Job 39
39
1Nạ alegheri ni mem dị rọmar ghan bọ rụtu-ịga rạaḅaraph phọ?
Nạ mạmiin ghan ni mem dị ooroogh rạmar?
2Nạ alegheri ni ọnhu ạrunwanyu dị eghun ạbidi rẹman ghan?
Nạ alegheri ni mem mọ rọmar ghan bọ nmụny?
3Nạ alegheri ni mem mọ bịdi kokpoloman bọ
kụ ọmar nmụny ọlogh sịen aḅirini phọ?
4Ạnmuny ạbidi ropoph ghan ẹpe ologhi eḍum mọ;
bịdi romite bịn róḅula ghan mun.
5Ạnhian kụ ạngo bọ ẹereegh ilhom ịnam adool phọ?
Ạnhian kụ ạkarion bọ bịdi kụ retelhe yogh bọ ẹwalalaan?
6Mị ụngo bịdi ẹdala phọ mọ eḍighi marugh ạbidi,
ạḅile ạwile mọ bịdi ọrol ghan ẹpe ẹdala aboph phọ.
7Bịdi ọkelan ni rọyugh igbogh ạramha phọ,
ḅịle kẹn oye ólho dị katue atughom bịdi aakonom ịdi bịdi koḍighinaan nyọdi oḍighi.
8Ẹpe ạraaḅaraph phọ kụ ẹdi bịdi rẹḅal ghan ịḅal,
ẹpe kụ ẹdi bịdi rẹwa ghan rọogho kẹraal.
9Ạnam eḍum katue ni aḍighinaan nyịna oḍighi ḍụghum?
Ọdi kameera ni ạmina ḍughul sịphe otu ịnam mọ ḍụghum?
10Nạ katue ni ạkpo oḍigh nyoniin bịn ameera omuul asuphul ạna?
Ọbo kẹn oḍur ẹsua dị kẹkpo ghan suphul phọ ạna.
11Nạ katue ni aḍuom ologhi iboom ịikpo phọ ọdi
bịn agon ghan mọ ọdi kaḍighinaan nyịna igbogh iiḍighi ḍụghum?
12Nạ kagon ghan ni mọ ọdi abugha eḍien phọ ạna ạsighe aru,
ạḅile aakpomoghi ịbiakpa phọ ạna ḍụghum?
13Araphaaph efagara-ẹnun reegborion ghan iboom,
kụ ọlo efagara-ẹnun ílho dị ketue ẹpeeph ịdipho ọoke.
14Efagara-ẹnun phọ rẹbile ghan reghelhe ọdi ude,
mọ ẹghologhol ade phọ eḍighi ịlo areghelhe phọ kẹenyuum.
15Ọdi ólhegheri mọ ẹda oye ketue ni eezighiḍi bịdi,
ọbo kẹn elhom ẹnam ketue ni eḅomoghi bịdi.
16Ọdi raḍighi ghan mụdi areghelhe phọ kị́lo ọdi,
ḅịle rẹ́kigh ghan ịyaar esi ọdi mọ elhoman ọno kụ repe ni.
17Mị phọ ni kụ ụlhemom bọ nyọdi elologhi phọ,
ḅịle kẹn mị ụ́ngo nyọdi olegheri-ịyaar.
18Kụ ọlo mem lọ ọdi amiigh oghiil eghiil,
ọdi kạmilogh ni ạsu lọ oye rakiilom.
19Nạ aJob kụ ụlhem bọ rụsu ạkparami ịdipho,
ạḅile ạngo ẹza ḍụghum?
20Nạ kụ uḍighi bọ ịpe bịdi ropeleghu ghan bọ ịdipho igurubia
kọḅile ọghughian ịdi awe kokiilaan ḍụghum?
21Bịdi rọsighe ghan ruwol ạbidi kụ kọzaraam ude ẹpe eḍiiny phọ;
bịdi rokiil ghan ọghi ẹgham rꞌoomo ịnyaam ạbidi.
22Bịdi úlegheri ịyaar dị oghol mọ oghiilaan,
ḅịle elhool ẹgham ílho dị keḅulemi bịdi ọman.
23Ạreenema ẹgham mọ awe phọ ọpham bọ rokiilom
reekaraghan kẹḅile ẹmepheghian mem ogogo.
24Ạrusu phọ ologhi ạḅaal bịn kụ akiil rạki;
mem dị ọkuodu phọ ạḅa, bịdi kótue mun ọmeera.
25Tọro amem lọ ọkuodu phọ ạḅa bịdi ọkughian;
bịdi kọnaghan ni eḍu ẹgham kụ ẹgham mọ egbi ọteeny
kụ bịdi ọnaghan dị abuḍiemiom mọ rọlooghi kọtooghi,
26Ọogho rạtuugha ghan ịlo ọpheeph ḍịghaagh ạna ḍụghum
mem mọ ọpo ọdi ạatarion bọ raphaaph phọ ọdi aphoghomi ẹpe esoorom mọ?
27Uga rakori ghan ịto ạna kụ kagbi ọlogh otu phọ ọdi
ẹpe ạnyu ạraaḅaraph phọ ḍụghum?
28Ọdi rạlogh ghan otu ọdi ọkaraghi ẹpe ạnyu aḍighiigh phọ
kụ ạsighe ọkar ẹpe eekuna ạnyu phọ aḍighi esi ọdagh ghan kụ ọmiin ịiḅaghami lọ retu.
29Ịsiphe phọ kụ ẹdi ọdi rạtol ghan
kagon ịyaar oghiigh ạany.
30 #
Mat 24.28; Luk 17.37 Esi lọ ịḅoria aruzu edi kụ ẹdi aruga resoor ghan keekpomoghan,
kụ ạnmuny aruga phọ kụ rẹpughol ghan ịḅaal phọ.
Currently Selected:
Job 39: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
