Job 42
42
1Kụ aJob ạphagharanaan Ọmoogh-we phọ.
Job
2Ọmoogh-we, mị alegheri ni mọ nạ ạmoogh oomo ịikpo;
mọ nạ katue ni aḍighi tọrotoro ịlo nạ ạwa.
3 #
Job 38.2
Nạ apuru ịpe mị ạtu bọ kụ ạḍagha bọ olegheri-ịyaar phọ ạna
mem dị elologhi ạmi eleeny ịduon.
Mị ụghaaph ghan ịlo ạraraar dị mị ụ́naghanan,
rꞌịlo ịiḍaany dị ipel ịmi olegheri.
4 #
Job 38.3
Nạ ụḅeni ịmi olher ạruru mem mọ nạ ạghaaph ghan bọ,
ḅịle mọ mị ụpagharanaan sipuru phọ ạna.
5Mem dị meten mị ulegheri ghan rạraar dị awe ụḅeni ịmi
kụ ọlo nyịidipho mị mạkaraghi ạsighe riḍien ạmi ạmiinom nyịna.
6Loor ịduon phọ umugholoor rusiph ni ịmi esi oomo phọ ịpe mị ạḅemogh bọ
kụ mị magbula ọoru rꞌophugh esi okiton.
Ekureriom mọ
7Ọmoogh-we phọ rọghaaph bọ rọmadan rọḅeni Job, kụ ọdi ạḅeni Ẹlifaz, “Mị ạmoogh ni ọghagh ologhi esi ạna rꞌịyal phọ ạrighiri phọ ạna, loor esi dị nyina ị́kaaph ịpe eru bọ ịne ịlo ạmi, ịdipho aJob otelhedom mọ ạmi ạghaaph bọ. 8Nyịidipho sịghe oḍual ilephiri ạsinam rꞌoḍual idughuna ạghiomonaan Job ạsighe ạphighironaan ẹkia loor phọ anyina. AJob kịiḅereghinaan inyina kụ mị kạnaghanan ni ịiḅereghi phọ ọdi bịn mị ạbile oofolomi anyina ịdipho nyina ẹkpe bọ oofolomi phọ. Nyina ị́kaaph ịne ịlo ạmi ịdipho ọdi ạghaaph bọ.”
9Ẹlifaz rꞌạBildad ḅịle rꞌaZofar oḍighi ịpe Ọmoogh-we phọ ạḅeni bọ bịdi oḍighi phọ, kụ Ọmoogh-we phọ ạnaghanan ịiḅereghi phọ aJob.
10 #
Job 1.1-3
AJob rọoḅereghinaan bọ ịraar phọ ạrighiri phọ ọdi, kụ Ọmoogh-we phọ ạḅile aḍighi ịdi ọdi ạḅile ạmoogh ẹelha kụ ạḅile ạngo nyọdi ịyal ọdo ẹelha phọ ẹpe ọdi ạmoogh ghan bọ mem dị meten. 11Oomo abumor phọ rꞌabumarani phọ rꞌabugbaany ạrighiri phọ aJob oru ghan ophogh ọdi rꞌole ẹyaal sịphe kꞌọdi. Bịdi ọseenyaan ghan nyọdi ọḅile ọodereghi nyọdi esi oomo ịiḅaghami phọ Ọmoogh-we phọ mạngo bọ nyọdi. Tọrotoro ọnyo ạbidi ạngo ghan nyọdi ikpoki ḅịle rꞌagulu dị oḍighinom gol.
12Kụ Ọmoogh-we phọ ạseph ruukuna phọ aJob apuemi ịpe ọdi ạseph bọ emiighom mọ. AJob ạmoogh ḍioph rꞌinya ọonir iyool-ịga, odiiny ọonir ạsikamel, ịyal ọonir ạsinam, ḅịle rꞌoniin ọonir ịnam adool. 13Ọdi aḍighi ọde oḍual alephiri ạnmuny rꞌịraar ạnmanyaan. 14Ọdi aghol ọkpanyan phọ mọ aJemima, ọpo atum bọ ọdi aghol mọ aKezaya, ḅịle ọkar ọbam mọ ọdi aghol mọ aKeren Hapuk. 15Ạbunon ạnmariir ụ́tol sịen oomo aḅirini phọ dị ọnighe ịdipho ạnmanyaan phọ aJob. Ọde phọ ạbidi adi ni erua ạngo aani bịdi ịdipho ọdi ạngo bọ bumor alephiri phọ ạbidi.
16Ịphen phọ reten kụ aJob ạḅile ạrol oniin okuron rꞌinyadi ạsia, tụtu ọdi ạmiin nmụny oko rꞌạnmuny ạnmuny-oko ọdi. 17Kụ ọdi agbi nụun omugh mem dị ọdi mạkpo iboom.
Currently Selected:
Job 42: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
