Matiu 12
12
Aḍipuru ịlo aḍio ophooghian phọ
(Mạk 2.23-28; Luk 6.1-5)
1 #
Dut 23.25
Íbia bịn ạJizos atelhe raten ozo ịbiakpa ḍiniin aḍio ophooghian, kụ ọkoony rasiph bụmatuan phọ ọdi, kụ bịdi omiigh ọkuughi ịbiakpa phọ olhe. 2Kụ aFarisi phọ rọmiin bọ ịphen phọ, kụ ọḅeni Jịzos mọ, “Pogh aani ịphen ạbumatuan phọ ạna roḍighi bọ ḍio ophooghian phọ. Ugbini, ugbini.”
3 #
1 Sạm 21.1-6
Kụ ọdi mọ, “Nyina kạ̋al ghan ịpe aDevid aḍighi bọ, mem mọ ọkoony phọ asiph bọ nyọdi rꞌạbuphe ọdaph bọ nyọdi? 4#Lịv 24.9Ịdi ọdi aḍigh otu Ẹnaan phọ, kụ bịdi olhe eḍien phọ oseere bọ sịphe ạdol iigbia phọ nyẹpe ị́kpe bọ lọ awe kolhe, emuton riil ạrikia phọ bịn. 5#Igb 28.9, 10Ḅịle kẹn, nyina kạ̋al ghan sịphe iilogh phọ aMozis ịpe, tọrobo aḍio ophooghian, ariil ạrikia phọ sịphe Otu Ịiḅereghi phọ ọka bọ ologh aḍio ophooghian phọ, kụ ụ́ḅaam bọ bịdi? 6Kụ mị rịḅeni ghan inyina mọ ịyaar dị ẹman ịyaar epu Otu Ịiḅereghi phọ edi ni sịen. 7#Mat 9.13; Hos 6.6Ḍiodiidi Ẹnaan ịḅem ni mọ, ‘Ọphinyon ạrikia ịmi ụ́ḅeeraan. Ọnma ghan ighirigiir kụ ẹdi mị rạwa.’ Eḍighi ịyaar dị nyina ẹnaghan ni ẹmhu ịduon phọ, nyina mísophonaan apum ịḅam rụmhu awe dị mạar ụ́piom. 8Ọony phọ Oye kụ ạmooghom ni ḍio ophooghian phọ.”
Oye dị ạḍighaagh ẹḅoonian
(Mạk 3.1-6; Luk 6.6-11)
9ẠJizos ạḍua sịphe ạghi aḍigh obughotu phọ ạbidi. 10Kụ oye ạrol li sịphe dị ạḍighaagh ẹḅoonian. Buniin awe ụrol aani ni pạ dị rọwa ghan osoorom ọdi erugh kụ opuru mọ, “Ẹkpe ni dị yira kookonom rookonoma ḍio ophooghian phọ ḍụghum?”
11 #
Luk 14.5
Kụ ọdi ạḅeni bịdi mọ, “Eru mạar dị oniin ọnyo anyina ạmoogh oyool-ọga kụ ameel asuma ooni ḍio ophooghian phọ, ọdi kaḍighi ika? Ọdi kạki ni ạpam apune. 12Kụ ạri oye kụ ạman mạar apu oyool-ọga. Esi ịduon phọ ologh phọ ameeraam ni mọ yira oḍighi ghan ni iiḅi oye ḍio ophooghian phọ.” 13Kụ ọdi ạḅeni oye phọ mọ asele ḍịghaagh phọ ọdi.
Kụ oye phọ rosele ḍịghaagh phọ, bịn kụ emoon, ịdipho ạḍieri phọ. 14Pọ kụ amem dị aFarisi phọ ọghi oḍighan egir kụ oosophoghian ịlo oghiigh ạJizos.
Ọony-otu phọ Ẹnaan ẹsaḅar bọ ẹsighe
15ẠJizos rọnaghan bọ, kụ ạḍua sịphe phọ kụ aḍita awe ọtuan nyọdi, kụ ọdi aakonom oomo phọ ạbuphe úmoonogh bọ, 16kụ ạphur bịdi rụru mọ kúgananami nyịno. 17Ịphen imite omuneniom ikpo ọnhu phọ Ẹnaan Azaya, oyil phọ ọdi, ạḅem bọ mọ,
18 #
Azay 42.1-4
“Ọphon Ọony-otu phọ ạmi, ọpo mị ạsaḅar bọ ạphomoghian.
Eḍighinom ịyaar phọ ọdi kụ ịḅeeraan ịmi iboom.
Mị kạngo nyọdi uwaloor phọ ạmi,
kụ ọdi agbeelom asiph rꞌakeel ạḅeni we areelhe kịrokiro phọ.
