Matiu 13
13
Aḍidogh dị ọsighe oḅephom iizo kụ odoghom
(Mạk 4.1-9; Luk 8.4-8)
1Ḍio phọ ạḍiphe ạJizos ạḍua pạ otu phọ amite, kụ ạghi ạrol ẹpe oogbom ọphiiny phọ. 2#Luk 5.1-3Kụ aḍita dị ookpomoghan esi ọdi ụphughan ni dị tụtu eḍighi dị ọdi aḍigh ologhi oghuugh kụ ạrol ude, kụ aḍita awe phọ ọmeregha ẹpe oogbom ọphiiny phọ. 3Kụ ọdi ạsighe sidogh kụ ạtughemiom bịdi ịminighan ạraraar, kụ ạḅem mọ:
“Ịnaghan! Oḅephom iizo ạghi ooduḍi ịizupha. 4Kụ sịphe dị raaduḍi bọ, iniin emeleghu ọḅuzo, bịn ịnun eru eekpophi ẹminogh. 5Iniin imeleghu de asighiigh dị ịisaar ị́bugh, kụ íbia bịn ẹraarogh, loor esi dị ọninom ụ́tol. 6Kụ ogogo rolhom, kụ ạsel ịizupha phọ, kụ loor esi dị sịni ị́moogh bọ bịn ẹnuughi. 7Iniin imeleghu ogbo iitoor, kụ iitoor phọ esiighi egimi kụ ịizupha phọ eghurughan yogh, bịn iimuma ímuum. 8Kụ ịpheri phọ imeleghu ḍiiḅi ade kụ emuumogh iimuma, iniin oniin okuron, iniin odiinydi, iniin ịraardi.”
9Kụ ạJizos ạḅile ạlho ạḅaram mọ, “Ọlo ạmoogh rụru ọnaghanam ạḍughum ạnaghan!”
Ịpe ọtuan bọ kụ odoghogh sidogh phọ
(Mạk 4.10-12; Luk 8.9-10)
10Kụ ạbumatuan phọ oru opuru nyọdi mọ, “Nạ ụtuan ika kụ ạsighe bọ sidogh kụ ạghaaphom ạḅeni bịdi?”
11Ọdi mọ, “Mịngo ni inyina olegheri ạraraar ịbooghian ọmar phọ kꞌẸnaan, kụ ụ́ngaani bụeri phọ. 12#Mat 25.29; Mạk 4.25; Luk 8.18; 19.26Nyọpo ạmoogh bọ, Ẹnaan kẹngo ni ẹbughe; kụ ọpo ụ́moogh bọ ghạlamo ịyal-ikpo ịlo ạmoogh aani, Ẹnaan kẹbonyi ni. 13Mị ụsighe sidogh kụ ạghaaphom bọ ạḅeni bịdi ịdi eḍighi bọ bịdi ophogh rọ́miin ghan, ọḅile ozuumaam rólegheri ghan ẹmhu phọ. 14#Azay 6.9, 10Esi ạbidi kụ ẹdi ịmiin Azaya oyil phọ Ẹnaan emunughan bọ mọ,
“‘Ophogh nyina kepogh ni kụ nyina kẹ́miin;
ọnaghan nyina kẹnaghan ni kụ nyina kẹ́kpaph ẹpam,
15ịdi eḍighi bọ abula kụ maḅogh iloghi awe phọ ạbuen
ọbo bịdi kolegheri ghan bọ ịyaar
kụ areḅeri phọ ạbidi meḍuughian,
ọbo bịdi kọnaghan ghan bọ,
kụ ariḍien ạbidi mokpereghian yogh
ọbo bịdi kọmiin ghan bọ eten, ọḅile okiton usoman ịmi mị aakonom bịdi.’
16 #
Luk 10.23, 24 “Ịmoogh iboh ịdi eḍighi bọ nyina rẹmiin ni eten, ẹḅile rẹnaghan ḍụghum. 17Mị ạkar rịḅeni ghan inyina mọ ịbadi ariil phọ Ẹnaan rꞌabugey awe ụwa ni ọmiin ạraraar phọ ịphen nyina rẹmiin bọ kụ ụ́miin, ụwa kẹn ni ọnaghan ạraraar phọ ịphen nyina rẹnaghan bọ, kụ ụ́naghan.”
ẠJizos ạagelion ḍidogh oḅephom ozo phọ
(Mạk 4.13-20; Luk 8.11-15)
18“Iler rụru ẹnaghan ẹmhu aḍidogh oḅephom iizo phọ. 19Ọpo ạnaghan bọ ọghaaph ọmar phọ kꞌẸnaan kụ úlegheri bọ ẹmhu phọ ạkigh ịizupha phọ emeleghu bọ pạ ọḅuzo phọ. Eru etu ghan reziton ọghaaph phọ ọzuph bọ sịphe ologhi phọ ạbidi kẹḍuanam. 20Ọpo ạghigh bọ ịizupha ịpa ade asighiigh phọ, pọ ọdi ạnaghanan ọghaaph phọ rꞌọḅaal ologhi, 21kụ ọ́moogh sịni pạ ologhi phọ ọdi, kụ ameeraam mọony amem bịn. Mem lọ ịminimiin, mụghumo ịgbiphoghom, ẹtuan ọghaaph phọ eru, bịn ọdi ạkaaru. 22Ọpo ạghigh bọ ịizupha ịpa ogbo iitoor phọ, pọ ọdi ạnaghan ọghaaph phọ, kụ ogbiriḅa ịlo aḅirini phọ, rꞌạḍidugh ẹelha eḍighi dị ọghaaph phọ aghurughan bịn iimuma úmuum. 23Ọphori phọ ạghigh bọ ịizupha ịpa aḍiiḅi ade phọ, pọ ọdi ạnaghan ọghaaph phọ, kụ ạsighe ạmagh ịyaar kụ amuum iimuma, iniin oniin okuron, iniin odiinydi, iniin ịraardi.”
