Matiu 14
14
Ịdi oghiigh Jọn oburogh mụum mọ
(Mạk 6.14-29; Luk 9.7-9)
1Mem mọ ọpo ạHerod ọdaam mọ ạnaghan bọ ọdu phọ ạJizos, 2kụ ạḅeni nmụny-otu phọ ọdi mọ, “Oye phọ ọphon ạJon oburogh mụum mọ ni. Ọdi maḅetenu sịphe aḍuugh phọ. Pọ kụ ịdi ịikpo phọ ịphen reḍighi bọ oḍighi phọ ọphon loor ọdi.”
3-4 #
Luk 3.19, 20 #
Lịv 18.16; 20.21 Ọdi ạghaaph ịduon esi okaphian oomiigh ịpe ọdi aḍighi bọ. Mem dị meten ọdi ạar Hẹrodias, ạnir aFilip umor ọdi, aphin. ẠJon ạḅeni ghan Hẹrod mọ ị́kpe ịduon ọdi ạsighe bọ ạnir phọ aphin. Esi ọḅaalami ologhi ạHerodias, kụ ạHerod asiph Jọn ạphaḍi ạlogh ikoli. 5Ọdi óghiigh Jọn loor oghiilaan awe phọ, ịdi eḍighi bọ bịdi mọsighenom mọ ọdi oyil Ẹnaan ni.
6Kụ ẹteeny ḍio dị aruuruen oru kꞌạHerod ịlo ọmoogh iboh ọotughianam aḍio phọ ọpo ọmar bọ Hẹrod, kụ ọnyani phọ ạHerodias aru ạgher ịḅa ghisigh ạbidi, kụ ẹḅeeraan Hẹrod. 7Ạtuan ịdipho kụ aghunya ọkuom ọdi ịyaar lọ ọdi ạzua.
8Kụ ọnyani phọ ạdaph oroma onhiin phọ ọdi kụ ạḅem mọ, “Lọgh ẹmhu ạJon oburogh mụum ologhi ẹteleleeny kụ ụngo ịmi.”
9Ọdaam ẹmha phọ ạmoogh ni ọto kụ loor esi iikunya phọ dị maghunyian bọ pạ arisigh aruuruen phọ, kụ ạto ni ạḅeni mọ ọkuom nyọdi. 10Kụ ọdi arom oye mọ ạghi asoph ẹmhu ạJon ẹpe otu ikoli phọ. 11Kụ oye phọ asoph ẹmhu phọ ạlogh ẹteleleeny aruom ọnyani phọ, kụ ọnyani phọ ạsighe ạghiomonaan onhiin phọ ọdi. 12Kụ ạbumatuan phọ ạJon ọghi ọsighe ḍizu phọ ọdi ọghi oḍi, kụ ọghi ọghaaph ọḅeni Jịzos.
ẠJizos ạperemi eḍien oogh ọonir awe
(Mạk 6.30-44; Luk 9.10-17; Jọn 6.1-14)
13Mem dị ạJizos ạnaghan bọ ịpe emite bọ, kụ ogina ọdi aḍigh oghuugh ạḍua ạghi ekpisi dị enamian. Kụ aḍita awe phọ ọnaghan, kụ ọḍua ẹpe ạramha phọ okiton owol ade ọtuonom nyọdi. 14Ọdi rasul bịn ạmiin ḍiboom aḍita awe kụ ạmoogh igbiririph esi ạbidi kụ aakonom bụdi úmoonogh aḍume yogh.
15Kụ aḍughul reghul, kụ ạbumatuan phọ ọdi ọghi ọḅeni nyọdi mọ, “Ẹphen kẹ́mha, kụ aḍughul meghul. Ḅẹni we phọ mọ ọghi ẹpe ạsiraaghana phọ ọwa eḍien ogho.”
16Kụ ạJizos ạḅeni bịdi mọ, “Ị́kpianaan dị bịdi kọki. Nyina kụ ịngo bịdi ịyaar ole.”
17Kụ bịdi mọ, “Ịyaar iyoor ílho sịen, emuton oogh iiḅoghoḍi ạbred rꞌịyal ina.”