19Ọdi kạ́agbaghanaan, kạ́wa sighiton,
ḅịle kẹn kạ́looghi ẹpe aroḅodo phọ.
20Ikpu dị rebunaan ọdi kábun amuton.
Nịan dị reḍim ọdi káḍime.
Ọdi kaḍighi ni oḍighi phọ ọdi tụtu ọdi ạmiin mọ asiph rꞌakeel meekpereghiom ịkaraph.
21Kụ awe areelhe kịrokiro phọ kọmoogh ni oḍuom ologhi esi ọdi.”
ẠJizos rꞌaBielzebul
(Mạk 3.20-30; Luk 11.14-23)
22Kụ awe ụsighe ni oye dị eru eghola, ekpom ọka ikpom ariḍien, oruomonaan Jịzos, kụ ọdi aakonom nyọdi, kụ oye phọ amiigh ọḅa rꞌọmiin eten. 23Kụ iḍighi ni iikia esi oomo awe, kụ opuru ghan mọ, “Ọphon ọony phọ aDevid phọ ni ḍụghum?”
24 #
Mat 9.34; 10.25 Kụ mem dị aFarisi phọ ọnaghan bọ, kụ ọphagharanaan mọ, “Ọdi ạsighe ịikpo aBielzebul, ọkpana aruru phọ, kụ raporoghom ghan bọ ruru phọ.”
25ẠJizos malhegheri ni ịitughian phọ ạbidi, kụ ạḅeni bịdi mọ, “Ọmar lọ ạaya kape ni; kụ ẹmha rꞌeghunotu lọ ạaya kẹ́meera. 26Eḍighi ịyaar dị aSetan ạwaanaan sighiton loor phọ ọdi, pọ ịikpo phọ ọdi mạaya kụ ọmar phọ ọdi kạ́meera. 27Ịduon nyina rẹḅem ghan bọ mọ ạmi ụsighe ịikpo aBielzebul kụ raporoghom bọ ruru phọ, mụdi ịikpo phọ ạbumatuan phọ anyina ọsighe ghan bọ roporoghom ghan ruru phọ ịḍua ẹghen kụ emite? Ạbumatuan phọ anyina kụ ugananami bọ ọkpe phọ anyina. 28Uwaloor Ẹnaan kụ ụngo bọ ịmi ịikpo ophoroghom aruru phọ. Ịduon phọ reḍeenaan ghan mọ ọmar phọ kꞌẸnaan maru ni sịen ogbo phọ anyina, kụ nyina ílegheri.
29“Oye ólho dị katue ạka otu oye dị rạkpar ghan ịikpo abum rạraar ạḍuanam, emuton dị ọdi mạphur ạphaḍi oye phọ, pụruku ọdi katue abum rạraar otu phọ.
30 #
Mạk 9.40
“Oye lọ ịmi úḍighan, pọ rueenom ịmi elephiri, kụ oye lọ ịmi úḍighan ookpomoghi awe phọ, pọ rạwalalami ghan bịdi. 31Esi ịduon phọ mị rịḅeni ghan inyina mọ oomo ịkaraph rꞌọopu kọsar ri ọbilenaan we, kụ ọopu Uwaloor Iigbia phọ kọ́sar ọbilenaan. 32#Luk 12.10Oye lọ ạghaaph ịkaraph ịlo Ọony phọ Oye kọsar ri ọbilenaan nyọdi, kụ oye lọ ạghaaph ịkaraph ịlo Uwaloor Iigbia phọ kọ́sar ọbilenaan sịen aḅirini phọ ọphon rꞌọpo katu bọ.”
Ireeny rꞌiimuma phọ ạbidi
(Luk 6.43-45)
33 #
Mat 7.20; Luk 6.44 “Nyina ẹḅem mọ oreeny phọ ọphon ạnighe ni, pọ iimuma phọ ọdi ẹnighe aani ni. Nyina ẹḅem mọ ọphon ọḅoria oreeny, pọ iimuma phọ ọdi ịḅoria aani ni. Esi iimuma phọ kụ ẹdi nyina kelegheri ọdo phọ oreeny phọ. 34#Mat 3.7; 23.33; Luk 3.7; Mat 15.18; Luk 6.45Sey, nyina ọmar ạsiḅom, ika nụun kụ ẹdi nyina ạbukaraph awe phọ kẹkaaph igey ạraraar? Ịpe edi bọ ologhi phọ oye kụ ẹdi ọdi rạkaaph ghan kamitiom. 35Ogey oye rạkaaph ghan igey ạraraar phọ dị aakpomoghi bọ sịphe ologhi phọ ọdi kụ kamitiom; kụ ọkaraph oye rạkaaph ghan ịkaraph ạraraar phọ dị aakpomoghi bọ sịphe ologhi phọ ọdi kụ kamitiom.