Aḍidogh ịbiakpa ạkeledeeny phọ
24Kụ ạJizos adogh ḍịnon aḍidogh ạḅeni bịdi mọ, “Kọmaaniom ọmar phọ kꞌẸnaan ịdipho ọghaaph oye dị ạzuph ịizupha ozo ọdi. 25Kụ mem aḍughul dị oomo awe rọnaani yogh, ẹpomoghian ọdi aru ạzuph ịbiakpa ạkeledeeny ạḅophoghiom igey ịbiakpa phọ, kụ aten ạḍua. 26Kụ mem dị ịizupha phọ mephoph kụ repoola yogh, bịn ọḅile ọmiin ịbiakpa ạkeledeeny edimom ni. 27Kụ ạrebene oye phọ oru kụ opuru nyọdi mọ, ‘Oye phọ, tọ igey ịbiakpa kụ ẹdi nạ ạzuph bọ ni. Ịḅile eḍighi ika kụ ịbiakpa ạkeledeeny eḍighom bọ?’ 28Ọdi mọ, ‘Ẹpomoghian kụ aḍighi ịduon.’ Ạrebene phọ opuru nyọdi mọ, ‘Nạ rạwa ni mọ yoor ọghi oruph ịbiakpa ạkeledeeny phọ ḍụghum?’ 29Kụ ọdi ạḅem mọ, ‘Eeye, ịdipho nyina kẹki bọ oruph ịbiakpa ạkeledeeny phọ, iini nyina kẹḅaram iniin igey ịbiakpa phọ etuphom. 30Ịbile ịyal phọ ịdi ẹḅophoghan ephoph ẹteeny mem ibugha phọ, kụ mị ạḅeni bụo ibugha phọ mọ ipụr eruph ịbiakpa ạkeledeeny phọ eekpomoghi ẹghoroghi rọkol esumughi ologhi ạnian, kụ egbi ọku igey ịbiakpa phọ ookpomoghi okpol ịsiphe ekpolom mọ.’”
Aḍidogh ekpo ạmustad
(Mạk 4.30-32; Luk 13.18-19)
31ẠJizos ạḅile adoghonaan bịdi ḍịnon aḍidogh mọ, “Kọsighe ekpo ạmustad kụ ọmaaniom ọmar phọ kꞌẸnaan. Mem lọ oye ạsighe ạzuph de ọdi, ekom epu ịpheri phọ ịizupha phọ. 32Kụ resi rephoph, bịn mẹbugh epu oomo phọ ịbam ireeny phọ, kụ ịnun phọ ẹki ẹloghoḍi ruutu pạ ịla phọ ọdi.”
Aḍidogh ayist phọ
(Luk 13.20-21)
33ẠJizos ạḅile adoghonaan bịdi ḍịnon aḍidogh mọ, “Kọsighe ọmar phọ kꞌẸnaan ọmaaniom yist dị ạnir ạsighe aḅunyonom inyadi aruuku aflaur kụ aseere, tụtu oomo phọ ạbred phọ aru.”
ẠJizos ạsighe sidogh kụ ạkaaphom
(Mạk 4.33-34)
34ẠJizos ạsighe sidogh kụ ạghaaphom ạḅeni ḍita awe phọ. Ọdi ọ́ghaaph ghan ịyaar ọḅeni bịdi, dị ḍidogh ụ́ḅaram. 35#Ạsuo 78.2Ịphen imite ịlo omuneniom ịpe oyil phọ Ẹnaan ạghaaph bọ mọ,
“Mị kạsighe sidogh kụ ạkaaphom,
ạḅeni bịdi rạraar dị ạaghian kꞌẹḅel egbiom aḅirini phọ.”
ẠJizos ạgba ẹmhu aḍidogh ịbiakpa ạkeledeeny phọ
36ẠJizos ạwile ḍita awe phọ ạghi aḍigh ologhi otu, kụ ạbumatuan phọ ọdi ọghi ọḅeni nyọdi mọ, “Gbạ ẹmhu aḍidogh ịbiakpa ạkeledeeny phọ esiighi bọ ozo phọ ụḅeni iyoor.”