18Kụ ọdi mọ, “Ịsighe iruom sịen.” 19Kụ ọdi ạḅeni we phọ mọ ọrologhu ude sịphe ạroogho phọ, kụ ạsighe oogh phọ iiḅoghoḍi ạbred phọ rꞌịyal phọ ina phọ, kụ aphogh ạnyu ạke, kụ ạngo ḍịseph Ẹnaan, kụ ạparion, kụ ạsighe ạngo bụmatuan phọ ọdi. Kụ ạbumatuan phọ ọdi ọsighe ọngo we phọ. 20Kụ oomo phọ ạbidi olhe ẹpherogh. Kụ ạbumatuan phọ ọson ipoḍi phọ ịpe esugha bọ kụ emuza ḍioph rꞌịyal ạrigiel. 21Kụ bụphe olhe bọ ụghiom ni oogh ọonir alephiri, nmạriir rꞌạnmuny ụ́logh.
ẠJizos atelhe ạnyu ạmuum
(Mạk 6.45-52; Jọn 6.15-21)
22Kụ ạJizos ạkpaariom bụmatuan phọ mọ oḍigh oghuugh phọ oḍiemi ghan ḍịeri phọ ạḍighaagh phọ, mọ ọno kạḅeni we phọ mọ ogheleghu. 23Kụ rọḅeni bọ ḍita awe phọ mọ ogheleghu, kụ ọdi ạghi ạsiiny ẹeḅaraph ọoḅereghi Ẹnaan. Meghul li, kụ ọdi bịn kụ ạrol sịphe, 24kụ oghuugh phọ asi ẹpe ogbo ọphiiny, kụ ooloogh rạaḅaghami, ịdi eḍighi bọ oghim ạda bịdi.
25Kụ rẹteeny eḅon ạḍiroor, kụ ọdi arelhe ạnyu ạmuum mọ rạki ọteeny ạbidi, 26kụ ạbumatuan phọ ọmiin nyọdi. Kụ asiloor ạbidi eḍighi nyạam nyạam, kụ ọḅem mọ, “Ọlo úlho,” kụ ọlooghi loor aruugu dị asiph bịdi.
27Kụ mem mem mọ kụ ạJizos ạḅeni bịdi mọ, “Iḅio anyina kíkaph. Mị ni. Kékiilaan.”
28Kụ aPita ạḅem mọ, “Ọmoogh-we, mụghumo ọkar ạna ni, pọ ụḅeni ịmi mọ telhe ạnyu ạmuum mọ utu ẹpe nạ odi bọ.”
29Kụ ọdi mọ, “Tue.” Kụ aPita ạḍua sịphe oghuugh phọ asoor, kụ amiigh orelhe ạnyu ạmuum mọ ọghi ẹpe ạJizos odi bọ. 30Kụ mem dị ọdi ạmiin bọ mọ oghim rakim, aruugu asiph ni nyọdi. Ọdi rạwa oḅi, kụ ạlho ạḅem mọ, “Ọmoogh-we, ụphel ịmi.”
31Mem mem mọ bịn ạJizos asele ḍịghaagh ạpham nyọdi, kụ ạḅeni mọ, “Sey, nạ oye dị omeeraam ụ́manam, iḍighi ika kụ nạ raakia bọ ịikpo phọ ạmi?”
32Kụ ịyal phọ ạbidi oḍigh pạ ologhi oghuugh phọ, kụ oghim mọ ạpho. 33Kụ bụphe ọrol bọ pạ oghuugh phọ ooseeny nyọdi kụ ọḅem mọ, “Igey phọ ni, nạ kụ Ọony phọ Ẹnaan.”
ẠJizos aakonom bụdi úmoonogh ẹpe Gẹnesaret
(Mạk 6.53-56)
34Kụ bịdi ụḅeeny ni ọphiiny phọ osul Gẹnesaret. 35Kụ awe ekpisi phọ ẹpe ụlogh ni nyọdi elegh, kụ ooromogh sidom okitonom oomo phọ eelhe phọ mọ ọsighe oomo awe dị úmoonogh oruomonaan Jịzos. 36Kụ ọoḅereghian ghan nyọdi mọ bịdi ọḅogh ghạlamo rꞌạḍimaam ạsuoma phọ ọdi, kụ oomo ạbudi ọoḅoghogh bọ uḍumogh ni.
Currently Selected:
Matiu 14: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
