Job 32
32
Ọghaaph phọ Elihu
(32.1—37.24)
1Loor esi dị aJob ameeraam bọ ni akuphom owol mọ ọno ọ́piom, ịraar phọ awe phọ ụwile ni ọphagharanaan ọdi. 2Kụ ọlo oniin oye dị raten aani ni bịn dị oghol mọ Elihu órue mun ọphamaghan ọghagh ologhi phọ ọdi, loor esi dị aJob rạḅem ghan mọ ọno ọ́piom ạḅile ghụn rạḍagha Ẹnaan. (Elihu phọ aḍighi ọony ạBarakel, ẹemara ẹemara aBuz, ḅịle ọdi ọlo eelhe phọ ạRam). 3Ọdi ạghagham kẹn ni ologhi ịraar phọ ạrighiri phọ aJob. Bịdi útue ụ́pagharanaan Job kụ ịduon phọ ịḅile ẹghigh mụdi Ẹnaan phọ ghụn kụ edi ekeeny. 4Loor esi dị Elihu kụ ạkaraghi aḍighi ọbumoony dị ạrol aani bọ sịphe phọ, ọdi akori ni tụtu tọrotoro oye mạghaaph ạman. 5Mem dị ọdi ạmiin bọ mọ ịraar phọ awe phọ útue ụ́pagharanaan Job, ọdi ạghagh ni ologhi 6kụ amiigh ọghaaph:
Elihu
Mị aḍighi ni ọbumoony, ḅịle nyina eḍighi ikumoor awe,
kụ iḍighi kụ mị ughiilaan ni ọḅeni anyina ịpe mị ạatughian bọ.
7Mị ụḅeni loor phọ ạmi mọ nyina kụ ịkpe ọghaaph,
mọ nyina ikumoor awe phọ ịsighe olegheri-ịyaar phọ anyina eḍighinom.
8Kụ ọlo uwaloor Ẹnaan Oomo Ịikpo phọ
kụ rasoorom ghan weye kụ kạngo olegheri-ịyaar.
9Oḍighi okumoor oye kụ réḍighi ghan ịdi awe kolegheri ịyaar
ọbo ọbo ọloghonaan ạbidi ḍịghaagh olegheri ịpe eru bọ ịne.
10Nyịidipho mị rạwa mọ nyina ịnaghanan ịmi;
mị kịḅeni inyina ịpe mị ạatughian bọ.
11Mị ụkparam ni kụ ạnaghan ghan mem mọ nyina rẹkaaph bọ,
ạḅile akori ghan mem mọ nyina rẹwaragha bọ ikpo ọnhu olegheri-ịyaar phọ.
12Mị ulher aḅeri kụ ạnaghan mọ
nyina ítue ịkaaph iikpereghi ịpe aJob ạghaaph bọ.
13Iḍighi ika kụ nyina ẹsighenom bọ mọ nyina kụ mẹmiin olegheri-ịyaar?
Ẹkpe ni dị Ẹnaan kẹpagharanaan Job, loor esi dị nyina memeel.
14AJob ạghaaph ghan ịḅeni inyina, kạ́mi,
kụ ọlo mị kạ́pagharanaan ịpe nyina eḍighi bọ.
15Job, ikpo ọnhu mebi bịdi;
bịdi ụ́moogh ọphagharanaan ọngo ạna.
16Mịna kaḅoorian bịn ạkiom ghan risigh ḍụghum mem dị bịdi moḅoroghian?
Bịdi ọmeregha sịphe bịn ụ́moogh mun ịyaar ọghaaph.
17Eeye, mị kạngo ọphagharanaan ọlo ạmi nyịidipho,
ạḅile ịḅeni inyina ịpe mị ạatughian bọ.
18Mị kátue mun akori.
Mị kátue mun aḅoronom ikpo ọnhu phọ.
19Eḍighi ịyaar dị mị ụ́moogh ọgel ọghaaph aani,
mị katuphaan ịdipho okuru lọ amiim amuza.
20Mị kátue mun ạkparam; ịkpianaan ịmi ọghaaph.
21Mị kạ́pel oye aḍighan oye esi ọghaaph phọ ọphon;
mị ráatumeni oye.
22Mị ụ́maar ootumeni oye,
ḅịle Ẹnaan keegborion ni ịliom ịmi eḍighi ịyaar dị mị aḍighi ịdipho.
Currently Selected:
Job 32: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
