ, pọ nyina reḍighi ghan ịdi ikpo ọnhu phọ Ẹnaan ị́man mun ịyaar loor eḍighinom ịyaar phọ anyina. 7Azaya ọ́pioman ịmiin phọ ọdi ạmiin bọ ịlo anyina kụ ạge bọ mọ nyina awe ịyal asinem, kụ ạḅem mọ,
8 #
Azay 29.13
“‘Ẹnaan ẹḅem mọ awe phọ ạbuen ọsighe ịidoronhu ạbidi bịn kụ rughueniom ghan ịmi,
kụ iloghi ạbidi ịkelan ni ịmi iboom.
9Ị́kpianaan dị bịdi ruuseeny ghan ịmi
kụ kọtughemi ghan iilogh phọ awe mụdi ịpe Ẹnaan.’”
Ạraraar dị rẹpue ghan oye
(Mạk 7.14-23)
10Kụ ạJizos ạmagh ḍita awe phọ, kụ ạḅeni mọ, “Ịnaghan ẹḅile elegheri! 11Ịyaar ílho ghan dị eḍigh sịphe aloor phọ oye kụ kẹpue oye phọ, kụ ịpe ẹḍua bọ ọnhu oye phọ kụ emite kụ rẹpue ghan bọ oye phọ.”
12Kụ ạbumatuan phọ ọdi oru opuru nyọdi mọ, “Nạ alegheri ni mọ ịphen nạ ạḅem bọ ẹkagh ni iloghi aFarisi phọ?”
13Kụ ọdi adogh ḍidogh kụ ạḅem mọ, “Tọrobo oreeny lọ Ọde phọ ạmi odi bọ kꞌạke phọ kụ ụ́zuph, kotuphuron ni. 14#Luk 6.39Ịbilenaan we phọ ạbuphe. Bịdi awe ikpom ariḍien dị ọḅem mọ ạbuno koḍiemiom bụnon. Kụ oye ikpom ariḍien aḍiemiom ọnon oye ikpom ariḍien, ịyal phọ ạbidi komeleghu ni osuma ooni.”
15Pọ kụ amem dị aPita ạḅeni mọ, “Gbạ ẹmhu aḍidogh phọ ụḅeni aani iyoor!”
16Kụ ạJizos ạḅeni bịdi mọ, “Nyina phọ kẹn edi aani ni elegheri ịyaar ịdipho ạbueri phọ! 17Nyina ị́naghan mọ ịyaar lọ eḍigh ọnhu reten ghan keḍigh ọkuruḅaka, kụ ọni otoph? 18#Mat 12.34Kụ ikpo ọnhu phọ ịpe ẹḍua bọ sịphe ologhi oye phọ kụ emite kụ rẹpue ghan bọ oye phọ. 19Ịsiphe ologhi oye phọ kụ ẹdi ịkaraph ịitughian ẹḍua ghan bọ remite. Ọko enu, olhe ẹmha, olhe ẹmha ạregelenya, imi, ịkaraph ạsiagba, ọopu — 20ạraraar phọ ịphen kụ rẹpue ghan bọ oye. Olhiom ạraghaagh dị úutola rẹ́pue ghan oye.”
Ịlo omeeraam dị oniin ạnir ạmoogh
(Mạk 7.24-30)
21ẠJizos ạḍua ni sịphe phọ, ạghi rạmha dị etuman Taya rꞌaSaidon, 22kụ ạnir ọlo aKenan, dị arugh eelhe phọ ẹpe phọ aru ạteeny nyọdi kụ ạlho mọ, “Oye phọ, nạ ọony phọ aDevid, seseeny. Ụnma ịmi ighirigiir. Eru ekola ọnyani ạmi kụ rẹmiine ni iboom.”
23Kụ ạJizos nyọdi ịyaar ọ́phagharanaan. Kụ ạbumatuan phọ ọdi oru kụ ọoḅereghian nyọdi mọ ḅẹni ạnir phọ mọ ạḍua, mọ ọdi kụ́dapham iyira ịlooghi ọdi.
