Job 41
41
1 #
Ạsuo 74.14; 104.26; Azay 27.1 Ạnhian kụ katue ạsighe ekpo aḍiḅaph bịn ạḍaam Lẹviatan
ọbo kẹn ạsighe oḍigh bịn ạkpoom nem ọdi?
2Nạ katue ni ạlogh oḍigh apughe izon eghol
ọbo kẹn ạkomom ḍiḅaph lẹegh phọ ọdi?
3Ọdi katue ni ạaḅereghian nyịna mọ meera ọno agheel?
Ọdi kạlom ni nyịna ọnma ighirigiir ḍụghum?
4Ọdi katue ni ameera
aguanaan okumu ạna kꞌagee-pọ ḍụghum?
5Nạ katue ni ạkpooghi nyọdi ịdipho ẹnun lọ orughom otu,
ịdipho ịyaar lọ ạnmanyaan-otu ạna kopeghom ephegh?
6Awe lọ rọze ghan ina kotue ni otu omerenyan ogho ọdi ḍụghum?
Abumuul ḍighi kotue ni oogbo nyọdi obool ḍụghum?
7Nạ katue ni ạsighe ịsoph atoph ḍizu phọ ọdi
ọbo kẹn ạsighe ogbogh ọsoph agim ẹmhu ọdi?
8Ḅọgh nyọdi mem bịn nạ kạ́ḅile mun amuneni ịyal;
nạ kábula ẹgham dị nyina kebe!
9Tọrotoro oye lọ ạmiin Lẹviatan
rameel ghan ni ude loor esi eepuph.
10Mem dị oye ạdegh nyọdi, ọdi rạgam ghan ni iboom;
oye ólho dị katue ạmerenyan nyọdi.
11Ạnhian kụ katue ạdegh nyọdi kụ ạtol ẹereegh?
Oye ólho sịen oomo aḅirini phọ dị katue aḍighi ịdipho?
12Mị kạḅeni nyịna ịlo aruwol eghol ạLeviatan
ạḅile ạmaaghi ịpe ọdi ạbugh bọ ạḅile ạkpar ịikpo.
13Oye kátue ạpaar ozu ạnyu phọ ọdi
ọbo kẹn ạsighe ọsoph agimom rạna phọ ọdi ạkpologhian bọ.
14Ạnhian kụ katue ạtagharan sịleegh phọ ọdi,
ịdipho ạralaal phọ ịpe eḍigh bọ ruugu phọ kụ ekitonom bọ?
15Ọman phọ ọdi ọsuaram kụ ạde akitonom,
ẹḅaraghan sịphe aloor phọ kụ ẹkpar ịdipho ẹna.
16Ọmaar ri kụ otulughi ọgbiphe
ịdi kótue ọlogh ẹlem sịphe ịbaay phọ.
17Oomo phọ ạbidi ẹmaar ẹgbiphan
ịdi ịyaar kétue ẹpam ẹkpagharan.
18Ạnian kụ remite ghan mem lọ ọdi ạzia,
kụ ariḍien ọdi rẹtaphan ghan ịdipho erumuḍio.
19Asinem ạnian kụ remite ghan ọnhu ọdi
ịdipho ạmuum lọ rakil.
20Ạmughi ramiteghu ghan izon ọdi,
ịdipho esi lọ okpoph rọogho kụ rọsaam eḍien.
21Aḍiphooghu ọdi remitiom ghan nịan;
asinem ạnian kụ remite ghan ọnhu ọdi.
22Orum ọdi ạmoogh ịikpo
ịdi oomo awe lọ ozuan nyọdi aruugu rasiph ghan ni.
23Sịphe aḍizu phọ ọdi esi dị edugh ílho ghan;
ẹkpar ịdipho okuron.
24Sịphe ekpom mọ ọdi oghiilaan ólho ghan,
ẹkpar ịdipho aḍighiigh.
25Mem dị ọdi aḅetenu, ghạlamo awe igbogh ịikpo bịn rokiilaan ghan ni;
aruugu dị ịlo oḍighi ílho kụ rasiph ghan bịdi.
26Elhool ẹgham ílho dị ketue eben nyọdi ẹlogh ẹlem;
ọsoph ọbo kẹn ẹkpina dị ketue egim nyọdi ílho ghan.
27Esi ọdi okuron adugh ọkul ịdipho ạroogho lọ mạgharaghar;
ḅịle enaba edugh ịdipho ạḍipe lọ mẹḅor.
28Ẹkpina ílho dị ketue eḍighi ịdi ọdi kakiil;
ạrana lọ oroḅol nyọdi rẹkigh ghan ịdipho ạroogho lọ ọsam kụ mạgharaghar.
29Esi ọdi ẹḅam ẹkigh ọpherepe ạroogho lọ ọsam kụ mạgharaghar,
kụ ọdi rạmilogh ghan mem lọ awe oroph ọsoph.
30Ipholopol dị edi ọkuruḅaka ọdi ẹkigh ipoḍi oko lọ aḅomaan;
bịdi rẹparion ghan ọogha ade phọ ịdipho okuron lọ rọgbiom ịbiakpa.
31Ọdi rapighemi ghan ọphiiny ịdipho ạmuum lọ rapul,
kạḅile aḍighi ịdi kapul ịdipho aguugh ạmunum lọ rọsa.
32Ọdi rạbile ghan ni eten dị rẹmu ẹpe ọman phọ ọdi,
kạḅile akiton ọphiiny phọ atene ọphalaḅaal oopha.
33Ịyaar ílho sịen ade phọ dị kọsighe ọtomaam nyọdi;
ọdi ịyaar dị ị́moogh oghiilaan.
34Ọdi rapogh ghan ni kasoore ghạlamo rꞌịnam lọ ephoophe loor;
ọdi kụ ọolha-ẹmha oomo ọmar ịnam.
Currently Selected:
Job 41: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