37Ọdi mọ, “Ọony phọ Oye kụ ạzuph bọ igey ịizupha phọ. 38Ozo phọ, pọ aḅirini phọ; igey ịbiakpa phọ, pọ awe phọ oru bọ bụphe kꞌọmar phọ; kụ ịbiakpa ạkeledeeny phọ, pọ awe aruru. 39Ẹpomoghian phọ ọpo ạzuph bọ ịbiakpa ạkeledeeny phọ, pọ Eru phọ; ibugha phọ, pọ eekuna aḅirini phọ; bụo ibugha phọ, pọ ạruukpaany phọ Ẹnaan. 40Ịdipho ookpomoghi bọ ịbiakpa ạkeledeeny phọ kụ oguom bọ nịan phọ, kụ ịdi kẹtol mem eekuna aḅirini phọ. 41Ọony phọ Oye katom ni rụukpaany phọ ọdi, kụ bịdi ọki ẹpe ọmar phọ ookpomoghi oomo ạbulo ọkom ịkaraph rꞌabuḍighinom ịkaraph ọsighe 42osumughi ologhi egu ạnian phọ kụ bịdi ọtol sịphe omoghi yogh ọkirigha. 43Pọ kụ amem dị abugey awe phọ kọmu ịdipho erumuḍio, pạ ọmar Ọde phọ ạbidi. Ọlo ạmoogh rụru ọnaghanam ạḍughum, ọdi ạnaghan!”
Aḍidogh ẹelha dị ạaghi
44“Ḅịle kẹn, kọsighe ni ọmar phọ kꞌẸnaan ọmaaniom ịdipho ẹelha dị oḍi ude. Kụ oye ạghi ạmiin kụ ạḅile ạaghi, kụ agheel rꞌọḅaal ologhi kụ aalhaghi oomo ạraraar dị ọdi ạmoogh, kụ ạghi aghoom de phọ ạḍiphe phọ.”
Aḍidogh ikpo ẹbe phọ
45“Ḅịle kẹn, kọsighe ni ọmar phọ kꞌẸnaan ọmaaniom ịdipho ọghaaph oye dị ạghi ḍighi ọwa ikpo ẹbe ogho. 46Kụ ạmiin eniin egbogh ekpo ẹbe, kụ agheel kụ aalhaghi oomo ạraraar dị ọdi ạmoogh kụ ạghi aghoom.”
Aḍidogh ọzuguru phọ
47“Ḅịle kẹn, kọsighe ni ọmar phọ kꞌẸnaan ọmaaniom ạkoni ọzuguru dị ozu ọphiiny, kụ ozuom ọdo kịrokiro ina. 48Kụ rokpo ọzuguru phọ rọsaany oghuugh ạnyu kụ ọtol ude, kụ ọotoghion igey ina phọ ọloghoḍi rugunum, kụ ọsighe ịḅoria phọ otoḅologhi. 49Ịduon kụ ịdi kẹtol mem eekuna aḅirini phọ: ạruukpaany phọ Ẹnaan kotu ni kụ ọson bụkaraph awe phọ sịphe ogbo abugey phọ, 50kụ ọsighe osumughi ologhi egu ạnian phọ kụ bịdi ọtol sịphe omoghi yogh ọkirigha.”
Igbaany rꞌimoom igey
51Kụ ạJizos apuru bịdi mọ, “Nyina ẹkpaph ni oomo ịphen phọ ẹpam?”
Bịdi omeera mọ ii.
52Kụ ọdi mọ, “Ịduon phọ, pọ tọrobo ọtughemia iilogh dị aḍighi ọlo ọmar phọ kꞌẸnaan pọ kọmaaniom nyọdi uwotu dị ạaḅeghion igbaany rꞌimoom ạraraar phọ dị aseerian bọ, kụ ạtuugh ịpe ẹnighe bọ kụ ạsighe agananami.”
Bụo ạNazeret okel Jịzos
(Mạk 6.1-6; Luk 4.16-30)
53Kụ ạJizos rodoghogh sidogh phọ ịphen rọman, kụ ạḍua 54arigheel ẹmha ọdi, kụ aḍigh obughotu phọ ạtughemi we. Kụ ạbuphe ọnaghan bọ usinighian ni kụ ọḅem mọ, “Oye phọ ọphon ạghi ẹghen kụ alegheri bọ ịphen phọ, ạḅile bọ aḍighi ịiḍaany phọ ịphen? 55Ọphon phọ ḍịen kọ́ony ọkaam ạmaka phọ? AMeri ḍịen kụ kónhiin phọ ọdi? AJems rꞌạJosef, rꞌaSaimon rꞌaJudas ḍịen kábumor phọ ọdi? 56Bụen rꞌayira odi bọ sịen ḍịen kábumarani phọ ọdi? Oye phọ ọphon ạghi ẹghen kụ alegheri bọ oomo phọ ịphen phọ?” 57#Jọn 4.44Kụ bịdi ughel li Jịzos.
Kụ ọdi ạḅeni bịdi mọ, “Oyil ólho ghan dị eghuan ụ́moogh, omuton ẹmha phọ ọdi rꞌọto ọdi.” 58Kụ ẹpe phọ, ọdi óḍighi ịbadi ịiḍaany loor ẹmoogh omeeraam mọ ạbidi.
Currently Selected:
Matiu 13: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