24Kụ ọdi ạḅeni mọ, “Ụtuan we Ịzirel dị ọghigh iyool-ịga dị ephe eten kụ mị uru bọ ọphel.”
25Pọ kụ amem dị ạnir phọ aru akpuḍian ghisigh ọdi kụ ạḅem mọ, “Oye phọ, ụlhoghonaan ịmi ḍịghaagh!”
26Kụ ọdi mọ, “Ị́kpianaan ọsighe ghan eḍien ịbam ạnmuny, ọngo asuogh.”
27Kụ ạnir phọ ạḅem mọ, “Oye phọ, igey ni, ọkaraghi asuogh phọ rẹson ghan ịpherepe eḍien phọ ẹgharaghu bọ pạ eeḍian ịdaabili ạburude-otu phọ ạbidi kụ kele.”
28Pọ kụ amem dị ạJizos ạḅeni mọ, “Nịr phọ, omeeraam mọ ạna ạbugh ni. Ịpe nạ rạwa bọ kemitenaan ni nyịna.” Mem mem mọ bịn ọnyani phọ ọdi aḍum.
ẠJizos aakonom ịbadi awe dị úmoonogh aḍume yogh
29Kụ ạJizos ạḍua ni sịphe phọ ạghi oogbom Ọphiiny aGalili, kụ ạghi ạsiiny ẹeḅaraph ạrol ude. 30Aḍita awe ụsighe ni we dị rokpeku, eten ụ́miin, oḍiku yogh rạagha, rokpom ọka, rꞌịbadi ạbunon dị asiloor ị́nighe, orumom oseere ruwol ạJizos, kụ ọdi aakonom bịdi. 31Iḍighi ni iboom iikia esi aḍita awe phọ, mem dị bịdi ọmiin bọ mọ arokpom ọka mọḅile rọḅa, bụo ạraagha phọ momoonogh, bụphe rokpeku bọ mooleeny rotelhe, awe ikpom ariḍien phọ rọmiin eten, kụ bịdi oboom Ẹnaan phọ Ịzirel.
ẠJizos ạperemi eḍien inya ọonir awe
(Mạk 8.1-10)
32ẠJizos ạmagh ni bụmatuan phọ ọdi aakpomoghi kụ ạḅeni mọ, “Igbiririph awe phọ risiphanaan ni ịmi, ịdi eḍighi bọ bịdi mụrolan ịmi ịraar aḍughul-otu, kụ ụ́moogh mun ịyaar ole. Mị kạ́ḅeni bịdi mọ ogheleghu, ọbo bịdi komuzaan ghan bọ ḍuugh ẹpe eten.”
33Kụ ạbumatuan phọ ọdi opuru nyọdi mọ, “Iḍighen sịen ẹdala phọ kụ ẹdi yoor kọmiin eḍien dị kẹgbaanyan ḍita awe dị oleeny ịduon?”
34Kụ ạJizos apuru bịdi mọ, “Nyina ẹmoogh bọ ika iiḅoghoḍi ạbred?”
Kụ bịdi mọ, “Oḍual, rꞌịphurukpu ạnmuny ina.”
35Kụ ọdi ạḅeni we phọ mọ ọrologhu ude. 36Kụ ạsighe oḍual iiḅoghoḍi ạbred phọ rꞌina phọ, kụ rọngo ḍịseph Ẹnaan, kụ ạparion, kụ ạngo bụmatuan phọ ọdi, kụ ạbumatuan phọ ọngo ḍita awe phọ. 37Kụ oomo ạbidi ule ni ẹpherogh. Kụ ạbumatuan phọ ọson ipoḍi phọ esugha bọ kụ emuza oḍual arugunum. 38Kụ bụphe olhe bọ ọman bọ inya ọonir awe, nmạriir rꞌạnmuny ụ́logh.
39Kụ ọdi ạḅeni ḍita awe phọ mọ ogheleghu, kụ aḍigh oghuugh kụ asul eelhe ạMagadan.
Currently Selected:
Matiu 15: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
