Job 36
36
1-2Kpạram ạḅile ạnaghan ẹphurukpu
ịphen mị rạkaaph bọ ịlo Ẹnaan.
3Olegheri-ịyaar phọ ạmi ạbugh ni; mị kaḍighinom ni ịpe mị alegheri bọ
esi oḍeenaan mọ Ẹnaan Ọlemia phọ ạmi oye iiḅi ịiruen.
4Ịyaar ílho dị mị ạḅeni nyịna dị eḍighi ọkpe;
nạ ạkaraghi rạmiin oye dị ạsu ologhi sịen risigh ạna.
5Pọ eeghe ịikpo dị Ẹnaan ẹmoogh. Ọdi rạ́ḅitonaan ghan oye;
ịyaar ílho dị ọdi ụ́naghanan.
6Ọdi rámeera ghan mọ abuḍighinom ịkaraph ọrol ghan bịn,
ḅịle ọdi rasophonaan ghan rukulom iiḅi ịiruen.
7Ọdi raako ghan ni weye aruukuan;
ọdi rameera ghan ni mọ bịdi ọda ịdipho ạraalha,
kạḅile ameera mọ oghueni bịdi kꞌagee-pọ.
8Kụ ọlo eḍighi ịyaar lọ ọphaḍiom weye izime,
bịdi ọmiinom esi ịdi bịdi moḍighi,
9Ẹnaan reḍeenaan ghan ni bịdi ịkaraph phọ ạbidi rꞌophoophe aloor phọ ạbidi.
10Ọdi raḍighi ghan ni ịdi bịdi kọnaghanan ọphur ạruru phọ ọdi
mọ bịdi ọḍua esi ịkaraph.
11Eḍighi ịyaar lọ bịdi ọnaghanan Ẹnaan kụ okumu nyọdi,
pọ edughom rꞌẹepho kụ kẹtolonaan ghuḍum ạbidi.
12Kụ ọlo ịdipho ílho, pọ bịdi komughom rꞌélegheri ịyaar
bịn ọḅeeny okol phọ osi ọmar iḍim.
13Awe dị Ẹnaan úlegheri odimom ghan ọghagh ologhi,
kụ ghạlamo amem lọ ọliom ni, bịdi rọ́oḅereghi ghan kọlom ọloghonaan ạḍighaagh.
14Bịdi romugh ghan ẹpuuny,
ạdol umugholoor kụ reegborion ghan bịdi.
15Kụ ọlo Ẹnaan rẹsighe ghan ni ịminimiin kẹtughemiom weye,
ḅịle kẹn rẹsighe ghan ịiḅaghami kẹḅaranom riḍien ạbidi.
16Ẹnaan imitiom nyịna esi ịiḅaghami,
ẹḅile emeera nạ ạghelom ịma ạdol;
eḍien olhe emuza kꞌạna.
17Kụ ọlo nyịidipho rọliom nyịna ịpe ẹkpianaan bọ.
18Gona loor ạna ọbo ịgara keekeleghi ghan bọ nyịna,
ọbo nạ kape ghan bọ eten loor ẹmhu ẹelha.
19Ịlooghi ọloghonaan ạḍighaagh nyịna sụo kẹ́ngo;
oomo ịnyaam mọ ạna kétue ẹloghonaan nyịna ḍịghaagh nyịidipho.
20Kạ́lom mọ aḍughul eghul,
mem mọ ọpo areelhe phọ kepe bọ.
21Gona loor ạna ọbo nạ kạki ghan bọ ẹku ịkaraph;
ụngo nyịna ịminimiin phọ ọbo nạ aghiilaan ịkaraph.
22Tụutughian igbogh ịikpo phọ Ẹnaan;
ọdi kụ ọkaraghi ogbogh ọtughemia.
23Oye ólho dị kạḅeni Ẹnaan ịlo oḍighi,
ọbo kẹn ạgbaanaan mọ ọdi aḍighi ịkaraph.
24Roboom ghan nyọdi oomo amem esi iiḍighi phọ ọdi;
ẹkpianaan nyịna kẹn oboom ghan ọdi.
25Tọrotoro oye mạmiin ni ịphen ọdi maḍighi bọ;
kụ ọlo yira kọtol egher kụ opogh aani ghan.
26Yira kọ́kar otue olegheri oomo phọ ịpe ọdi ạman bọ,
ọbo kẹn ogbi ạsia lọ ọdi ạman.
27Ẹnaan phọ kụ rẹsighe ghan bọ mụum sịen ade phọ
kụ katene ikpo ọlophia.
28Ọdi kụ rameera ghan bọ
mọ ọlophia ạlophonaan oomo awe.
29Oye ólho dị alegheri ịpe ọotu phọ ratelhe ghan bọ
rꞌịpe ọomaany rẹtaph ghan bọ
ẹpe okuaḍio phọ, ẹpe Ẹnaan erugh bọ.
30Aḍio phọ rẹmepheghian ghan ẹpe oomo okuaḍio phọ,
kụ ọlo ude ọphiiny phọ abil li.
31Ịduon kụ ịdi ọdi rạngo ghan eḍien weye phọ
kạḅile amuzeḍinaan eḍien.
32Ọdi rasiphom ghan ḍịghaagh ọdi ọomaany
kụ kạtuugh esi ạraph.
33Ọomaany kụ rạḅem ghan mọ oghim ratu,
kụ ạsinam bịn elegheri ni mọ ọdi ratu.
Currently Selected:
Job 36: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