36“Kụ mị rịḅeni ghan inyina mọ ḍio ịiruen phọ kọmagh ni tọrobo oye osophonaan oomo eepua ikpo ọnhu lọ ọdi ạḅa ọngo. 37Kọsighe ni ikpo ọnhu phọ ạna kụ osophom ịiruen asiph rꞌakeel ọngo nyịna.”
Opuru ọmiin aani ịiḍaany
(Mạk 8.11-12; Luk 11.29-32)
38 #
Mat 16.1; Mạk 8.11; Luk 11.16 Ịphen reten, kụ buniin ạbutughemia iilogh phọ rꞌaFarisi phọ ọghaaph omitiom mọ, “Ọtughemia, yoor rọwa mọ nạ ḍighi eḍeenaan yoor ọmiin aani.”
39 #
Mat 16.4; Mạk 8.12 Kụ ọdi mọ, “Uḍighi ika kụ awe ạnyiidipho eeph bọ ịduon rꞌelegheri Ẹnaan? Bịdi rọwa ghan ịiḍaany kụ ịiḍaany dị kọngo bịdi ílho, emuton ịiḍaany phọ ẹpe aJona oyil phọ Ẹnaan. 40#Jona 1.17Ịdipho aJona ạrol bọ ọkuruḅaka egbogh ena phọ ịraar aḍughul rꞌịraar ootaany kụ ẹdi Ọony phọ Oye kạtuugh ạtol aani sịphe ologhi ade phọ ịraar aḍughul rꞌịraar ootaany. 41#Jona 3.5Ḍio ịiruen phọ, aweye aNineve koḅetenu ni kụ ọgba opume oghiil phọ ọphon, ịdi eḍighi bọ bịdi ụnaghanan ni ọghaaph phọ aJona, kụ okiton esi ịkaraph phọ ạbidi. Ịyaar dị ẹman mạar epu Jona edi ni sịen. 42#1 Ạbud 10.1-10; 2 Krọ 9.1-12Ḍio ịiruen phọ, ukueni-ạnir phọ ọpo ạda bọ Siba kaḅetenu ni kụ ạgba iphume inyina, ịdi eḍighi bọ ọdi ạḍua ẹnon eelhe kụ aru ọnaghan ọghaaph olegheri ịyaar phọ ạSolomon, kụ ịnaghan, ịyaar dị ẹman mạar epu Sọlomon edi ni sịen.”
Ọkaraph uwaloor ạḅile aḅula
(Luk 11.24-26)
43“Mem lọ ọkaraph uwaloor amite loor oye ạḍua, ọdi ratelhe yogh ghan rikpisi lọ ạmuum úlho ọwa amarugh. Kụ eru mạar dị ụ́miin, 44kụ ạḅem mọ, ‘Mị kaḅula pạ otu phọ ạmi mị ạḍua bọ kụ amite.’ Kụ ọdi atu ạmiin oopho esi phọ bịn dị oḅeer oselemi. 45Kụ ọdi ạki ạsighe oḍual ịnon ịkaraph aruwaloor dị eeph epu nyọdi, kụ etu etugh sịphe phọ, kụ ạdol oye phọ ọpo kebeeph epu ḍịḅel phọ. Ịduon kẹn kụ ẹdi kẹtolonaan ni ọkaraph oghiil phọ ọphon.”
Onhiin rꞌabumor ạJizos
(Mạk 3.31-35; Luk 8.19-21)
46ẠJizos odi rạkaaph kạḅeni we phọ, kụ onhiin ọdi rꞌabumor ọdi oru ọmeregha ẹpe erugh ịlo bịdi kọkaaphan rꞌọdi. 47Kụ oniin oye ạḅeni nyọdi mọ, “Pogh, onhiin ạna rꞌabumor ạna ọmeregha ẹpe erugh, lọ nyina kẹghaaph ọghaaph.”
48Kụ ạJizos ạphagharanaan mọ, “Ạnhian kụ onhiin ạmina, ḅịle bụanhian kụ abumor ạmina?” 49Kụ ọdi ạma bụmatuan phọ ọdi kụ ạḅem mọ, “Bụen phọ kụ onhiin ạmi rꞌabumor ạmi. 50Tọrobo ọlo raḍighi ghan ịpe Ọde phọ ạmi odi bọ kꞌạke phọ rạwa bọ kụ umor ạmi rꞌumarani ạmi rꞌonhiin ạmi.”
Currently Selected:
Matiu 12: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
