Job 37
37
1Oghim raḍighi ghan ịdi oḅio ạmi rakaph ghan.
2Oomo anyina, ịnaghan ẹḍogh Ẹnaan,
ọomaany phọ ạḍua bọ ọnhu phọ ọdi ramite.
3Ọdi kụ ratom ghan bọ kụ aḍio phọ rẹmepheghian ghan bọ
ẹpe okuaḍio phọ, ẹḍua eniin eekuna ade phọ esi ẹpheri phọ.
4Kụ ogbi ọnaghan ẹḍogh phọ ọdi,
egbogh ẹḍogh ọomaany phọ,
ḅịle kẹn aḍio phọ rẹmepheghian ghan oomo amem mọ.
5Esi ịto phọ Ẹnaan ịikia ạraraar remite ghan ni,
ịikia ạraraar dị yira kótue ọnaghanan.
6Ọdi ạto mọ ibikpo ẹloph sịen ade phọ,
kụ ạḅile ạngo ogbogh oghim.
7Ọdi kụ rakureri ghan iiḍighi awe;
ọdi raḍeenaan ghan bịdi ịpe ọdi katue bọ aḍighi.
8Ilhom ịnam reḍiku ropogh ạbidi.
9Oghim rạḍua ghan ẹpe esoorom mọ kụ karu,
kụ oroogh dị ạbugh iboom rạḍua ghan ephunom mọ kụ karu.
10Aḍiphooghu Ẹnaan rẹpoomi ghan ni mụum,
kẹḅile etene ibikpo.
11Aḍio phọ rẹmepheghian ghan ẹpe ọotu phọ,
12ịduon bịdi retelhe bọ esi ogbi phọ Ẹnaan.
Bịdi reḍighi ghan oomo ịlo Ẹnaan ẹto,
tọrotoro ekpisi sịen oomo aḅirini phọ.
13Ẹnaan retom ghan ọlophia mọ ạlophom de phọ;
ọdi katue ni ạsighe ạliom oye
mụghumo oḍeenaan ạḍiḅeeraan esi ạbidi.
14Job, ḅoorian ẹnum ạnaghan;
gbiighi rạraar ịiḍaany phọ Ẹnaan raḍighi ghan bọ.
15Nạ alegheri ni ịpe Ẹnaan rẹtooghi ghan bọ
kụ reḍighi ghan bọ ịpe aḍio phọ rẹmepheghian ghan bọ?
16Nạ alegheri ni ịpe ọotu phọ ratelhe ghan bọ ẹpe okuaḍio phọ,
oḍighi ẹekia ẹmaar phọ Ẹnaan?
17Eeye, nạ kạmiinom ghan esi ẹghologhol phọ bịn
mem lọ ookuugh ẹpe esoorom mọ rakugh de phọ.
18Nạ katue ni ạloghonaan ḍịghaagh Ẹnaan phọ ọotarion okuaḍio phọ,
ạḅile aḍighi ịlo kạkpar ạḅile ạmu ịdipho okuron ḍụghum?
19Ụtughemi iyoor ịlo ọḅeni Ẹnaan;
yoor ụ́moogh mun ịyaar ọḅem.
20Mị rápuru ọḅaanaan Ẹnaan;
eeghe kụ iḍighi kụ mị kạngo bọ nyọdi ọgel oogulemi ạmi?
21Kụ nyịidipho ạḍiḅaal okuaḍio phọ reeloghoḍian ni,
rẹmu kẹphughan ophogh;
ḅịle ookuugh phọ maḅeer okuaḍio phọ ạḅaalami.
22Ẹpe ephunom mọ rẹmu ni iboom ịdipho agol,
kụ eegu phọ Ẹnaan Oomo Ịikpo phọ ịngo ni iyira omaghagha.
23Ịikpo phọ Ẹnaan ẹbugh ịdi yira kótue otuman nyọdi;
esi ạdol phọ ọdi rꞌawe ọdi aakuan ni ạḅile rasoph ghan iiḅi ịiruen.
24Ẹpe kụ ịyaar phọ iikia ílho bọ ịduon oomo awe rokiilaan ghan bọ nyọdi,
ḅịle kẹn ọdi rạḅitonaan ghan bụphe ọḅem bọ mọ bụno awe olegheri-ịyaar.
Currently Selected:
Job 37: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
