Job 38
38
Ọmoogh-we phọ ạpagharanaan Job
1Ọmoogh-we phọ ạḅaanaan Job mem oghim.
Ịkponhu Ọmoogh-we
2Nạ ạnhian opuru ịlo olegheri ịyaar phọ ạmi
rꞌikpo ọnhu elologhi phọ ạna?
3Mẹera ịlo olephiri ọony
ạphagharanaan ḍipuru phọ mị kapuru bọ nyịna.
4Nạ ụrol li mem mọ mị ạlhem bọ aḅirini phọ?
Eḍighi ịyaar dị nạ alegheri ni kꞌịphen kꞌịphen, pọ ụḅeni ịmi ịphen phọ.
5Ạnhian kụ agbiighi bọ ịpe aḅirini phọ kaleeny bọ?
Ạnhian kụ ạpham bọ oḍigh phọ ọtooghiom bọ?
Nạ alegheri ni oomo ọphagharanaan phọ ḍụghum?
6Eeghe kụ rẹpam ghan bọ rọko phọ erool bọ de phọ?
Ạnhian kụ aphighi bọ aḅirini phọ?
7Ḍịroor aḍio phọ ạḍiphe phọ ạraanaan phọ ịmoor ri sụor,
ḅịle kẹn ạruukpaany kꞌạke phọ ịlo ni ḍịolho iboh.
8 #
Jer 5.22
Ạnhian kụ aghughi bọ rughuugh phọ kụ ọphiiny phọ ạmeera bọ
mem mọ ọpo ọdi aruphaan bọ amite ọkuruḅaka ade phọ?
9Mị kụ ụsighe bọ ọotu aakpereghiom ọphiiny phọ,
ạḅile ạsighe ufiri aphurughiom.
10Mị kụ ụmaanaan ọku ọphiiny phọ
ạḅile ạlhogh iigbom rꞌeḍighom.
11Kụ mị ạḅeni nyọdi mọ, “Nạ masi sịen, kạ́ḅeeny!
Oologh phọ ạna asi ghan sịen bịn!”
12Job, kꞌekulha kꞌekulha nạ mạto ghan ni
bịn ạḍiroor ẹḅaal?
13Nạ mạto ghan ni bịn ạḍiroor ẹsighe de phọ
ẹḅile epighemi bụkaraph awe phọ riisi ịbooghian phọ ạbidi?
14Ootaany kụ ragananami ghan roogbolom rꞌariiḍiiny phọ
ịdipho ẹekula ukpe lọ ọkpooghi,
eganana ịdipho ẹda lọ ọzer esi ọposo.
15Ạḍiḅaal ootaany rẹeḅaghami ghan ni bụkaraph awe,
kẹḅile ekikima bịdi esi ịkaraph.
16Nạ masi ni rụudu ude ọphiiny ḍụghum?
Nạ marelhe ni ude otu-ḅualhe phọ?
17Oye maḍeenaan ni nyịna rụnhu-aḍibuo ọmar iḍim?
18Nạ alegheri ni ịpe aḅirini phọ ạbugh bọ aleeny?
Ụphagharanaan ịmi mụghumo nạ alegheri.
19Nạ alegheri ni ẹpe ạḍiḅaal ẹḍua ghan bọ kụ retu,
ọbo kẹn ẹpe ufiri phọ rạḍua ghan bọ karu?
20Nạ katue ni aḍeenaan bịdi ẹekela ekpisi ọghi,
ọbo kẹn ọḅile oḅulemi ạbidi?
21Mị alegheri ni mọ nạ katue ni loor ịduon nạ mạkpo bọ
kụ nạ ạrol aani bọ ni mem mọ ọlhem bọ!
22Nạ maḍigh ni iisoph phọ ịpe mị akpol bọ ibikpo phọ?
23Mị aseere rakoriom ghan mem ịiḅaghami,
siḍughul-otu elephiri rꞌạraagham.
24Nạ mạghi ghan ni sịphe erumuḍio phọ rẹḍua ghan bọ kemite,
ọbo kẹn sịphe ookuugh phọ raḅetenu ghan bọ ẹpe erumuḍio phọ remite ghan bọ?
25Ạnhian kụ ạkonyon sikol phọ ạmuum ọlophia phọ rạdaph ghan bọ,
ạḅile ạḅaalami eten ọomaany phọ?
26Ạnhian kụ raseere ghan bọ ọlophia ẹpe oye útugh bọ?
27Ạnhian kụ raadu ghan mụum ḍịgharaghar ade phọ
kụ ạroogho phọ rasi ghan bọ?
28Ọlophia phọ rꞌooto phọ ọmoogh ni ọde ḍụghum?
29Ạnhian kụ onhiin ibikpo phọ rꞌooroogh phọ,
30ọpo rakiton ghan bọ mụum katene ẹna,
ạḅile ạaphomi ạnyu ọphiiny?
31 #
Job 9.9; Ẹmos 5.8 Nạ katue ni ạkoroghi rạanaan ạPledis
ạḅile ạakpo iḍigh phọ ẹpham bọ ẹenaan Orion ḍụghum?
32Nạ katue ni amitiom rạanaan phọ mem dị ẹkpianaan,
ạḅile aḍeenaan erelhe Egbogh rꞌẸbam ạranaan phọ oghol bọ mọ ạBeya?
33Nạ alegheri ni iilogh phọ repogh bọ okuaḍio phọ,
ḅịle kẹn nạ katue ni ạsighe iilogh phọ ịpe phọ apoghom de phọ?
34Nạ katue ni ạto ạḅeni ọotu phọ
bịn ọlophia ạloph?
35Kụ eḍighi ịyaar dị nạ ạto mọ aḍio phọ ẹmepheghian,
ọdi katue ni atu risigh ạna ạḅem mọ, “Mị odi oḍighi ịlo nạ ạḅem.”
36Ạnhian kụ ạḅeni bọ ạkeledeeny Ọphiiny aNail phọ mem lọ ạmuum-aḍigho katu,
ọbo kẹn ạnhian kụ ạḅeni kẹnegh mem lọ ọlophia kạloph?
37Ạnhian kụ ạsu ologhi dị katue agbi ọotu phọ
kụ ạḅile ạgoghoghomi mọ ọlophia aakuan,
38ọlophia dị kaakpomoghi ophugh phọ atene rọbol.
39Nạ kụ rạwaanaan ghan eḍien ạnam-dịka ḍụghum,
kạḅile ạpheremi eḍien ugheel ạnam-dịka lọ ọkoony rasiph,
40mem lọ bịdi ạaghian iloghi aropogh phọ ạbidi,
ọbo kẹn ọmina yogh iloghi aropogh phọ ạbidi regon?
41Ạnhian kụ rạngo ghan eḍien rẹghiligho
mem dị rẹpeeph rꞌọkoony,
mem dị ạnmuny ạbidi rumoghiom ịmi eḍien?
Currently Selected:
Job 38: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
